သျှမ်းပြည် တာချီလိတ်ခရိုင် မိုင်းဖြတ်မြို့နယ် လဝကရုံးတွင် မှတ်ပုံတင် အချက်အလက်ယူပြီး မျက်လုံး Scan ဖတ်ခြင်းဖြင့် စမတ်ကတ်ပုံစံ စာရွက်ကို ယာယီထုတ်ပေးနေကြောင်း စုံစမ်းသိရသည်။
ပြီးခဲ့သည့် ဇွန်လ ၂၆ ရက်မှစပြီး မိုင်းဖြတ်မြို့နယ် လဝကရုံးတွင် စမတ်ကတ် လုပ်ဆောင်ဖို့အတွက် မှတ်ပုံတင် အချက်လက် ပေးသွင်းခြင်း နှင့် မျက်လုံး Scan ဖတ်ခြင်းဖြင့် စမတ်ကတ်ပုံစံ စာရွက်ကို ယာယီထုတ်ပေးနေကြောင်း ကိုယ်တိုင်သွားလုပ်ဆောင်ခဲ့ရသည့် ဒေသခံတစ်ဦးက သျှမ်းသံတော်ဆင့်ကို ပြောသည်။
“ပြီးခဲ့တဲ့ တနင်္လာနေ့က စပြီး လုပ်လာတာ။ စမတ်ကတ် လုပ်ဖို့အတွက် မျက်လုံးတွေကအစ Scan ဖတ်ပြီး၊ A4 စာမျက်နှာ တစ်ဝက်ဆိုဒ်လောက်ပါတဲ့ စမတ်ကတ်ပုံစံ ယာယီထုတ်ပေးထားတယ်။ ၆ လပြည့်ရင် စမတ်ကတ် ထုတ်ပေးပြီး မှတ်ပုံတင် သိမ်းမယ်လို့ ပြောတယ် “ ဟု ၎င်းဒေသခံ တစ်ဦးက ပြောသည်။
အဆိုပါ စမတ်ကတ်ကို လုပ်ဆောင်ဖို့အတွက် မှတ်ပုံတင် အဟောင်းပါရှိရမည်ဖြစ်ပြီး အချက်အလက် ဖြည့်သွင်းခြင်း နှင့် မျက်လုံး Scan ဖတ်ခြင်းဖြင့် စမတ်ကတ်ပုံစံ စာရွက်ကို ရရှိမည်ဖြစ်ကြောင်း သိရသည်။
လက်ရှိမှာ မြို့နယ်လဝက ရုံးမှတစ်ဆင့် မှတ်ပုံတင်အစား စမတ်ကတ်ကို ထုတ်လုပ်ပေးခြင်းသည် ယခုအချိန်မှစ၍ ရည်ရွယ်ပြီး လုပ်ဆောင်ပေးခြင်း မဟုတ်ဘဲ ယခင် အရပ်သား အစိုးရ လက်ထပ်မှစပြီး စမတ်ကတ် လုပ်ဆောင်ပေးရန် ရည်ရွယ်ထားသည်။
“ဟို့အရင်ကတည်းက စမတ်ကတ်အဖြစ် ပြောင်းမယ်လို့တော့ ကြားတယ်။ အရင်အစိုးရခေတ်တုန်းက တစ်ခေါက် လုပ်မယ်ဆိုပြီး သတင်းထွက်သေးတယ်။ ပြီးမှ ဒီလိုအခြေအနေဖြစ်မှ မလုပ်ဖြစ်တာ။ အခုချိန်မှ ပြန်လုပ်ပေးတာပေါ့ “ ဟု အထက်ပါ ဒေသခံတစ်ဦးက ထပ်လောင်း ပြောသည်။
ထို့အပြင် စမတ်ကတ် လုပ်ဆောင်ဖို့အတွက် မှတ်ပုံတင် အချက်အလက် ပေးသွင်းခြင်း နှင့် မျက်လုံး Scan ဖတ်ခြင်းဖြင့် စမတ်ကတ်ပုံစံ စာရွက်ကို ယာယီကိုင်ဆောင်ထားရပြီး ၆လ ပြည့်ပါက စမတ်ကတ် ကိုထုတ်ပေးပြီး မှတ်ပုံတင်အဟောင်းကို ပြန်လည် သိမ်းယူဖြစ်ကြောင်း သိရသည်။