ထိုင်းနိုင်ငံ တရားမဝင် ရောက်လာသည့် ရွှေ့ပြောင်း အလုပ်သမားများကို ထိုင်းအစိုးရ အလုပ်သမား ရေးရာရုံးမှ Work Permit ကိုပြုလုပ်ရန် စာရင်းထည့်သွင်း နိုင်ပြီဖြစ်ကြောင်း ဇူလိုင် ၅ ရက်တွင် ထုတ်ပြန်ခဲ့သည်။
အဆိုပါ Work Permit ကို ပြုလုပ်ရန်အတွက် ယခင်က နာမည်စာရင်းပေးထားသူများကို ဆက်လက် ပြုလုပ်ပေးသွားမည်ဖြစ်ပြီး နာမည်စာရင်း မပေးထားရသည့်သူများအနေဖြင့် နာမည်စာရင်း တင်သွင်းနိုင်ကြောင်း ထုတ်ပြန်ချက်တွင် ရေးသားထားသည်။
အဆိုပါ နာမည်စာရင်းအသစ်တင်မည့်သူများက ဇူလိုင် ၃၁ ရက် နောက်ဆုံးတင်ရမည်ဖြစ်ပြီး စာရင်းတင်ရန် သူဌေးနှင့်အတူ အလုပ်သမားရေးရာရုံးတွင် တင်သွင်းနိုင်ကြောင်း၊ ပွဲစားများမှ တဆင့်လည်း နာမည်စာရင်းတင်သွင်းနိုင်သည်။
“ စာရင်း အသစ်တင်ဖို့ကတော့ ဒီလကုန်ထိပဲ။ နာမည်စာရင်းပေးပြီး Work Permit လုပ်ဖို့ နောက်ကျတဲ့သူနဲ့ ၊ ဘာမှ မရှိတဲ့သူတွေကို လုပ်ပေးသွားမယ်လို့ ပြောတယ်။ ကျနော်တို့ကလည်း သေချာမသိသေးဘူး။ MOU တွေပါတယ်။ MOU တွေကို လုပ်ပေးနေတယ်။ နာမည်စာရင်း မတင်ထားဖူးတဲ့ သူတွေကို နာမည်စာရင်းလာပေးဖြစ်ပါတယ်” ဟု Work Permit ပြုလုပ်ပေးသူတစ်ဦးက သျှမ်းသံတော်ဆင့် ကိုပြောသည်။
လက်ရှိ Work Permit ကို ပြုလုပ်သွားပေးရန်အတွက် ကုန်ကျစရိတ် မည်မျှကုန်သွားမည်ကို မသိရှိသေးပေ။
ထို့ကြောင့် ရွှေ့ပြောင်း အလုပ်သမားများအနေဖြင့် ပွဲစားများကို နာမည်စာရင်းအသစ် တင်သွင်းရန်အတွက် ကုန်ကျစရိတ်ကို အရင်ဆုံး မေးမြန်းရန် လိုအပ်ကြောင်း သိရသည်။
“ထိုင်းအစိုးရကနေလည်း ဒါတွေကို လုပ်ပေးဖို့အတွက် ကုန်ကျစရိတ် ဘယ်လောက်ကုန်မလဲဆိုတာကို မပြောလာသေးဘူး။ ဒါတွေကို ကျနော်တို့ကလည်း မသိရသေးပါဘူး။ ပွဲစားတွေနဲ့ သွားပြီးတော့ လုပ်မယ်ဆိုရင် နာမည်စာရင်းတင်ထားလို့ရမယ်။ ဒါမဲ့ ကိုယ်တိုင်သွားလုပ်ဖို့ကတော့ ခက်ပါလိမ့်မယ်။ အလုပ်သမားရုံးကလည်း မလက်ခံသေးဘူး။ ပုံမှန်ဆိုရင်တော့ သွားလုပ်လို့ရပါတယ်။ အခုက နောက်ဆုံးစာရင်းပေးနိုင်တဲ့ ရက်ကိုပဲ ပြောထားပြီးတော့ ဘယ်နေ့စပြီး အလုပ်သမားရုံးကို လာလို့ရမလဲဆိုတာကို မပြောထားဘူး” ၎င်းက ထပ်လောင်းပြောသည်။
ပုံမှန်အားဖြင့် Work Permit ကို ပြုလုပ်သွားရန်အတွက် ဘတ်ငွေ ၁ သောင်း အထိ ကုန်ကျလေ့ရှိပြီး၊ Work Permit ပြုလုပ်ပေးမည့် နိုင်ငံများမှာ မြန်မာနိုင်ငံ၊ ကမ္ဘောဒီးယား၊ လာအို နှင့် ဗီယက်နမ် နိုင်ငံသားများ ဖြစ်ကြသည်။
စစ်အာဏသိမ်းပြီးနောက် မြန်မာနိုင်ငံသားများသည် ထိုင်းနိုင်ငံသို့ တရားမဝင်ပြောင်းရွှေ့လာသူ သိန်းချီရှိကြောင်းသိရသည်။