သျှမ်းပြည် လားရှိုးမြို့တွင် မတော်တဆ ယာဉ်တိုက်မှု၊ ဓားခုတ်မှု နှင့် မူးယစ်ဆေးဝါး သုံးစွဲမှုကြောင့် တစ်လအတွင်း ၅ ဦး သေဆုံးပြီး၊ ၁၄ ဦး ထိခိုက်ဒဏ်ရာ ရရှိခဲ့ကြောင်း စုံစမ်းသိရှိရသည်။
ပြီးခဲ့သည့် ဇွန်လ ၁ ရက်မှစ၍ လားရှိုးမြို့နယ်အတွင်း မတော်တဆ ယာဉ်တိုက်မှု၊ တိမ်းမှောက်မှုကြောင့် တစ်လအတွင်း လူ ၂ ဦး သေဆုံးခဲ့ရပြီး ၁၂ ဦး ထိခိုက်ဒဏ်ရာရရှိခဲ့ကြောင်း အခြေစိုက် လူမှုကူညီရေးအသင်းမှ သွားရောက်ကူညီခဲ့သည့် မှတ်တမ်းအရ သိရသည်။
ထို့အပြင် လားရှိုးမြို့ ရပ်ကွက် ၁၂ ၊ ရပ်ကွက် (၅) နှင့် လွိုင်လွမ့်ရွာ တန့်ယန်းလမ်းခွဲထိပ်တွင်လည်း မူးယစ်ဆေးဝါး သုံးစွဲပြီး အိမ်ခြေမဲ့အဖြစ် နေထိုင်သူ အမျိုးသား ၃ ဦး၏ အလောင်းကို တွေ့ရှိခဲ့ကြောင်း ရေးသားဖော်ပြထားသည်။
စစ်တပ်က အာဏာသိမ်းပြီးနောက်ပိုင်း လားရှိုးမြို့အတွင်း ရွှေ့ပြောင်းနေထိုင်သူ၊ လူမှုထူထပ်မှု များပြားလာမှုကြောင့် ခိုးဆိုးလုယက် မကြာခဏ ဖြစ်ပွားနေသည်။
ပြီးခဲ့သည့် ဇွန်လအတွင်း ဓားခုတ်မှု ၂ မှုဖြစ်၍ အမျိုးသား ၂ ဦး ထိခိုက်ဒဏ်ရာ ရရှိခဲ့ကြောင်း သိရသည်။
“လားရှိုးမြို့မှာတော့ မကြာခဏ ဗုံးပေါက်သံတွေ ကြားနေရတာ ရိုးနေပြီ။ ခိုးဆိုးလုယက်၊ ဓားခုတ်မှုတွေလည်း ခဏခဏဖြစ်တာ ကြားနေရတယ်။ ကျမကတော့ လုံခြုံရေးအတွက် စိုးရိမ်ရတယ်။ လူအရမ်းများတဲ့ နေရာဆို မသွားရဲဘူး။ ညဖက်ဆိုလည်း အိမ်ပြင် မထွက်ရဲဘူး။ အခုကလေးကို ကျောင်းထားတော့ ကလေးအတွက်လည်း စိုးရိမ်ရတယ်“ ဟု လားရှိုးမြို့ ဒေသခံ ကျောင်းသားမိဘတစ်ဦးက ပြောသည်။
အလားတူ ဇွန်လ ၇ ရက်နှင့် ဇွန်လ ၂၈ ရက် လားရှိုးမြို့ပေါ်ရှိ Fully Light ဟိုတယ်တွင် ဗုံးပေါက်ကွဲမှု နှစ်ကြိမ်ဖြစ်ပြီး အဆိုပါ ပေါက်ကွဲမှုနှင့် ပတ်သက်ပြီး လက်နက်ကိုင်တပ်ဖွဲ့ တစ်ဖွဲ့မှ အခွန်တောင်းဆိုမှု အတွက် ခြိမ်းခြောက်လုပ်ဆောင်မှု ဖြစ်နိုင်ကြောင်း ၎င်းအမျိုးသမီးက ဆက်ပြောသည်။
စစ်တပ်က အာဏာသိမ်းပြီးနောက်ပိုင်း လားရှိုးမြို့ ၌ ခိုးဆိုးလုယက်၊ ဓားပြတိုက်မှု၊ ဗုံးပေါက်ကွဲမှု စသည်ဖြင့် ပဋိပက္ခများ မကြာခဏဖြစ်ပေါ်နေကာ အုပ်ချုပ်ရေး၊ တရားဉပဒေရေး မရှိတော့ရာမှ ပြည်သူများသည် စိုးရိမ်ကြောက်လန့်စိတ်ဖြင့် နေထိုင်ကြရကြောင်း သိရသည်။
