သျှမ်းပြည် တာချီလိတ်ခရိုင်တွင် တစ်ရက်အတွင်း ယာဉ်တိုက်မှု၊ တိမ်းမှောက်မှုကြောင့် အမျိုးသမီးတစ်ဦး အပါအဝင် လူ ၃ ဦး သေဆုံးခဲ့ကြောင်း စုံစမ်းသိရသည်။

ယမန်နေ့ (မေလ ၂၈) ရက် နံနက်အစောပိုင်း ၃ နာရီတွင် ကျိုင်းတုံ – တောင်ကြီး ကားလမ်းပေါ်ရှိ ကျိုင်းဖောင်းရွာ အနီး၌ ကားတစ်စီး နှင့် ဆိုင်ကယ်တစ်စီး တိုက်မိကြပြီး ဆိုင်ကယ်ပေါ်မှ ဈေးသည်လင်မယား နှစ်ဦး သေဆုံးသွားခဲ့သည်။

အလားတူ ညပိုင်း ၁၀ နာရီဝန်းကျင်တွင် တာချီလိတ်မြို့ ဟောင်လိတ် – လေယာဉ်ကွင်းလမ်းဆုံ၊ ကောင်းကောင်း ကုန်စုံဆိုင်အနီးတွင် ဆိုင်ကယ်တစ်စီး အရှိန်လွန် တိမ်းမှောက်မှု ဖြစ်ပွားခဲ့ပြီး ဆိုင်ကယ်ပေါ်မှ သားအဖ ၂ ဦးအနက် အဖေဖြစ်သူက ပွဲချင်းပြီး သေဆုံးသွားခဲ့ကြောင်း ၎င်းကိုသွားရောက်ကူညီခဲ့သည့် ဦးလှမိုး လူမှုကူညီရေးအသင်းထံမှ သိရသည်။

“ အဓိကတော့ ဆိုင်ကယ်မောင်းတဲ့သူက ဆိုင်ကယ် ဦးထုပ်ဆောင်းရင် အသက်အန္တရာယ်ကတော့ ၉၀ ရာခိုင်နှုန်း မစိုးရိမ်ရဘူး။ သူတို့က ဦးထုပ်မဆောင်းတဲ့အခါ ဖမ်းတုန်းခဏ၊ ပညာပေးတုန်းခဏ ပြီးရင်ပြန်ချွတ်ကြတာ။ တချို့ မော်တော်ပီကယ်မြင်မှ ဦးထုပ်ဆောင်းတယ်။ အဲ့လိုမျိုးဖြစ်နေတော့ မပြောကောင်း၊ မဆိုကောင်း လက်ကျိုးရင် စတီးပြန်ထည့်လို့ရတယ်။ ဦးထုပ်မဆောင်းတဲ့အခါကြတော့ သတိလှစ်မယ်။ မတော်တဆ အသက်ဆုံးရှုံးမယ် “ ဟု တာချီလိတ်ဒေသ ယာဉ်စည်းကမ်း သိတတ်သူ တစ်ဦးက ပြောသည်။

အလားတူ တာချီလိတ်မြို့တွင် စစ်တပ်က အာဏာသိမ်းပြီးနောက်ပိုင်း ရွှေ့ပြောင်းအလုပ်သမား၊ လူနေထူထပ်မှုများပြားလာသည်နှင့်အမျှ ယာဉ်စည်းကမ်း၊ လမ်းစည်းကမ်း လိုက်နာသူများသည်လည်း မရှိသလောက် နည်းပါးနေကြောင်း သိရသည်။

အဆိုပါ လူနေထူထပ်မှု များပြားလာရခြင်းမှ ယာဉ်စည်းကမ်း၊ လမ်းစည်းကမ်း လိုက်နာသူများ မရှိခြင်းကြောင့် တာချီလိတ်မြို့နယ်တွင် ယခုမေလအတွင်း မတော်တဆ ယာဉ်တိုက်မှု၊ တိမ်းမှောက်မှုကြောင့် လူ ၅ ဦးသေဆုံးပြီး၊ ၂၀ ဦး ထိခိုက်ဒဏ်ရာ ရရှိခဲ့သည်။