သျှမ်းပြည် လားရှိုးခရိုင် လားရှိုးမြို့နယ်ရှိ အမှတ် (၂) ရဲစခန်း ပစ်ခတ်တိုက်ခိုက်ခံရပြီး နောက်ပိုင်း စစ်ကောင်စီ တပ်ဖွဲ့တို့က မြို့တွင်း စစ်ဆေးမှု တင်းကြပ်စွာ လုပ်ဆောင်လာကြောင်း စုံစမ်းသိရသည်။

ယမန်နေ့ ဇွန်လ ၆ ရက် နံနက်ပိုင်း မှ စတင်ကာ လားရှိုးမြို့ဝင်/ မြို့ထွက် နေရာများ နှင့် မြို့တွင်း လမ်းဆုံ လမ်းခွနေရာများ၌ အာဏာသိမ်း စစ်ကောင်စီ တပ်ဖွဲ့သည် စစ်အင်အားဖြင့် စစ်ဆေးမှုကို တင်းကြပ်စွာ လုပ်ဆောင်နေကြောင်း အမည်မဖော်လိုသူ အသက် ၃၀ ကျော် အမျိုးသား တစ်ဦးက သျှမ်းသံတော်ဆင့်ကို ပြောသည်။

“မြို့ဝင်နားက စစ်ဆေးရေးဂိတ်ဆိုရင် ပိုပြီးတော့ စစ်တာကြမ်းတယ်၊ မှတ်ပုံတင်တောင်းတယ်၊ ပြီးတော့ ဖုန်းကို ယူစစ်တယ်၊ Messenger တွေ Chat Box တွေ အကုန် စစ်ကြည့်တယ်။ ကားဆိုလည်း အောက်ပိုင်းထိ စစ်ကြည့်တာ။ အချိန်လည်း တော်တော်ယူတယ်” ဟု လားရှိုးမြို့တွင်း စစ်ဆေးကြမ်းနေမှုကို အသက် ၃၀ ကျော် အမျိုးသား တစ်ဦးက သျှမ်းသံတော်ဆင့်ကို ပြောသည်။

လားရှိုးမြို့တွင်း စစ်ဆေးရေးမှုများတွင် စစ်သားအပြင် ရဲများလည်း ပါရှိကြောင်း ဒေသခံများက ဆက်ပြော သည်။

ယင်းကဲ့သို့ စစ်ဆေးမှု တင်းကြပ်ခြင်းသည် ဇွန်လ ၅ ရက်တွင် ဖြစ်ပွားသည့် လားရှိုးမြို့ အမှတ် (၂) ရဲစခန်း နှင့် ရပ်ကွက် (၅) ရှိ စစ်ကောင်စီ ခြေမြန်တပ်ရင်း ၅၀၇ တို့ ပစ်ခတ်တိုက်ခိုက်ခံရမှုကြောင့် စစ်ကောင်စီ တို့က စစ်ဆေးမှုကို တင်းကြပ်စွာ လုပ်နေခြင်း ဖြစ်ကြောင်း ဒေသခံများက ဆက်ပြောသည်။

“မနေ့က လားရှိုးမြို့မှာပဲ သူတို့ စခန်း နှစ်နေရာ တိုက်ခိုက်ခံရတော့ လုံခြုံရေးပိုင်းကို ပိုပြီးတော့ တင်းကြပ် လာတဲ့ သဘောပေါ့။ အိတ်တွေ ဖုန်းတွေ အကုန်စစ်တော့ သူတို့လည်း တော်တော်ကြောက်သွားပုံရတယ်” ဟု အထက်ပါ လားရှိုး ဒေသခံက သျှမ်းသံတော်ဆင့်ကို ဆက်ပြောသည်။

ဇွန်လ ၅ ရက် နံနက်ပိုင်း ၃ နာရီဝန်းကျင်တွင် လားရှိုးမြို့လယ်၊ ကန်မိန်းကျောင်းအတွင်းသို့ ကိုးကန့်တပ်ဖွဲ့ (MNDAA ) က ဝင်ရောက်လာပြီး ရပ်ကွက် ၁၂ ရှိ စစ်ကောင်စီ လက်အောက်ခံ အမှတ် (၂) ရဲစခန်းကို ပစ်ခတ် တိုက်ခိုက်လိုက်ခြင်း ဖြစ်သည်။

ပြီးခဲ့သည့် ဇွန်လ ၄ ရက်တွင် သိန္နီမြို့နယ်အတွင်း နှင့် သိန္နီမြို့အဝင် တံတားနား၌ ကိုးကန့်တပ်ဖွဲ့ MNDAA နှင့် စစ်ကောင်စီတို့ ပစ်ခတ်မှု ဖြစ်ပွားခဲ့ကြောင်း သိရသည်။

စစ်ကောင်စီ နှင့် လားရှိုးမြို့တွင်း ထိတွေ့တိုက်ပွဲ ဖြစ်ပွားသည့် ကိုးကန့်တပ်ဖွဲ့ MNDAA သည် ပြီးခဲ့သည့် ဇွန်လ ၁ ရက် နှင့် ၂ ရက်အထိ ညီနောင်မဟာမိတ် သုံးဖွဲ့ နှင့်အတူ မိုင်းလားမြို့ ၌ စစ်ကောင်စီ လက်အောက်ခံ NSPNC နှင့် တွေ့ဆုံဆွေးနွေးမှု ရှိခဲ့သည်။

ထို့အပြင် စစ်ကောင်စီ တပ်ဖွဲ့သည် တစ်နှစ်ကြာ အပစ်ရပ်ထားကြောင်း ထုတ်ပြန်ကြေညာထားသော်လည်း လက်ရှိ အချိန်ထိ တိုင်းရင်းသားလက်နက်ကိုင်တပ်ဖွဲ့များကို ထိုးစစ်ဆင်တိုက်ခိုက်မှု ရှိနေဆဲ ဖြစ်သည်။