တရုတ်နိုင်ငံ၏ ကြားဝင်ပေးမှုကြောင့် ဖြစ်လာသည့် ညီနောင်မဟာမိတ် (၃) ဖွဲ့ နှင့် စစ်ကောင်စီ လက်အောက်ခံ NSPNC တို့ တွေ့ဆုံဆွေးနွေးမှုသည် သဘောတူညီချက် တစ်စုံတစ်ရာ မရှိဘဲ ပြီးဆုံးသွားခဲ့ကြောင်း စုံစမ်း သိရ သည်။

အဆိုပါ တွေ့ဆုံမှုသည် ဇွန်လ ၁ ရက်မှ ၃ ရက်နေ့အထိ ပြုလုပ်ရန် လျာထားသည့် စစ်ကောင်စီ လက်အောက်ခံ အမျိုးသား စည်းလုံးညီညွှတ်ရေး နှင့် ငြိမ်းချမ်းရေး ဖော်ဆောင်မှု ညှိနှိုင်းရေး ကော်မတီ (NSPNC) နှင့် ညီနောင်မဟာမိတ် (၃) ဖွဲ့ တွေ့ဆုံ ဆွေးနွေးမှုသည် ဇွန် ၂ ရက်နေ့ဖြင့် ပြီးဆုံးခဲ့သည်။

နှစ်ဖက်ဆွေးနွေးမှုမှ သဘောတူညီချက် တစ်စုံတစ်ရာ မရရှိသော်လည်း ပြေပြေလည်လည်ဖြင့်ပင် ဆွေးနွေးပွဲက ပြီးဆုံးသွားကြောင်း NDAA (မိုင်းလားတပ်ဖွဲ့) အတွင်းရေးမှူး ဦးကြည်မြင့်က သျှမ်းသံတော်ဆင့်ကို ပြောသည်။

“ကျနော် ကိုယ်တိုင်ကတော့ အစည်းအဝေး ခန်းမထဲကို အမြဲရှိနေတာတော့ မဟုတ်ဘူး။ ဒီဘက်က ကျနော်တို့ ကလည်း သူတို့ လုံခြုံရေးတွေ၊ နေထိုင်စားသောက်ရေးတွေကို အဓိက စီစဥ် ပေးပါတယ်။ ဆွေးနွေးပွဲကတော့ ပြေပြေလည်လည် ပြီးသွားပါတယ်” ဟု ဦးကြည်မြင့်က သျှမ်းသံတော်ဆင့်ကို ပြောသည်။

အဆိုပါ ဆွေးနွေးပွဲတွင် မိုင်းလားတပ်ဖွဲ့သည် ဆွေးနွေးပွဲ ဖြစ်မြောက်ရန် နေရာထိုင်ခင်း၊ စားသောက်ရေး နှင့် လုံခြုံရေး ကိစ္စကိုသာ အကျိုးဆောင်ပေးခြင်းဖြစ်ကြောင်း ဦးကြည်မြင့်က ပြောသည်။

စစ်ကောင်စီ လက်အောက်ခံ NSPNC နှင့် ဆွေးနွေးသည့် ညီနောင်မဟာမိတ် (၃) ဖွဲ့သည် ရက္ခိုင့် တပ်တော် (AA)၊ တအာင်း (ပလောင်) အမျိုးသားလွတ်မြောက်ရေး တပ်မတော် (TNLA)၊ မြန်မာအမျိုးသား ဒီမိုကရက်တစ် မဟာမိတ်တပ်မတော် (MNDAA) ကိုးကန့်တပ် တို့ဖြစ်ကြပြီး အမျိုးသား ဒီမိုကရေစီ မဟာမိတ်တပ်မတော် (NDAA) ထိန်းချုပ်သည့် မိုင်းလားမြို့တွင် ဇွန်လ ၁ ရက်မှစတင်ပြီး ၂ ရက်နေ့တွင် ဆွေးနွေးမှု ပြီးဆုံးခဲ့ခြင်း ဖြစ်သည်။

ယင်းကဲ့သို့ NSPNC နှင့် ညီနောင်မဟာမိတ်တို့ တွေ့ဆုံဆွေးနွေးမှု လျာထားသည့် ရက်မတိုင်ခင် ပြီးဆုံးခြင်း နှင့် ပတ်သက်ပြီး နိုင်ငံရေး လေ့လာသုံးသပ်သူ (ဦးရဲထွန်း) သီပေါက “အဓိက ကတော့ မြောက်ပိုင်းမဟာမိတ် (၃) ဖွဲ့ က လိုလိုလားလား ဆွေးနွေးချင်ပုံ မရဘူး။ တရုတ်တိုက်တွန်းမှုကို မလွဲသာလို့သာ အစည်းအဝေးလာတက် ရတယ်လေ” ဟု သုံးသပ်ပြောဆိုထားသည်။

NSPNC နှင့် ညီနောင်မဟာမိတ် (၃) ဖွဲ့ တွေ့ဆုံဆွေးနွေးမှုတွင် တရုတ်နိုင်ငံ ယူနန်ပြည်နယ် နိုင်ငံခြားရေးရာ အထူး သံတမန် မစ္စတာကောပေါင်လည်း ပါဝင်တက်ရောက်ခဲ့ကြောင်း သိရသော်လည်း တရုတ်သံတမန်က ဝင်ရောက် ဆွေးနွေးခြင်း ရှိ မရှိကိုမူ ရှင်းလင်းစွာ မသိရသေးပေ။

ယင်းတွေ့ဆုံမှု နှင့် ပတ်သက်ပြီး စစ်ကောင်စီမှ တင်ပြသည့် နိုင်ငံရေးဆိုင်ရာ ကိစ္စရပ်များကို ပြန်လည် မဆွေးနွေးခဲ့ သည့် အကြောင်း ရက္ခိုင့်တပ်တော် (AA) ပြောခွင့်ရ ဦးခိုင်သုခ က သတင်းမီဒီယာများကို ဖြေကြားထားသည်။

ယခုတကြိမ် တွေ့ဆုံဆွေးနွေးမှုသည် စစ်အာဏာသိမ်းပြီးနောက်ပိုင်း NSPNC နှင့် ညီနောင် မဟာမိတ် (၃) ဖွဲ့တို့၏ ပထမဆုံး အကြိမ် တွေ့ဆုံမှုလည်း ဖြစ်နေသည်။

ယင်းကဲ့သို့ ဆွေးနွေးမှု ပြုလုပ်နေစဥ် ကာလအတွင်းမှာပင် ညီနောင်မဟာမိတ် (၃) ဖွဲ့ တပ်ဖွဲ့ဝင် ဖြစ်သည့် ကိုးကန့် တပ်မတော် MNDAA နှင့် စစ်ကောင်စီတို့က လားရှိုးမြို့နယ်အတွင်း ထိတွေ့တိုက်ပွဲ ဖြစ်ပွားခဲ့သည်။