သျှမ်းပြည် လွိုင်လင်ခရိုင် ပင်လုံမြို့ မှ တူးဖော်လာသည့် ကျောက်မီးသွေးကားများသည် စနစ်တကျ ဖုံးအုပ်သွားလာခြင်းမရှိသည့်အတွက်ကြောင့် လမ်းမကြီးပေါ်တွင် ပြန့်ကြဲနေကြောင်း သတင်းရရှိသည်။
ပင်လုံမြို့ မြောက်ဘက်ရှိ ကျောက်မီးသွေးတွင်းကို တူးဖော်နေသည့် ဟေဟိန်းကုမ္ပဏီ နှင့် ငွေပင်လုံကုမ္ပဏီတို့သည် ကျောက်မီးသွေးကို တင်ပို့ရာတွင် သေချာဖုံးအုပ်ထားခြင်းမရှိဘဲ မြို့အတွင်းသို့ ဖြတ်သန်းသွားလာနေကြောင်း သိရသည်။
မြို့အတွင်းတွင်လည်း လျင်မြန်စွာ ဖြတ်မောင်းသွားကြောင်း ပင်လုံမြို့ ဒေသခံ အမျိုးသားတစ်ဦးက ပြောသည်။
“ သူတို့ မြို့ထဲကိုလာတဲ့အချိန်ကျရင် အရှိန်ကို စည်းမဲ့ကမ်းမဲ့မောင်းတယ်။ ကျောက်မီးသွေးကို သယ်လာတာက ဘေးမှာ အကာမရှိဘူး ။ အမိုးတွေ မကာထားဘူး။ အဲ့တာ ကျောက်မီးသွေးတွေက လမ်းပေါ်မှာ အများကြီး ပြုတ်ကျတယ်။ ပြုတ်ကျတော့ သူ့နောက်ကနေ ကားတွေကျော်ရင် ကားပေါ်ပြုတ်ကျတာတွေဖြစ်တယ်” ဟု ၎င်းက ပြောသည်။
ထိုသို့ သေချာစွာ ဖုံးအုပ်ထားခြင်းမရှိပဲ မြို့တွင်းသွားလာချိန်တွင် လမ်းမကြီးပေါ်တွင် ကျောက်မီးသွေး ပြုတ်ကျသည့်အတွက်ကြောင့် ဆိုင်ကယ်သမားများအတွက် သွားလာရန် အခက်ခဲဖြစ်ပြီး ယာဉ်တိုက်မှုလည်း ဖြစ်ပွားခဲ့ကြောင်း သိရသည်။
ထိုအပြင် တာဝန်ရှိ ဌာနဆိုင်ရာ အဖွဲ့စည်းများကလည်း တာဝန်ယူဖြေရှင်းပေးခြင်း မရှိကြောင်း သိရသည်။
“ကျောက်မီးသွေးကားတွေက သေချာလည်း မဖုံးထားဘူး။ ပြီးတော့ အရှိန်တင်ပြီး မောင်းတော့ ပင်လုံမြို့ထဲမှာ မကြာမကြာ ယာဉ်တိုက်မှုဖြစ်တယ်။ စစ်ကောင်စီတပ်တွေကလည်း စစ်ဆေးရေးဂိတ်တွေမှာတော့ လက်ဖက်ရည်ဖိုးတော့ တောင်းနေတာရှိတယ်။ ဒီကျောက်မီးသွေးတွေကိုတော့ မြို့ထဲသွားရင် သေချာသယ်ဖို့ စနစ်တကျသယ်ဖို့ လူတွေကို အန္တရာယ်မဖြစ်အောင် သယ်ဖို့တော့ ဘယ်သူမှ ကြီးကြပ်ပြီးတော့ စစ်ဆေးနေတာမျိုးမရှိဘူး” ဟု ပင်လုံမြို့ ဒေသခံတစ်ဦးက ပြောသည်။
အဆိုပါ ကျောက်မီးသွေးတင်ကားသည် တွဲကား ၂၂ ဘီး ဖြစ်ပြီး ပင်လုံမြို့ မှတစ်ဆင့် တောင်ကြီး ၊ မန္တလေး ၊ ကျောက်ဆည်တို့ ပို့ဆောင်ပေးနေလျက်ရှိကြောင်း သိရသည်။
