သျှမ်း – ကရင်နီ (ကယား) နယ်စပ်ဒေသ မိုးဗြဲမြို့တွင် တိုက်ပွဲဖြစ်ပွားခြင်း မရှိဘဲ စစ်ကောင်စီမှ တာဝေးပစ်လက်နက်ကြီးဖြင့် တစ်ဖက်သတ် ပစ်ခတ်သောကြောင့် အမျိုးသမီးငယ် တစ်ဦး သေဆုံးပြီး ပြည်သူ ၃ ဦး ထိခိုက်ဒဏ်ရာရရှိခဲ့ကြောင်း စုံစမ်းသိရသည်။
ယမန်နေ့ (မေလ ၂၉) ရက် ညပိုင်း ၁၀ နာရီတွင် မိုးဗြဲမြို့ အခြေစိုက် စစ်ကောင်စီ ခမရ (၄၂၂) တပ်ရင်းမှ မိုးဗြဲမြို့ပေါ်ကို တာဝေးပစ် လက်နက်ကြီးဖြင့် ၂၀ လုံးထက်မနည်း ပစ်ခတ်ခဲ့သောကြောင့် မြို့ပေါ်ရှိ အသက် ၁၁ နှစ်အရွယ် အမျိုးသမီးတစ်ဦး သေဆုံးပြီး ပြည်သူ ၃ ဦး ထိခိုက်ဒဏ်ရာ ရရှိခဲ့ကြောင်း MBPDF မှ ယနေ့ မေလ ၃၀ ရက်တွင် ထုတ်ပြန်ထားသည်။
“ မနေ့က မိုးဗြဲမြို့မှာ တိုက်ပွဲမဖြစ်ဘဲ မိုးဗြဲအခြေစိုက် ခမရ (၄၂၂) က မိုးဗြဲမြို့ပေါ်ကို တာဝေးပစ် လက်နက်ကြီးနဲ့ ၂၀ လုံးထက်မနည်း ပစ်ခတ်ခဲ့တယ်။ ပစ်ခတ်လိုက်တဲ့ လက်နက်ကြီးကြောင့် အပြစ်မဲ့ ပြည်သူ ၃ ဦး ထိခိုက်ဒဏ်ရာရပြီး အသက် ၁၁ နှစ်အရွယ် မိန်းကလေးတစ်ဦး သေဆုံးသွားတယ် “ ဟု မိုးဗြဲပြည်သူ့ကာကွယ်ရေး MBPDF မှ ထုတ်ပြန်ချက်တွင် ရေးသားဖော်ပြထားသည်။
အဆိုပါ ဖြစ်စဉ်အသေးစိတ်နှင့် ပတ်သက်ပြီး သျှမ်းသံတော်သတင်းဌာနမှ မိုးဗြဲဒေသခံများထံ ဖုန်းဆက်ခဲ့သော်လည်း မြေပြင်ဖုန်းလိုင်း အခြေနေကြောင့် ဆက်သွယ်၍ မရခဲ့ပေ။
ထို့အပြင် စစ်ကောင်စီသည် သျှမ်း – ကရင်နီ (ကယား) နယ်စပ်ဒေသတလျောက် ဖြစ်ပွားနေသည့် တိုက်ပွဲအသီးသီး၌ အရပ်သားနေအိမ်၊ စစ်ဘေးရှောင်စခန်း နှင့် ကျောင်းဆောင်များကို PDF တပ်ဖွဲ့များ နေရာယူထားသည်ဟု ထင်မြင်ချက်ဖြင့် တိုက်လေယာဉ်နှင့် နေ့စဉ်နီးပါး ပစ်ခတ်တိုက်ခိုက်နေလျက်ရှိသည်။
“မြေပြင်မှာ သူတို့ လေယာဉ်အားမကိုးဘူးဆိုရင် မနိုင်တော့ဘူး။ ကျနော်တို့ ပြည်သူတွေကိုလည်း တတ်နိုင်မှာ မဟုတ်ဘူး။ ဒါကြောင့် သူတို့က အင်အားအလုံအခြုံ သုံးပြီး လေယာဉ်နဲ့လာကြဲတာ။ သူတို့ ရည်ရွယ်ချက်ရှိရှိနဲ့ လာတိုက်တာ။ ကျနော်တို့ နည်းနည်းလှုပ်ရှားမှုရှိရင် လူထုကို နည်းနည်းကြောက် လှန့်အောင် နိုင်တထက် လူထုကိုရည်ရွယ်ပြီး ဗုံးနဲ့လာကြဲတာပဲ” ဟု မိုးဗြဲဒေသခံ အမျိုးသားတစ်ဦးက ထပ်လောင်းပြောသည်။
အလားတူ မေလ ၂၇ ရက် မိုးဗြဲမြို့ပေါ်ရှိ လူနေအိမ်ရပ်ကွက်ကို စစ်ကောင်စီမှ တိုက်လေယာဉ်ဖြင့် ၉ ကြိမ်ထက်မနည်း ဗုံးကြဲ၊ လက်နက်ကြီးဖြင့် ထပ်ဆင့် ပစ်ခတ်တိုက်ခိုက်ခဲ့သောကြောင့် အသက် ၃ နှစ်ခွဲ ကလေးငယ်တစ်ဦး သေဆုံးခဲ့ပြီး ပြည်သူ ၄ ဦး ထိခိုက်ဒဏ်ရာ ရရှိခဲ့သည်။
Leave a Comments