သျှမ်းပြည် လားရှိုးခရိုင် ၊ သိန္နီမြို့နယ်အတွင်း ယမန်နေ့ ဇွန် ၄ ရက် ည ၉ နာရီတွင် ကိုးကန့်တပ်ဖွဲ့ MNDAA နှင့် စစ်ကောင်စီတို့ ပစ်ခတ်မှုဖြစ်ပွားခဲ့ကြောင်း စုံစမ်း သိရှိရသည်။
ယမန်နေ့ ည ၉ နာရီအပြင် မနက် ၂ နာရီ ဝန်းကျင်တွင်လည်း သိန္နီမြို့အဝင် တံတားနားတွင် ပစ်ခတ်မှုထပ်မံ ဖြစ်ပွားခဲ့ကြောင်း သိရသည်။
“အတိကျပြောဖို့ကတော့ ခက်တယ်။ ကိုးကန့် နဲ့ စစ်တပ်က ပစ်ခတ်မှုဖြစ်တာ။ ကိုးကန့်ဘက်ကနေတော့ သူတို့ RPG လက်နက်ကြီး တစ်လုံး နဲ့ သေနတ်အိတ်တစ်ခုကျထားခဲ့တယ်တဲ့။ အဲ့ဒါကိုတော့ စစ်တပ်ကနေ ကောက်ယူသွားလိုက်ပြီ။ သိန္နီမြို့ အဝင်တံတားနားဖြစ်တာ။ ည ၉ နာရီက လက်နက်ကြီးသံကြားပြီးတော့ မနက် ၂ နာရီမှာ ထပ်ဖြစ်သေးတယ်” ဟု သိန္နီမြို့ ဒေသခံ အမျိုးသမီးတစ်ဦးက ပြောသည်။
အဆိုပါ ပစ်ခတ်မှု မဖြစ်ပွားစဉ်တွင် ကိုးကန့်တပ်ဖွဲ့ နှင့် PDF တို့က ပူးပေါင်းပြီး မြို့ဝင်တံတားနားတွင် မိုင်း လာထောင်ထားကြောင်း၊ ဗုံးပေါက်ကွဲမှု နှင့် ပစ်ခတ်မှုကြောင့် ထိုအနီးနား နေထိုင်သည့် ပြည်သူ့နေအိမ်တစ်ချို့ အနည်းငယ်ထိခိုက် ပျက်စီးမှုရှိကြောင်း သိရသည်။
“အစကတော့ ကိုးကန့်တပ်မတော် နဲ့ PDF တို့က ပူးပေါင်းပြီးတော့ တံတားနား ဗုံးလာထောင်တာတဲ့။ ခြိမ်းခြောက်တဲ့အနေနဲ့ မိုင်း လာထောင်ထားတာတဲ့။ လူထိခိုက်မှုတော့ မရှိဘူး။ အဲ့နားနေတဲ့ အိမ်တွေတချို့ရဲ့ နံရံတွေပဲ ပျက်စီးသွားတာ။ ဒီနေ့ထိတော့လည်း ပုံမှန်အတိုင်း ပြန်သွားလာလို့ရပါတယ်” ဟု သိန္နီမြို့ ဒေသခံ အမျိုးသားတစ်ဦးက ပြောသည်။
သိန္နီမြို့အဝင် တံတားနားတွင် မကြာခဏ ပစ်ခတ်မှု ဖြစ်ပွားလျက်ရှိသည့်နေရာဖြစ်ပြီး စစ်ကောင်စီ စစ်ဆေးရေးဂိတ်တည်ရှိထားသည့် နေရာဖြစ်သည်။
အလားတူ ယနေ့ ဇွန် ၅ ရက် နံနက် ၃ နာရီဝန်းကျင်တွင်လည်း လားရှိုးမြို့လယ်၊ ကန်မိန်းကျောင်းအတွင်းသို့ ကိုးကန့်တပ်ဖွဲ့ MNDAA က ဝင်ရောက်လာခဲ့ပြီး အမှတ် (၂) ရဲစခန်းကို ပစ်ခတ်တိုက်ခိုက်ခဲ့ကြောင်း သိရသည်။
