သျှမ်းပြည် မူဆယ်ခရိုင် နမ့်ခမ်းမြို့နယ်မှ ဒေသခံ ၄ ဦးသည် သျှမ်းပြည် အထူးဒေသ (၁) ကိုးကန့် ထိန်းချုပ်နယ်မြေ အတွင်း၌ ပျောက်ဆုံးသွားကြောင်း စုံစမ်းသိရသည်။

ပြီးခဲ့သည့် မေလ ၂၀ ရက်မှ စတင်ကာ နမ့်ခမ်းမြို့နယ် နောင်ခန်ရွာနေသည့် အမျိုးသား (၃) ဦး နှင့် အမျိုးသမီး (၁) ဦး တို့သည် သံတိုသံစများ ဝယ်ရန်ဟုဆိုကာ ကိုးကန့်ထိန်းချုပ်နယ်မြေ ဖြစ်သည့် လောက်ကိုင် ဘက်ထွက်သွားရာမှ ယနေ့အချိန်ထိ ပျောက်ဆုံးနေကြောင်း နီးစပ်သူ အမျိုးသမီး တစ်ဦးကို သျှမ်းသံတော်ဆင့်ကို ပြောသည်။

“သူတို့က အဲ့ဘက်ကို သံတိုသံစဝယ်ဖို့ မကြာခဏသွားလေ့ရှိပါတယ်။ မေလ ၂၀ ရက်မှာ နောက်ဆုံး အဆက် အသွယ်ရပြီး ပျောက်ဆုံးသွားတယ်။ ဒီနေ့အချိန်ထိ အဆက်အသွယ်မရသေးဘူး။ သူတို့ဆီမှာ တစ်ယောက်ကို ပိုက်ဆံ သိန်း ၂၀ ကျော်ကျော်လောက်တော့ ပါသွားတယ်၊ ပြီးတော့ ကားနှစ်စီးပေါ့” ဟု ပျောက်ဆုံးသူ နီးစပ်သူ အမျိုးသမီး တစ်ဦးက သျှမ်းသံတော်ဆင့်ကို ပြောသည်။

အဆိုပါ ပျောက်ဆုံးသူတို့သည် နောင်ခန်ကျေးရွာနေ စိုင်းသန်းကျော် နှင့် ဇနီး နန်ခမ်းလင်း၊ စိုင်းသန်းထွန်း နှင့် စိုင်းလဝန်းတို့ ဖြစ်ကြပြီး အဆက်အသွယ်မရ ပျော်ကဆုံးသည်မှာ ၁၀ ရက်ကျော် ရက် ၂၀ နီးပါး ရှိလာကြောင်း သိရသည်။

၎င်းတို့ ပျောက်ဆုံးမှု နှင့် ပတ်သက်ပြီး နီးစပ်သူများက ၎င်းတို့ သွားသည့် လမ်းကြောင်း တစ်လျောက် လိုက်ကြည့်ရာ ကုန်းကြမ်းခရိုင် လုံခန်ကျေးရွာရှိ စစ်ကောင်စီ စစ်ဆေးရေးဂိတ်၌ နောက်ဆုံးစာရင်း ပေးထားခြင်း တွေ့ရကြောင်းလည်း နီးစပ်သူ အမျိုးသားက ပြောသည်။

“ကျနော်တို့က သူတို့သွားတဲ့ လမ်းကြောင်း အလိုက် လိုက်ပြီး စုံစမ်းကြည့်တာ၊ လုံခန်ရွာမှာ ရှိတဲ့ စစ်ဆေးရေးဂိတ်မှာ ပေးထားတဲ့ စာရင်းက နောက်ဆုံးပဲ၊ အဲ့ရွာအလွန် ပေါင်(ဝ်)ပေါင်(ဝ်) ရွာဘက်ထိ ကျနော်တို့ ဆက်လိုက်ပေမဲ့ သတင်းက မရတော့ဘူး၊ အဲ့ဘက်ကျတော့ တရုတ်အများစုနေတဲ့ ရွာဖြစ်သွားတယ်” ဟု ၎င်းက ဆိုသည်။

၎င်းတို့ လေးဦး ပျောက်ဆုံးသွားသည့် နေရာသည် ကိုးကန့်တပ်ဖွဲ့ ထိန်းချုပ်နယ်မြေ ဖြစ်ပြီး ဖုန်းလိုင်း၊ အင်တာနက်လိုင်းလည်း အမြဲမရသည့် နေရာဖြစ်သည့်အတွက် ပိုပြီး စိုးရိမ်နေရကြောင်း သိရသည်။

လက်ရှိတွင် အဆိုပါ ပျောက်ဆုံးသူများ၏ မိသားစုဝင်များက ၎င်းတို့၏ လုံခြုံရေး အတွက် စိုးရိမ်ပူပန်လျက်ရှိပြီး လက်နက်ကိုင် တပ်ဖွဲ့တစ်ခုခု ဖမ်းဆီးထားပါက အကြောင်းကြားပေးရန် တောင်းဆိုလိုကြောင်းလည်း တောင်းဆိုထားကြသည်။

ပျောက်ဆုံးသူများကို တွေ့ရှိပါက ဖုန်းနံပါတ် ၀၉ ၈၈၁ ၄၇၆ ၂၂၆ ဖုန်းနံပါတ်သို့ ဆက်သွယ် အကြောင်းပေးစေလိုကြောင်းလည်း မိသားစုဝင်များက တောင်းဆိုထားသည်။