သျှမ်းပြည် တောင်ကြီးခရိုင် ဆီဆိုင်မြို့နယ် ဘန်းယဉ်ကျေးရွာအုပ်စုမှ ကျောင်းပညာရေးဝန်ထမ်းများသည် ကျောင်းအပ်နှံချိန် ကျောင်းတွင်မရှိဘဲ လောင်းကစားဝိုင်း ရောက်ရှိနေကြောင်း စုံစမ်းသိရသည်။

အဆိုပါ ကျောင်းပညာရေးဝန်ထမ်းများမှာ ဆီဆိုင်မြို့နယ် ဘန်းယဥ်ကျေးရွာအုပ်စု ဖိုင်ကွမ်းကျောင်းအုပ် ဆရာကြီး နှင့် နောင်မွန်ကျေးရွာအုပ်စု လီမွန်ကျေးရွာ ကျောင်းအုပ်ဆရာမများဖြစ်ကြပြီး ကျောင်းအပ်နှံချိန်တွင် လောင်းကစားဝိုင်းရောက် ရှိနေကြောင်း သိရသည်။

“ ပြီးခဲ့တဲ့ ၂၆ ရက်နေ့က ကျောင်းအပ်တဲ့နေ့ဆို ကျောင်းအုပ်ဆရာတွေက ကျောင်းမှာမရှိဘဲ လောင်းကစားဝိုင်းတွေ မှာရှိနေတာ။ သူတို့ လုပ်နေတာကတော့ အမြင်မတော်ဘူးလေ။ ဒီနေ့တော့ ကျောင်းတက်နေပြီ။ လီမွန်ကျေးရွာကျောင်းအုပ်ဆရာမ ကတော့ အရက်ဘီယာတွေကို လိုက်ရောင်းနေတာ” ဟု နောင်မွန်ကျေးရွာ ဒေသခံအမျိုးသမီးတစ်ဦးက ပြောသည်။

အဆိုပါ ဖိုင်ကွမ်းကျောင်းအုပ်ဆရာ နှင့် လီမွန်ကျေးရွာကျောင်းအုပ်ဆရာမတို့သည် လင်မယားဖြစ်ကြပြီး၊ ထိုကျောင်းပညာရေးဝန်ထမ်းများ လောင်းကစားဝိုင်း၌ ပါဝင်နေသည့်အတွက်ကြောင့် ကျောင်းသား ၊ သူများအတွက် ပညာသင်ကြားရန်အတွက် ဆုံးရှုံးနိုင်ကြောင်း သိရသည်။

“ အခုချိန်မှာ ကျောင်းသားတွေကလည်း ပညာကောင်းကောင်းတတ်တာမဟုတ်ဘူး။ ဆရာတွေက ဒီလိုလုပ်နေမှတော့ ကလေးတွေကလည်း ဘယ်လိုပညာတတ်တော့မှာလဲ။ ရှေ့ဆက်ဖြစ်လာမဲ့ဟာကို ကျမတို့ပြောတာ။ နောက်ပိုင်းဆိုရင် သူတို့ ကလေးတွေကိုလည်း မကြည့်နိုင်ဘူး။ သူတို့ စီးပွားရေးအတွက်တွေပဲ လုပ်လာတော့မယ်လေ” ဟု အထက်ပါ အမျိုးသမီးက ပြောသည်။

စစ်တပ်အာဏာသိမ်းပြီးနောက်ပိုင်း သျှမ်းပြည်တစ်ဝှမ်း လောင်းကစားဝိုင်းများ ပိုမို များပြားလာခဲ့သည်။

ထို့အပြင် လောင်းကစားဝိုင်းများကို စာသင်ကျောင်း နှင့် အနီးတွင် ဖွင့်လှစ်ထားခြင်း၊ လူအဝင်ကန့်သတ်မှုမရှိဘဲ လွတ်လပ်စွာ ကစားနေကြောင်း သိရသည်။