သျှမ်းပြည် တာချီလိတ်မြို့ရှိ အခြေခံပညာ အထက်တန်းကျောင်းအတွင်း စောင့်ကြပ်နေသည့် စစ်ကောင်စီ တပ်သား၏ သေနတ်ကို ကျောင်းသားတစ်ဦးကို ပေးကိုင်ရာမှ ကျည်ထွက်သွားပြီး ကျောင်းသား၏ ခြေထောက်ကျည်ထိမှန်သွားကြောင်း စုံစမ်းသိရသည်။
ယမန်နေ့ (ဇွန်လ ၂၂) ရက် မွန်းတည့် ၁၂ နာရီဝန်းကျင်တွင် တာချီလိတ်မြို့ မကာဟိုခမ်းရပ်ကွက်အတွင်းရှိ အခြေခံပညာ အထက်တန်းကျောင်းအတွင်း စောင့်ကြပ်နေသည့် စစ်ကောင်စီတပ်သားတစ်ဦးသည် အရက်မူးပြီး ဒုတိယတန်းကျောင်းသားတစ်ဦးကို သေနတ်ပေးကိုင်ရာမှ ကျည်ထွက်သွားပြီး ကလေး၏ ခြေထောက်ကိုကျည်ထိမှန် သွားခဲ့ကြောင်း တာချီလိတ်မြို့ ဒေသခံတစ်ဦးက ပြောသည်။
“ဟုတ်တယ်။ ဂိတ်စောင့်က အရက်မူးပြီး သေနတ်မောင်းလွတ်သွားတာ။ ကလေးကို သူတို့တပ်ထဲ တစ်ခါတည်း ခေါ်သွားလို့တော့ ပြောတယ်။ ဆေးကုဖို့အတွက် ထင်တယ် “ ဟု ၎င်း ဒေသခံတစ်ဦးက ပြောသည်။
အဆိုပါ ဖြစ်စဉ် နှင့် ပတ်သက်ပြီး ကျောင်းသားမိဘများက စောင့်ကြပ်နေသည့် စစ်ကောင်စီတပ်သားတစ်ဦးသည် အရက်မူးပြီး ကျောင်းသားကို သေနတ်ပေးကိုင်ရာမှ ကျည်ထွက်သွားကြောင်း ဆိုကြပြီး အချို့က အရက်မူးပြီး ကျောင်းသားကလေးအား သေနတ်ဖြင့် ခြိမ်းခြောက်၍ သေနတ်မောင်းလွတ်ပြီး ကျည်ထွက်သွားကြောင်း ဆိုသည်။
ယင်းကဲ့သို့ စစ်ကောင်စီတပ်သားတစ်ဦး၏ မဆင်ခြင်မှုကြောင့် ကျောင်းသားကလေးငယ်တစ်ဦး ကျည်ထိမှန်ပြီး ဒဏ်ရာရသွားသည့် သတင်းကို စစ်ကောင်စီမှ အမှောင်ဖုံးရန် ကြိုးစားနေလျက်ရှိကြောင်း သိရသည်။
ထို့အပြင် တာချီလိတ်မြို့ရှိ ကျောင်းတွင် မလိုအပ်ဘဲ စောင့်ကြပ် စစ်သားများထားရှိခြင်းကြောင့် ကျောင်းသူ/ ကျောင်းသားများအတွက် အန္တရာယ်များကြောင်း တာချီလိတ်ဒေသခံ ကျောင်းသားမိဘတစ်ဦးက ထပ်လောင်းပြောသည်။
“ ဒီတာချီလိတ်ရဲ့ အနေအထားမှာတော့ ကျောင်းမှာ စောင့်ကြပ်စစ်သားတွေ ထားတာမလိုပါဘူး။ အခုလို ဖြစ်တော့ ဘယ်ကောင်းမလဲ။ သောက်စားပြီးသေနတ်ကိုင်တာ ကလေးအတွက် အန္တရာယ်များတယ် “ ဟု ကျောင်းသားမိဘတစ်ဦးက ထပ်လောင်းပြောသည်။
ကျည်ထိမှန်သွားသည့် ကလေးမှာ ဒုတိယတန်း (ဃ) တွင် ပညာသင်ကြားနေသော အသက် (၈) နှစ်အရွယ် ကျောင်းသား မောင်အောင်ထက်ကိုကို ဖြစ်ကြောင်း Tachileik News Agency သတင်းဌာနတွင် ရေးသားဖော်ပြထားသည်။
Leave a Comments