သျှမ်းပြည် မူဆယ်ခရိုင်၊ ကွတ်ခိုင်မြို့နယ်မှ (၃၈) မိုင် မန်ပိန်းကျေးရွာ ဒေသခံ အမျိုးသား တစ်ဦးသည် မြန်မာ အမျိုးသား ဒီမိုကရက်တစ် မဟာမိတ်တပ်မတော် (MNDAA) ကိုးကန့်တပ်ဖွဲ့ တပ်စခန်း အတွင်း၌ ဒဏ်ရာများဖြင့် သေဆုံးလျက် အလောင်းပြန်ရကြောင်း စုံစမ်း သိရသည်။
ပြီးခဲ့သည့် ဇွန်လ ၂၁ ရက်တွင် (၃၈) မိုင် မန်ပိန်းကျေးရွာနေ ဦးတူးလွမ် အမည်ရှိ အသက် (၄၀) ဝန်းကျင် အမျိုးသား အလောင်းကို လာရောက်သယ်ဆောင်ရန် MNDAA မှ အကြောင်းကြားလာသည့် အတွက် ကျေးရွာလူကြီး နှင့် မိသားစုဝင်များက သွားရောက် သယ်ဆောင်ခဲ့ရကြောင်း ဒေသခံများက ပြောသည်။
“ဘယ်လို လုပ်ပြီးတော့ MNDAA တပ်စခန်းထဲကို ရောက်သွားလဲ ဆိုတာတော့ မသိရဘူး၊ အလောင်းကို လာသယ် ပါဆိုလို့ သယ်တဲ့အချိန် ဘယ်လိုဖြစ်လဲ၊ ဘာကြောင့်လဲ ဆိုတာတွေ မေးလည်း သူတို့က အထက်လူကြီး ဖြေလိမ့် မယ်လို့ပဲ ပြောတယ်၊ ဘာမှ မသိရဘူး” ဟု မိသားစုဝင် နှင့် နီးစပ်သူ တစ်ဦးက သျှမ်းသံတော်ဆင့်ကို ပြောသည်။
ဦးတူးလွမ်သည် လွန်ခဲ့သည့် တစ်ပတ်ခန့်က နေအိမ်တွင် ပျောက်ဆုံးသွားပြီး မိသားစုဝင်များက လူပျောက် ကြေညာပြီး လိုက်လံရှာဖွေနေချိန်တွင် MNDAA ဘက်မှ အလောင်းလာသယ်ရန် အကြောင်းကြားလာခြင်း ဖြစ်ကြောင်း သိရသည်။
ထို့အပြင် ရုပ်အလောင်းကို သွားရောက်သယ်ဆောင်ချိန်တွင် ရိုက်နှက်ခံထားရသည့် ညိုမဲဒဏ်ရာများလည်း ခန္ဓာကိုယ်အနံ့ တွေ့ရကြောင်း သိရသည်။
“ကျောကုန်းတွေ၊ ရင်ဘတ်တွေ၊ မျက်နှာတွေမှာ ညိုမဲဒဏ်ရာတွေ တွေ့ရတယ်၊ ကြည့်ရတာတော့ အသက်မထွက် ခင်မှာ ရိုက်နှက် နှိပ်စက်ခံထားရတဲ့ ပုံပဲ၊ ပြီးတော့ သူ့အိမ်ကနေလည်း ပျောက်နေတာ ငါးရက် တစ်ပတ်လောက် ရှိပြီ၊ MNDAA တပ်စခန်းထဲ ဘယ်လိုရောက်သွားလဲ ဆိုတာ မိသားစုဝင်တွေတောင် မသိဘူး” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ပြောသည်။
အဆိုပါ (၃၈) မိုင် မန်ပိန်းကျေးရွာအနီးတွင် စခန်းချ နေထိုင်သည့် MNDAA တပ်စခန်း တစ်ခုလည်း ရှိနေခြင်း ဖြစ်ကြောင်း သိရသည်။
ယင်းကဲ့သို့ အမျိုးသားတစ်ဦး သေဆုံးရခြင်း နှင့် ပတ်သက်ပြီး MNDAA ဘက်မှ သတင်းထုတ်ပြန် ကြေညာထားခြင်း မလည်း မရှိပေ။
စစ်တပ်မှ နိုင်ငံတော် အာဏာသိမ်းယူပြီး နောက်ပိုင်းတွင် သျှမ်းပြည် အပါအဝင် နိုင်ငံ တစ်ဝှမ်းလုံး နိုင်ငံရေး မငြိမ်မသက်မှု ဖြစ်ပေါ်လာပြီး မတရား ဖမ်းဆီးသတ်ဖြတ်မှုများ၊ ခိုးဆိုးလုယက်မှုများလည်း ပေါများလာသည်။
ယင်းကဲ့သို့ အခြေအနေများကြောင့် ဒေသခံ ပြည်သူများက လုံခြုံရေး ကင်းမဲ့နေကြကြောင်းလည်း ပြောဆိုနေကြသည်။
Leave a Comments