သျှမ်းပြည် ကျိုင်းတုံမြို့နယ် ပန်လီကျေးရွာအတွင်း နေထိုင်သည့် သားအမိနှစ်ဦးသည် စကားများရာမှ ကိုယ်ထိလက်ရောက် ဖြစ်ပွားကာ မိခင်ဖြစ်သူ သေဆုံးသွားကြောင်း စုံစမ်းသိရသည်။

ယမန်နေ့ ဇွန် ၁၂ ရက် ညပိုင်း အချိန်တွင် ကျိုင်းတုံမြို့နယ် ပန်လီကျေးရွာအတွင်း နေထိုင်သည့် သားအမိနှစ်ဦးသည် စကားများ ရန်ဖြစ်ရာမှ သားဖြစ်သူက အသက် ၆၀ နှစ်အရွယ် မိခင်ဖြစ်သူ၏ ဦးခေါင်းကို တုတ်ဖြင့် ရိုက်နှိက်ခဲ့ကာ သေဆုံးသွားခဲ့ကြောင်း ၎င်းကို သွားရောက်ကူညီခဲ့သည့် လူမှုကူညီရေးအသင်းထံမှ သိရသည်။

“သူက မူးယစ်ဆေးဝါး သုံးတယ်လို့တော့ ပြောတယ်။ သူတို့ သားအမိ နှစ်ယောက်ထဲ အတူနေကြတာ။ သူ့အမေရဲ့ ခေါင်းကို တုတ်နဲ့ရိုက်တာ။ ကျနော်တို့ ရောက်သွားတဲ့အချိန်က ရွာသားတွေ၊ ရဲတွေ သူ့ကို ချုပ်ထားပြီ။ သူ့အမေတော့ အသက် ၆၀ ကျော်နေပြီ။ အခုဖြစ်သွားတာတော့ မူးယစ်ဆေးကြောင်လို့ သူ့အမေကို ပြန်သတ်တာပေါ့ “ ဟု ၎င်းက ပြောသည်။

အဆိုပါ ပြစ်မှုကျူးလွန်သူ အသက် ၃၀ နှစ်အရွယ် အာမုတ် ကို ရဲတပ်ဖွဲ့မှ လာရောက်ဖမ်းဆီး ခေါ်ဆောင်သွားပြီး ရဲစခန်းတွင် ချုပ်နှောင်ထားကြောင်း သိရသည်။

လူသတ်မှု အပြစ်ကျူးလွန်သူ အာမုတ်ကိုတော့ လက်ရှိမှာ မည်သည့် ဉပဒေဖြင့် တရားစွဲဆိုရန် အသေးစိတ် မသိရှိရသေးပေ။

ထို့အပြင် စစ်တပ်က အာဏာသိမ်းပြီး နောက်ပိုင်း သျှမ်းပြည်တွင် မူးယစ်ဆေးဝါးကြောင့် အမျိုးသမီး အိမ်တွင်း အကြမ်းဖက်ခံရခြင်း၊ မူးယစ်ဆေးဝါး အလွန်အကျွံ သုံးစွဲမှုကြောင့် ပိုင်ရှင်မဲ့ အလောင်းများ မကြာခဏ တွေ့နေရကြောင်း သိရသည်။