သျှမ်းပြည် လဲချားမြို့နယ် နားပွဲကျေးရွာအုပ်စု နမ့်ဟူးကျေးရွာမှာ မိုးကြိုးစက်ကွင်း ထိမှန်သဖြင့် နွား (၁၀) ကောင်ကျော် သေဆုံးသွားခဲ့ကြောင်း စုံစမ်းသိရှိရသည်။
ပြီးခဲ့သည့် ဇွန် (၂၉) ရက်နေ့က မိုးသည်းထန်စွာ ရွာသွန်းချိန်တွင် နွား (၁၀) ကောင်ကျော် တောင်ယာထဲ ကျက်စားနေစဥ် မိုးကြိုးစက်ကွင်းနှင့်မလွတ်ကင်းသဖြင့် မိုးကြိုးထိမှန် သေဆုံးသွားခဲ့ကြောင်း သိရှိရသည်။
“ကျနော်တို့ တောင်ယာထဲ သွားကြည့်လိုက်တော့ နွား (၁၀) ကောင်ကျော်က သေဆုံးနေပြီ။ သူတို့ ကိုယ်ပေါ်မှာလည်း ယင်ကောင်တွေ အုံနေပြီ။ ဒီလို သေဆုံးသွားတာတော့ စိတ်မကောင်းဘူး” ဟု နွားပိုင်ရှင် က ပြောသည်။
ယခုလို မိုးဦးကာလမှာ မိုးသည်းထန်စွာ ရွာသွန်းချိန် အဆောက်အဦးမြင့်တွေမှာ မိုးကြိုးပစ်နိုင်ကြောင်း၊ ကွင်းပြင်နေရာ နှင့် သစ်ပင်အောက်များတွင် မိုးကြိုးပစ်နိုင်ကြောင်း ဖြစ်ပွားနိုင်ကြောင်း ဒေသခံများက ထပ်မံ သတိပေးထားသည်။
ပြီးခဲ့သည့် ၂၀၂၂ ခုနှစ် သြဂုတ်လတွင်လည်း ကျိုင်းတုံမြို့နယ်မှ ပင်တောက်ကျေးရွာမှ ဒေသခံ အမျိုးသမီးတစ်ဦး နေအိမ်ခြံဝန်းထဲ ရှိနေစဥ် မိုးကြိုးစက်ကွင်းထိမှန်ပြီး အသက်ဆုံးသွားရသည့် ဖြစ်စဥ်လည်း ဖြစ်ပွားခဲ့ဖူးသည်။
ယခုလို မိုးရာသီကာလအတွင်းတွင် လေပြင်းများတိုက်ခတ်ခြင်း၊ လေပြင်းနှင့်အတူ မိုးထစ်ချုန်းရွာခြင်း၊ မိုးကြိုးပစ်ခြင်း၊ လျှပ်စီးလက်ခြင်း ၊ မိုးသီး ကြွေခြင်းနှင့် နေရာကွက်ကျား မိုးထစ်ချုန်းရွာခြင်းစသည့် သဘာဝဘေး အန္တရာယ်ဆိုင်ရာ မိုးလေဝသဖြစ်စဉ်များ ဖြစ်ပေါ်နိုင်သည့်အတွက် အသိပညာပေးများ လိုအပ်အကြောင်းလည်း ဒေသခံပြည်သူများက ပြောဆိုကြသည်။
