သျှမ်းပြည် ကျောက်မဲခရိုင် နမ္မတူမြို့နယ်အတွင်းရှိ စစ်ကောင်စီ လက်အောက်ခံ အခြေခံပညာ မူလတန်းကျောင်း နှင့် အလယ်တန်းကျောင်း တို့ကို တအာင်း (ပလောင်) အမျိုးသား လွတ်မြောက်ရေးတပ်မတော် PSLF/TNLA တပ်ဖွဲ့က ပိတ်ခိုင်းကြောင်း စုံစမ်းသိရသည်။
ပြီးခဲ့သည့် ဇွန်လ ၉ ရက် မှ စတင်ကာ နမ္မတူမြို့နယ် ဆိုင်းခေါင် ၊ မန်စံကျေးရွာအုပ်စု၊ နားဆိုင်းကျေးရွာ အုပ်စု၊ ပန်ချင် ကျေးရွာအုပ်စု တို့ရှိသည့် အခြေခံပညာရေးကျောင်းများကို PSLF/TNLA က ပိတ်ခိုင်းကြောင်း ဒေသခံများက သျှမ်းသံတော်ဆင့်ကို ပြောသည်။
“တချို့ ရွာကိုတော့ လူကိုယ်တိုင် သွားပြောတာရှိတယ်။ တချို့ ရွာကိုတော့ ဖုန်းဆက်ပြီးပြောတာလည်း ရှိတယ်။ ၉ ရက်နေ့ကနေ စပြီး ကျောင်းတွေကို ပိတ်ပေးရမယ်တဲ့။ စစ်ကောင်စီက ခန့်တဲ့ ဆရာ/ဆရာမ တွေနဲ့ ကျောင်းဖွင့် လို့မရဘူး၊ စစ်ကောင်စီရဲ့ လက်အောက်ခံ ပညာရေးစနစ်ကို လက်မခံလို့ ပိတ်ခိုင်းတာလို့ ပြောတယ်” ဟု နမ္မတူမြို့နယ် အတွင်းက တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
PSLF/TNLA တပ်ဖွဲ့သည် ဖုန်းမှ တစ်ဆင့် ကျေးရွာအုပ်စု အသီးသီး၏ သက်ဆိုင်ရာ ရွာလူကြီး / ရွာအုပ်ချုပ်ရေး မှူး ထံသို့ ဖုန်းဆက် အကြောင်းကြားကာ ကျောင်းကို ပိတ်ခိုင်းခြင်းဖြစ်ကြောင်း သိရသည်။
TNLA တပ်ဖွဲ့မှ ပိတ်ခိုင်းသည့် စာသင်ကျောင်းများတွင် ဆိုင်းခေါင်ကျေးရွာအုပ်စုမှ မူလတန်းကျောင်း ၁ ကျောင်း၊ မန်စံကျေးရွာ အုပ်စုမှ အလယ်တန်းကျောင်း ၁ ကျောင်း ၊ ပန်ချင်ကျေးရွာ အုပ်စုမှ မူလတန်းကျောင်း ၁ ကျောင်း နှင့် နားဆိုင်းကျေးရွာအုပ်စု မှ အထက်တန်းကျောင်း တစ်ကျောင်းတို့ ဖြစ်ကြကြောင်းလည်း ဒေသခံများက သျှမ်းသံတော်ဆင့်ကို ပြောသည်။
“ကျောင်းတွေ ဖွင့်လာတာ တစ်ပတ်တောင် မပြည့်သေးဘူး။ သူတို့က ပိတ်ခိုင်းတယ်။ ကျောင်းပိတ်ရရင် ကလေးတွေလည်း စာသင်ခွင့် ဆုံးရှုံးမှာပေါ့၊ ပိုက်ဆံ တတ်နိုင်တဲ့သူတွေက ကျောင်းပြောင်းပြီး ထားနိုင်ပေမဲ့ မတတ်နိုင်တဲ့ ကလေးတွေကျတော့ ရွာက ကျောင်းတွေကိုပဲ အားကိုးရမှာပဲ။ ဒါပေမဲ့ အခုလို ကျောင်းကို ပိတ်ခိုင်းတော့ ကလေးတွေ နစ်နာတာပေါ့နော်” ဟု အသက် ၅၀ ဝန်းကျင် ကျောင်းသား ဖခင်တစ်ဦးကလည်း သျှမ်းသံတော်ဆင့်ကို ပြောသည်။
စာသင်ကျောင်း ပိတ်ခိုင်းမှုကြောင့် ဒေသအတွင်းမှ စာသင်သည့်အရွယ် ကျောင်းသား/ကျောင်းသူ စုစုပေါင်း ၃၀၀ နီးပါး စာသင်ခွင့် ဆုံးရှုံးရကြောင်း ဒေသခံများက သျှမ်းသံတော်ဆင့်ကို ပြောသည်။
ယင်းကဲ့သို့ နမ္မတူမြို့နယ်အတွင်းက စာသင်ကျောင်းများကို ပိတ်ခိုင်းခြင်း နှင့် ပတ်သက်ပြီး PSLF/ TNLA တပ်ဖွဲ့၏ ပြောရေးဆိုခွင့် နှင့် ပြန်ကြာရေး ဌာနများသို့ ဆက်သွယ်သော်လည်း အဆက်အသွယ်မရခဲ့ပေ။
