သျှမ်းပြည် လားရှိုးခရိုင်၊ လားရှိုးမြို့ပေါ်ရှိ Fully Light ဟိုတယ်တွင် တစ်လအတွင်း ပေါက်ကွဲမှု နှစ်ကြိမ် ဖြစ်ပွားကြောင်း စုံစမ်း သိရသည်။

ယမန်နေ့ ဇွန်လ ၂၈ ရက် ညပိုင်း ည ၈ နာရီဝန်းကျင် အချိန်တွင် လားရှိုးမြို့ပေါ် အမှတ် (၂) ရပ်ကွက်တွင် ရှိသည့် Fully Light Hotel တွင် ပေါက်ကွဲမှု ဖြစ်ပွားခဲ့ကြောင်း ဒေသခံများက သျှမ်းသံတော်ဆင့်ကို ပြောသည်။

“ပေါက်ကွဲမှု ဖြစ်တဲ့ ည ၈ နာရီအချိန်ဆိုတာ အဲ့နားပတ်ဝန်းကျင်က လူသွားလူလာများတဲ့ အချိန်ဖြစ်တယ်။ ပေါက်ကွဲမှုကတော့ တစ်ချက်ပါပဲ။ ထိခိုက်မှုတော့ မရှိပါဘူး။ စစ်ကောင်စီကလည်း လာစစ်ဆေးပေးတာတွေ ရှိတယ်” ဟု လားရှိုးမြို့နေ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

အဆိုပါ ပေါက်ကွဲမှု ဖြစ်ပွားသည့် လားရှိုးမြို့မှ Fully Light Hotel သည် ယခင် ပြီးခဲ့သည့် ဇွန်လ ၇ ရက်နေ့တွင် လည်း ပေါက်ကွဲမှု တစ်ကြိမ် ဖြစ်ခဲ့ပါသည်။

ယခုလ အတွင်းမှာပင် Fully Light Hotel မှ ပေါက်ကွဲမှု နှစ်ကြိမ်ဖြစ်ပွားခြင်း နှင့် ပတ်သက်ပြီး လက်နက်ကိုင် တပ်ဖွဲ့ တစ်ခုခုမှ အခွန်တောင်းဆိုမှုအတွက် ခြိမ်းခြောက်လုပ်ဆောင်မှု ဖြစ်နိုင်ကြောင်းလည်း ဒေသခံများက သျှမ်းသံတော်ဆင့်ကို ပြောသည်။

“အခွန်လာတောင်းတာ မပေးလို့ ခြိမ်းခြောက်တဲ့ အနေနဲ့ လာလုပ်တာ ထင်တယ်၊ ဒါပေမဲ့ ဘယ်အဖွဲ့အစည်းက လာလုပ်တာတော့ မသိရဘူးပေါ့၊ အခုဆို လားရှိုးမြို့ပေါ်ကို လှုပ်ရှားတဲ့ လက်နက်ကိုင် အဖွဲ့အစည်းတွေကလည်း စုံလှပါတယ်” ဟု အထက်ပါ လားရှိုးဒေသခံ အမျိုးသားက သျှမ်းသံတော်ဆင့်ကို ပြောသည်။

ယခင် ပထမအကြိမ် ပေါက်ကွဲမှုတွင် ဗုံးနှစ်လုံး ရှေ့ဆင့်နောက်ဆင့် ပေါက်ကွဲခြင်း ဖြစ်ပြီး၊ ကား ၃ စီးပါ ထိခိုက် ပျက်စီးခဲ့သော်လည်း ယခုတစ်ကြိမ် ပေါက်ကွဲမှုသည် ထိခိုက်ပျက်စီးမှု မရှိကြောင်း သိရသည်။

ပေါက်ကွဲမှုသည် မည်သည့်လက်နက်ကိုင် တပ်ဖွဲ့မှ လုပ်ဆောင်သည်ကိုလည်း မသိရသေးသလို စစ်ကောင်စီ မှလည်း စစ်ဆေးမှု ဆက်လက်လုပ်ဆောင်နေလျက်ရှိကြောင်း သတင်း သိရသည်။

လားရှိုးမြို့နယ်အတွင်း လှုပ်ရှားသည့် လက်နက်ကိုင်တပ်ဖွဲ့များ အနေဖြင့် အာဏာသိမ်း စစ်ကောင်စီ တပ်ဖွဲ့ အပြင် တိုင်းရင်းသားလက်နက်ကိုင် တပ်ဖွဲ့များ ဖြစ်ကြသည့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် SSPP/SSA ၊ ကိုးကန့်တပ်ဖွဲ့ MNDAA နှင့် တအာင်း (ပလောင်) အမျိုးသားလွတ်မြောက်ရေးတပ်မတော် TNLA တို့က သွားလာလှုပ်ရှား နေလျက်ရှိကြောင်း သိရသည်။

စစ်ကောင်စီမှ နိုင်ငံတော် အာဏာသိမ်းယူပြီး နောက်ပိုင်းတွင် သျှမ်းပြည်အတွင်း လှုပ်ရှားသည့် လက်နက်ကိုင် တပ်ဖွဲ့များသည် အခွန်တိုးကောက်ခြင်း၊ ပိုက်ဆံတောင်းခြင်း၊ ဆက်ကြေးတောင်း ပမဏ တိုးမြှင့်ခြင်း နှင့် အချင်းချင်းကြား ပစ်ခတ်သတ်ဖြတ်မှုများလည်း မကြာခဏ ဖြစ်ပွားလေ့ရှိသည်။

ယင်းကဲ့သို့ အခြေအနေများကြောင့် ဒေသအတွင်း မငြိမ်မသက်မှုများ ဖြစ်ပေါ်လာပြီး ဒေသခံများကလည်း လုံခြုံရေး ကင်းမဲ့နေသလို ခံစားရကြောင်း ပြောဆို ညည်းတွားနေကြသည်။