သျှမ်းပြည် လွိုင်လင်ခရိုင် လဲချားမြို့နယ်အတွင်းရှိ ရှမ်းပြည်တိုးတက်ရေးပါတီ ၊ ရှမ်းပြည်တပ်မတော် (SSPP/SSA) တပ်စခန်းရှိရာနေရာကို စစ်ကောင်စီက လေယာဉ်ဖြင့် ၆ ကြိမ်ထပ်မနည်း ပျံဝဲခဲ့ကြောင်း သတင်းရရှိသည်။
ယမန်နေ့ (ဇွန် ၂၈) ရက် နံနက် ၁၀ နာရီဝန်းကျင်တွင် စစ်ကောင်စီ၏ တိုက်လေယာဉ်သည် လဲချားမြို့နယ် SSPP/SSA တပ်စခန်းနေရာကို ပျံဝဲခဲ့သည်။
“မနေ့က စစ်ကောင်စီ တိုက်လေယာဉ် နဲ့ လဲချားမြို့နယ်ထဲကို ပတ်လာတာ ၆ ကြိမ်ထက် မနည်းလာတယ်။ သူတို့ ဒီနမ့်စန် ၊ ခိုလမ်ဘက်ကနေ လာတာ။ သူတို့ လဲချားမြို့နယ်ကို ပတ်ပြီးတော့ ပြန်သွားတာ။ ပြီးတော့ ခနနေ ပြန်လာတယ်။ တိုက်လေယာဉ် တစ်စီးပဲ လာတာပါ” ဟု လဲချားမြို့နယ်အတွင်း စစ်ရေးအတွင်း လှုပ်ရှားသူ တစ်ဦးက ပြောသည်။
ထိုအပြင် စစ်ကောင်စီသည် လဲချားမြို့နယ် ဟိုင်းဆိုင်ကျေးရွာ (ဝၢၼ်ႈႁၢႆးသႅင်) အတွင်း စစ်အင်အား နှင့် လက်နက်အင်အားထပ်မံ ဖြည့်တင်းလာခဲ့ကြောင်း သိရသည်။
အဆိုပါ ကျေးရွာအနီးတွင် SSPP/SSA က သွားလာလှုပ်ရှားနေသည့်နယ်မြေဖြစ်ပြီး လက်ရှိမှာ စစ်ကောင်စီ နှင့် SSPP/SSA က စစ်ရေးတင်းမာ နေလျက်ရှိသည်။
“ လဲချားမြို့နယ်ကရှိတဲ့ SSPP/SSA တပ်ကို တိုက်ဖို့ အမိန့်ပေးနေတဲ့ စစ်ကောင်စီတပ်ကလည်း အဲ့ဒီ ဟိုင်းဆိုင်ကျေးရွာနားရှိတဲ့ စစ်ကောင်စီ တပ်ဖြစ်တယ်။ မနေ့ မနက်ကစ ပြီးတော့ စစ်ကောင်စီတပ်တွေကလည်း လွိုင်ဝမ်လုတ်း ကျေးရွာမှာ စစ်ဆေးရေး ပြန်လုပ်နေပြီ။ အဲ့ကျေးရွာမှာကလည်း SSPP/SSA က သွားလာနေတာ ဖြစ်တယ်။ တကယ်လို့ စစ်ကောင်စီက ရှေ့ထပ်တိုးလာခဲ့ရင် တိုက်ပွဲဖြစ်ပြီ။ အခုက နှစ်ဖက်လုံး စစ်ရေးတင်းမာနေကြတာ” ဟု အထက်ပါ စစ်ရေးအတွင်း လှုပ်ရှားနေသူ တစ်ဦးက ပြောသည်။
လဲချားမြို့နယ်အတွင်း စစ်ရေးလှုပ်ရှားနေသည့် စစ်ကောင်စီတပ်သားသည် ၂၀၀ ဝန်းကျင်လောက်ရှိပြီး အများစုက နမ့်စန်မြို့ နှင့် ခိုလမ်မြို့မှ စစ်အင်အားဖြည့်တင်းလာခဲ့ကြောင်း ဒေသခံများ ပြောပြချက်အရ သိရသည်။
အလားတူ လွိုင်ဝမ်လုတ်းကျေးရွာအနီး စစ်ကောင်စီတပ်စခန်း ၃ ခုရှိထားကြောင်း သိရသည်။
ယခု ဇွန်လအတွင်း စစ်ကောင်စီက SSPP/SSA ကို လဲချားမြို့နယ်အတွင်းရှိ တပ်စခန်းအားလုံး ဆုတ်ခွာသွားရန် အတွက် (၂) ကြိမ်တိတိ ညွှန်ကြားထားသည်။
“စစ်ကောင်စီက ကျနော်တို့ကို လဲချားမြို့နယ်ထဲမှာရှိတဲ့ တပ်စခန်းတွေကို တပ်ဆုတ်ခိုင်းနေတာ။ တကယ်လို့ မဆုတ်သွားဘူးဆိုရင် ကျနော်တို့ SSPP/SSA တပ်ကို စစ်ကောင်စီက စစ်ရေးပြင်ဆင်သွားဖို့ရှိပါတယ်” ဟု လဲချားမြို့နယ် SSPP/SSA တပ်က တာဝန်ရှိသူ တစ်ဦးက ပြောသည်။
အလားတူ ယမန်နေ့ ဇွန် ၂၈ ရက်နေ့တွင်လည်း လဲချားမြို့အတွင်း ဒေသခံများကို မြို့ပြင်မထွက်ရန်အတွက် စစ်ကောင်စီက ဒေသခံ တစ်ချို့ကို သတိပေးထားသည်။
၂၀၂၂ ခုနှစ်အတွင်းတွင်လည်း စစ်ကောင်စီက လဲချားမြို့အတွင်း SSPP/SSA ကို တပ်ဆုတ်ခိုင်းခဲ့သည်။
