သျှမ်းပြည် တောင်ကြီးမြို့ ဘုရားဖြူရပ်ကွက် နယ်မြေ (၂) အတွင်းရှိ နေအိမ်တစ်လုံး ဖယောင်းတိုင် မီးထွန်းထားရာမှတစ်ဆင့် နေအိမ်မီးလောင်မှု ဖြစ်ပွားခဲ့ကြောင်း စုံစမ်းသိရသည်။
ယမန်နေ့ (ဇွန်လ ၆) ရက် ညပိုင်း ၈ နာရီဝန်းကျင်တွင် ဘုရားဖြူရပ်ကွက် နယ်မြေ (၂) အတွင်းရှိ နေအိမ်တစ်လုံး ဖယောင်းတိုင်မီးထွန်းထားရာမှတစ်ဆင့် နေအိမ်အတွင်း မီးလောင်မှုဖြစ်ပွားခဲ့ပြီး အိမ်တွင်းရှိ ကလေးငယ်အပါအဝင် မိသားစုဝင် ၈ ဦး ထွက်ပြေးလွှတ်မြောက်နိုင်ခဲ့ကြောင်း မီးလောင်အိမ်ကို သွားရောက်မီးငြိမ်းသတ်ခဲ့သည့် မီးသတ်တပ်ဖွဲ့ထံမှ သိရသည်။
“ ဖယောင်းတိုင် မီးထွန်းထားရာကနေ မီးလောင်တာပေါ့။ အဲ့ချိန်လူလည်းရှိတယ်၊ ထိခိုက်ဒဏ်ရာ ရတာကတော့ မရှိဘူး။ ပျက်စီးဆုံးရှုံးမှု တန်ဖိုးကတော့ သိန်း ၂၀ လောက်ရှိတယ်။ အဓိက မီးလောင်သွားတာတော့ အိမ်တွင်း ပစ္စည်း၊ ပရိဘောဂ ၊ အိပ်ယာတွေ လောင်သွားတယ်။ အိမ်ထဲမှာ ကလေးအပါအဝင် လူက ၈ ယောက်လောက်ရှိတယ် “ ဟု တောင်ကြီး ကြက်ခြေနီ မီးသတ်ဖွဲ့မှ တာဝန်ခံတစ်ဦးက ပြောသည်။
အဆိုပါ မီးလောင်မှုကြောင့် နေအိမ်အတွင်းရှိ အိမ်တွင်းပစ္စည်းများ မီးလောင်သွားခဲ့ပြီး မီးပေါ့ဆမှုကြောင့် အိမ်ပိုင်ရှင်ကို အမှတ် ၁ မြို့မရဲစခန်း၌ အမှုဖွင့်ထားကြောင်း သိရသည်။
ထို့အပြင် မီးလောင်မှု ထပ်မံ မဖြစ်ပွားစေဖို့အတွက် မိဘပြည်သူများအနေဖြင့် အိမ်တွင်း မီးကိုထွန်းထားခြင်း မပေါ့ဆစေရန်၊ ကလေးငယ်များကို မီးဘေးအန္တရာယ်နှင့် ပတ်သက်ပြီး ဗဟုသုတများ မျှဝေပေးရန် နှင့် မီးလောင်လွယ်သည့် အရာဝတ္တုများကို မထားရှိစေရန် ၎င်းကတိုက်တွန်းထားသည်။
Leave a Comments