Monday, July 22, 2024

နမ့်လန်မြို့တွင်း SSPP/SSA တပ်ဖွဲ့ တပ်သားစုဆောင်းရာတွင် အမျိုးသားမတွေ့ပါက အမျိုးသမီးကို ဖမ်းဆီးခေါ်ဆောင်သွား

Must read

သျှမ်းပြည် ကျောက်မဲခရိုင် နမ့်လန်မြို့တွင်း ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) တပ်ဖွဲ့သည် တပ်သားသစ်စုဆောင်းရာ နေအိမ်ထဲ အမျိုးသား မတွေ့ရှိပါက အမျိုးသမီးကိုပါ ဖမ်းဆီးသွားကြောင်း စုံစမ်းသိရှိရသည်။

နမ့်လန်မြို့

ပြီးခဲ့သည့် မေလ ၂၇ ရက်တွင် နမ့်လန်မြို့ ပန်ဟိုက်ကျေးရွာထဲသို့ SSPP/SSA တပ်ဖွဲ့မှ တပ်သားသစ်လာရောက် ခေါ်ဆောင်ရာ နေအိမ်ထဲတွင် အမျိုးသား မတွေ့ရှိသဖြင့် အမျိုးသမီးတစ်ဦးကို ဝင်ရောက် ဖမ်းဆီး ခေါ်ဆောင် သွားခဲ့ကြောင်း သိရသည်။

“အဲ့အမျိုးသမီးကို ကျနော်တို့ အခုဆို ပြန်လွတ်လိုက်ပါပြီ။ ကျနော်တို့က ပေါ်လစီရှိတယ်။ အိမ်မှာ အမျိုးသား ၂ ယောက်ရှိတယ်ဆိုရင် တစ်ယောက်လာရတယ်။ တကယ်လို့ အမျိုးသားတွေက ရှောင်နေတယ်ဆိုရင် အိမ်မှာရှိတဲ့သူကို ခေါ်သွားတာပါ။ ပြီးရင် သင့်တော်တဲ့သူနဲ့ ပြန်လာအစားထိုးခိုင်းတာပေါ့” နမ့်လန်မြို့တွင်း SSPP/SSA တပ်ဖွဲ့က တာဝန်ရှိသူက ပြောသည်။

ထိုအပြင် SSPP/SSAတပ်ဖွဲ့သည် ညအချိန်မှာ တပ်သားများကို ဝင်ရောက် စုဆောင်းနေရခြင်းသည် နေ့အချိန်တွင် စစ်တပ် နှင့် မတွေ့လိုသည့်အတွက်ကြောင့် ညအချိန်မှ ပြည်သူတွေကို ဝင်ရောက် ခေါ်ဆောင်ရခြင်း ဖြစ်သည် ဟု သိရသည်။

“ဒေသခံတွေတော့ စိုးရိမ်နေကြတာ ဟုတ်ပါတယ်။ မြို့ထဲမှာ စစ်တပ် နဲ့ ဌာနဆိုင်ရာတွေ သွားလာတာရှိတယ်။ နေ့အချိန်ဆို သူတို့လည်း သွားလာတာရှိတယ်။ တကယ်လို့ ကျနော်တို့လည်း နေ့အချိန်သွားမယ်ဆိုရင် သူတို့တွေနဲ့ ထိတွေ့နိုင်တယ်။ တကယ်လို့ ထိတွေ့မှုရှိရင် တစ်ခုခုဖြစ်မှာလည်း ကြောက်ရတယ်။ အဲ့ကြောင့် ညအချိန်မှာ ဖြစ်သွားတာ” ဟု နမ့်လန်မြို့ SSPP/SSA တပ်ဖွဲ့က တာဝန်ရှိသူတစ်ဦးက ပြောသည်။

လက်ရှိ နမ့်လန်မြို့အတွင်းတွင် SSPP/SSA က တပ်သားတွေကို ဝင်ရောက်စုဆောင်းနေသည့်အတွက်ကြောင့် ဒေသခံ အမျိုးသားအများစုက ထွက်ပြေး တိမ်းရှောင်နေကြောင်း သိရသည်။

ထိုအပြင် နေ့အချိန်တွင်လည်း မြို့အတွင်းမှ တိတ်ဆိတ်နေပြီး အလုပ်သမားတွေလည်း မရှိတော့ကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“ နေ့အချိန်လည်း လူမရှိတော့ဘူး။ ညအချိန်ဆိုလည်း တိတ်ဆိတ်နေတာပဲ။ ပန်းရံသမားတွေတောင် အလုပ်မဆင်းတော့ဘူး။ အခုဟာဆိုရင် တစ်ချို့ ဆိုင်မဖွင့်တော့ဘူး။ သူတို့က နေ့ခင်းဆိုလည်း ဝင်ချင်သလို ဝင်နေကြတာ။ စစ်တပ်ကလည်း လုံခြုံရေး မပေးဘူး။ သူတို့ကလည်း ကျနော်တို့ကို လုံခြုံရေး မပေးတော့ဘူး” ဟု ၎င်းက ပြောသည်။

နမ့်လန်မြို့နယ်ထဲတွင် SSPP/SSA က တပ်သားစုဆောင်းရာတွင် ၁၀ ဦး ထက်မနည်း ဖမ်းဆီးခေါ်ဆောင် သွားပြီဖြစ်ကြောင်း ဒေသခံများ ပြောပြချက်အရ သိရသည်။

အလားတူ SSPP/SSA တပ်ဖွဲ့အနေနဲ့လည်း နမ့်လန်မြို့အတွင်း ညအချိန်တွင် တပ်သားစုဆောင်းမှု ထပ်မံပြုလုပ်သွားဖို့ရှိကြောင်း သိရသည်။

Leave a Comments

- Advertisement -spot_img

Latest article