သျှမ်းပြည် သိန္နီမြို့နယ် ဟိုမိန်းရွာမှ ၂ မိုင်ခန့် ကွာဝေးသော ဟိုမျှင်လမ်းတွင် ထော်လာဂျီတစ်စီး တိမ်းမှောက်ကာ အမျိုးသမီး ၁ ဦး သေဆုံးပြီး လူ ၃ ဦး ထိခိုက်ဒဏ်ရာ ရရှိခဲ့ကြောင်း စုံစမ်းသိရသည်။

ယမန်နေ့ (ဇွန်လ ၂၁) ရက် နံနက်ပိုင်း ၈ နာရီတွင် သိန္နီမြို့နယ် ဟိုမိန်းရွာမှ ၂ မိုင်ခန့် ကွာဝေးသော ဟိုမျှင်လမ်းတွင် ထော်လာဂျီတစ်စီး တိမ်းမှောက်မှုဖြစ်ကာ အမျိုးသမီး ၁ ဦး သေဆုံးပြီး၊ လူ ၃ ဦး ထိခိုက်ဒဏ်ရာ ရရှိခဲ့ကြောင်း ၎င်းကိုသွားရောက်ကူညီခဲ့သည့် အနှိုင်းမဲ့ကုသိုလ် လူမှုကူညီရေးအသင်းမှ ပြောသည်။

“ ဟိုမိန်း – ဟိုမျှင်ကြားထဲက လမ်းမှာ ဖြစ်သွားတာဗျ။ ရွာကနေပြီး ခြံသွားမယ်လို့တော့ ပြောတယ်။ သူတို့ ခြံသွားတဲ့ လမ်းမှာပဲ မတော်မဆ ယာဉ်တိမ်းမှောက် ဖြစ်သွားတာ။ ထော်လာဂျီပေါ်က လူ ၄ ဦးပါတယ်။ ၃ ယောက်ကတော့ ဘာမှမဖြစ်ဘူး။ တစ်ယောက်တော့ ဆုံးသွားပြီ။ ဦးခေါင်းမှာ ထိခိုက်ဒဏ်ရာ ရပြီး ဆုံးသွားတာ။ ဆုံးတဲ့သူက အသက် ၆၀ ကျော် အမျိုးသမီးပါ “ ဟု ၎င်း တာဝန်ခံတစ်ဦးက ပြောသည်။

အဆိုပါ ယာဉ်တိမ်းမှောက်မှုကြောင့် သေဆုံးသွားသူသည် အသက် ၆၇ နှစ်အရွယ်ရှိ ဒေါ်ရွက်အောင် ဖြစ်ကြောင်း ၎င်းလူမှုကူညီရေးအသင်းက လူမှုကွန်ရက်စာမျက်နှာပေါ်တွင် ရေးသားဖော်ပြထားသည်။

လက်ရှိကာလမှာ တောင်ယာလုပ်ကိုင်သည့် အချိန်ဖြစ်သဖြင့် ဒေသခံတောင်သူများသည် လယ်ယာသို့ ထော်လာဂျီသွားလာကြရာ လမ်းပန်းဆက်သွယ်ရေး၊ လမ်းအခြေအနေ မကောင်းသောကြောင့် မတော်တဆ ယာဉ်တိမ်းမှောက်ဖြစ်ပွားနေလျက်ရှိကြောင်း သိရသည်။

ပြီးခဲ့သည့် ဇွန်လ ၁၄ ရက်တွင် နောင်ချို – ရပ်စောက် ကားလမ်းမပေါ်ရှိ သရက်ကုန်းရွာ အနီး၌ ပြောင်းဖူး တင်ဆောင်လာသည့် ကုန်တင်ကားတစ်စီး မတော်တဆ ယာဉ်တိမ်းမှောက်မှုဖြစ်ပြီး ယာဉ်မောင်းသူ အမျိုးသားတစ်ဦး ပွဲချင်းပြီး သေဆုံးသွားခဲ့ရသည်။