သျှမ်းပြည် ညောင်ရွှေမြို့နယ် အင်းလေးဒေသ ရွာမကျေးရွာ နေထိုင်သူ အမျိုးသားတစ်ဦးသည် လူမှုကွန်ရက်စာမျက်နှာပေါ်၌ နှင်းဆီပန်း ပုံတင်သောကြောင့် ဖမ်းဆီးခံလိုက်ရကြောင်း စုံစမ်းသိရသည်။
ယမန်နေ့ ဇွန်လ ၁၉ ရက် ဒေါ်အောင်ဆန်းစုကြည်၏ မွေးနေ့တွင် ပြည်တွင်း၊ ပြည်ပ ပြည်သူလူထုမှ မွေးနေ့အတွက် ဆုတောင်းစကားပေးခြင်း၊ ပန်း ပန်ဆင်ခြင်း ပြုလုပ်ခဲ့ကြရာ အင်းလေးရွာမ မှ အသက် ၆၀ အရွယ် အမျိုးသားတစ်ဦးကလည်း ၎င်း၏ လူမှုကွန်ရက်စာမျက်နှာပေါ် နှင်းဆီပန်း ပုံတင်သောကြောင့် စစ်ကောင်စီက အိမ်တွင်းလာရောက်ဖမ်းဆီးခဲ့ကြောင်း အမည်မဖော်လို ဒေသခံတစ်ဦးက ပြောသည်။
“ဖမ်းခံရတဲ့သူက အမျိုးသားပါဗျ။ အသက်က ၆၀ လောက်ရှိပြီ။ လူမှုကွန်ရက်ပေါ်မှာ နှင်းဆီပန်း ပုံတင်လို့ ဖမ်းခံရတယ်လို့ ပြောတယ်။ နေ့လယ် ၁၂ နာရီ လောက်က မော်တော်စက်လှေ နှစ်စီး နဲ့ လာပြီး ညနေ ၃ နာရီလောက်ကျ နန်းပန်စခန်းကို ခေါ်သွားတယ်။ စစ်ဝတ်နဲ့တော့ မဟုတ်ဘူး။ အရပ်ဝတ်နဲ့လာဖမ်းတာ “ ဟု ၎င်း ဒေသခံတစ်ဦးက ပြောသည်။
အဆိုပါ ဖမ်းဆီးခံရသူသည် အသက် ၆၀ နှစ် အရွယ်ရှိ ဦးစိုးမြင့်ဦး ဖြစ်ပြီး လက်ရှိမှာ နန်းပန်ရဲစခန်းတွင် ချုပ်နှောင်ခံထားရကြောင်း သိရသည်။
ထို့အပြင် စစ်ကောင်စီသည် ဒေါ်အောင်ဆန်းစုကြည်၏ မွေးနေ့ပွဲအတွက် ပန်း ပန်ဆင်သူ၊ ပန်း ပုံတင်ထားသူများကို လိုက်လံ ဖမ်းဆီးခြင်း နှင့် ပတ်သက်ပြီး လူမဆန်သည့် လုပ်ရပ်ဖြစ်ကြောင်း ၎င်း အမည်မဖော်လို ဒေသခံတစ်ဦးက မှတ်ချက်ပြုသည်။
“အခုလို လုပ်တာတော့ လူမဆန်တဲ့ လုပ်ရပ်လို့ မြင်ပါတယ်။ ဒီလို ပန်းပုံတင်တာတောင်မှ ဖမ်းတယ်ဆိုတော့ သူတို့ပြောတဲ့ ဖက်ဒရယ်ဆိုတာ လုံးဝ မဖြစ်နိုင်ဘူးလို့ ခံစားမိတယ်။ တရားမျှတမှုဆိုတာ မရှိသရွှေ့ စစ်မှန်တဲ့ ဒီမိုကရေစီဆိုတာလည်း မဖြစ်နိုင်ပါဘူး“ ဟု ၎င်းက မှတ်ချက်ပြုသည်။
အလားတူ ကလေးမြို့ မြို့မဈေးအတွင်း ပန်းရောင်းသည့် ဈေးသည်အပါအဝင် ပန်းပန်သူ (၂၀) ကျော်နှင့် ပန်းပဲတန်းမြို့နယ်ရှိ သမာဓိရွှေဆိုင်မှ အမျိုးသမီးဝန်းထမ်း ၁၃ ဦးကို ပန်းသပိတ်ပြုလုပ်မှုကြောင့် ဆိုကာ စစ်ကောင်စီတပ်မှ ဖမ်းဆီးခေါ်ဆောင်သွားခဲ့ကြောင်း သိရသည်။
