သျှမ်းပြည် ကွတ်ခိုင်မြို့နယ်၊ မိုင်းယုလေး ကျေးရွာအတွင်းရှိ အလယ်တန်း စာသင်ကျောင်း တစ်ကျောင်းကို ကချင်လွတ်လပ်ရေး တပ်မတော် ( KIA) က စာသင်ခွင့် ပိတ်သိမ်းလိုက်ခြင်း ဖြစ်ကြောင်း သတင်းရရှိသည်။
ပြီးခဲ့သည့် ဇွန်လ ၅ ရက်မှ စပြီး ကွတ်ခိုင်မြို့နယ် မိုင်းယုလေး ကျေးရွာရှိ အလယ်တန်းကျောင်းကို KIA တပ်သား ရောက်လာပြီး စစ်ကောင်စီခန့် ဆရာ/ဆရာမများကို စာသင်ခွင့်မပေးကြောင်း နှင့် စာသင်ကျောင်း ဖွင့်လိုပါက CDM ဆရာ/ဆရာမများကိုသာ ခေါ်ယူသင်ခွင့်ပေးကြောင်း ဒေသခံများက သျှမ်းသံတော်ဆင့်ကို ပြောသည်။
“စာသင်ကျောင်းကို ပိတ်ခိုင်းတာက စစ်ကောင်စီ လက်အောက်ခံ ပညာရေး စနစ်ဖြစ်နေလို့တဲ့၊ စာသင်ကျောင်း ဖွင့်ချင်ရင် CDM ဆရာ/ဆရာမတွေပဲ ခေါ်သင်တဲ့၊ လစာကိုလည်း ရွာသားတွေစုပြီး ပေးခိုင်းတာ။ အခုတော့ သူတို့ ပိတ်ခိုင်းလို့ ကျောင်းသား/ သူ ၃၀၀ ကျော်က စာသင်ခွင့် မဲ့နေကြတယ်” ဟု ကွတ်ခိုင်မြို့နယ် ဒေသခံ အမျိုးသမီး တစ်ဦးက သျှမ်းသံတော်ဆင့်ကို ပြောသည်။
အဆိုပါ KIA ပိတ်ခိုင်းသည့် မိုင်းယုလေးမှ စာသင်ကျောင်းသည် ပြီးခဲ့သည့် ဇွန်လ ၃ ရက်မှသာ စတင် ဖွင့်လှစ်လာခဲ့ခြင်း ဖြစ်ကြောင်း သိရသည်။
လက်ရှိတွင် ကျေးရွာနေ ဒေသခံများ နှင့် ကျောင်းကော်မတီ ရပ်မိရပ်ဖများ စုပေါင်းကာ စာသင်ကျောင်း ပြန်လည်ဖွင့်လှစ်ရေးအတွက် KIO/KIA ကို အသနားခံစာ တင်ပြတောင်းဆိုမည် ဖြစ်ကြောင်းလည်း အထက်ပါ အမျိုးသမီးက ဆက်ပြောသည်။
“ကျောင်းဆက်လက် ဖွင့်နိုင်ဖို့ ကျမတို့ကနေ သူတို့ကို သွားပြီး တောင်းဆိုမှာပါ။ အရင်နှစ်ကလည်း သူတို့က မဖွင့်ချင်၊ ဖွင့်ချင်နဲ့ တစ်နှစ်ပြီးအောင်တော့ ဖွင့်ခဲ့ရတယ်။ ဒီနှစ်သာ ကျောင်းမဖွင့်ရရင်လည်း ကလေး ၃၀၀ ကျော်က ပညာသင်ခွင့် မဲ့သွားတယ်လေ။ ပိုက်ဆံရှိတဲ့သူတွေက ကျောင်းပြောင်းလို့ ရနိုင်ပေမဲ့ တချို့အတွက်က တစ်နေ့လုပ် တစ်နေ့စားဆိုရင် မတတ်နိုင်ဘူး” ဟု အထက်ပါ အမျိုးသမီးက သျှမ်းသံတော်ဆင့်ကို ဆက်ဆိုသည်။
မိုင်းယုလေး အလယ်တန်းကျောင်းသို့ လာတက်ရောက်သည့် ကျောင်းသူ/သားများသည် ပန်လော့ကျေးရွာအုပ်စု နှင့် မိုင်းယုလေး ကျေးရွာအုပ်စုတို့မှ ဒေသခံ ကျောင်းသား လူငယ်များ ဖြစ်ကြကြောင်း သိရသည်။
မိုင်းယုလေးကျေးရွာအတွင်းမှ အလယ်တန်းကျောင်းကို ပိတ်ခိုင်းခြင်း နှင့် ပတ်သက်ပြီး ကချင်လွတ်လပ်ရေး တပ်ဖွဲ့၏ ပြောရေးဆိုခွင့် ဖြစ်သူ ဗိုလ်မှူးကြီး နော်ဘူကို ဖုန်းဖြင့် ဆက်သွယ်သော်လည်း ဖုန်းလက်ခံ ဖြေကြားခြင်း မရှိပေ။
မိုင်းယုလေး ကျေးရွာအုပ်စုအတွင်းတွင် မူလတန်းကျောင်း စုစုပေါင်း ၆ ကျောင်း ရှိနေပြီး အလယ်တန်း ကျောင်း တစ်ကျောင်းတည်းသာ ရှိနေကြောင်း ၊ မိုင်းယုလေးကျေးရွာအုပ်စုအတွင်း ကျေးရွာပေါင်း ၁၃ ရွာ ရှိနေပြီး ကွတ်ခိုင်မြို့ နှင့် မိုင်ပေါင်း ၂၀ နီးပါး ကွာဝေးသည့် ကျေးရွာဖြစ်သည်။
ကွတ်ခိုင်မြို့နယ် စစ်ကောင်စီတပ်ဖွဲ့ နှင့် ၎င်းတို့၏ လက်အောက်ခံ ပြည်သူ့စစ်တပ်ဖွဲ့များအပြင် တိုင်းရင်းသား လက်နက်ကိုင် တပ်ဖွဲ့များ ဖြစ်ကြသည့် TNLA တပ်ဖွဲ့၊ MNDAA ကိုးကန့်တပ်ဖွဲ့၊ ကချင်တပ်ဖွဲ့ KIA နှင့် သျှမ်းပြည် တပ်မတော် SSPP/SSA တို့က သွားလာလှုပ်ရှားနေကြသည်။
