ကချင်လွတ်လပ်ရေး အဖွဲ့ (KIO) နှင့် ပလောင်ပြည်နယ် လွတ်မြောက်ရေး တပ်ဦး (PSLF) ကြား မမျှော်လင့်သည့်အခက်အခဲများပေါ်ပေါက်လာပါက နှစ်ဖက်တိုင်ပင် ညှိနှိုင်းဖြေရှင်းသွားရန်နှင့် ပဋိပက္ခမပေါ်ပေါက်စေရန် အတွက် ဝိုင်းဝန်း ထိန်းသိမ်းကြမည် ဖြစ်ကြောင်း သတင်းရရှိသည်။

KIO နှင့် PSLF သည် မေ ၁၆ – ၁၇ ရက်တွင် ကချင်ပြည် မိုင်ဂျာယာန်မြို့တွင် တွေ့ဆုံဆွေးနွေးညှိနှိုင်းခဲ့ကြပြီး အပြန်အလှန် နားလည်မှုရရှိစွာဖြင့် သဘောတူညီချက် (၅) ချက်ရရှိခဲ့ကြသည်။

ထိုသဘောတူညီချက်များမှာ KIO နှင့် ယခင် PSLO တို့ နှစ်ဖွဲ့ကြား ချုပ်ဆိုခဲ့ကြသည့် ထာဝရ မဟာမိတ် စာချုပ်ကို KIO နဲ့ PSLF တို့က ဆက်လက် အသိအမှတ်ပြုပြီး ထိန်းသိမ်း အကောင်အထည် ဖော်သွားကြရန် ဆိုသည့်အချက်လည်း ပါသည်။

အာဏာရှင်စနစ် ချုပ်ငြိမ်းရေးအတွက် အတူလက်တွဲဆောင်ရွက်ရန် ၊ အမျိုးသား တန်းတူရေး အပေါ် အခြေခံပြီး အပြန်အလှန် လေးစားမှုဖြင့် အရင်အတိုင်း ချစ်ကြည်ရင်းနှီးစွာ အတူ နေထိုင်ရန်၊ မမျှော်လင့်သည့် အခက်အခဲများ ပေါ်ပေါက်လာပါက မှန်ကန်သော ဆုံးဖြတ်ချက်ရရှိရေးအတွက် နှစ်ဖက် တိုင်ပင်ညှိနှိုင်း ဖြေရှင်းသွားကြရန် နှင့် ပဋိပက္ခမပေါ်ပေါက်စေရန် အတွက် ဝိုင်းဝန်းထိန်းသိမ်းကြရန် ဆိုသည့် အချက်လည်း သဘောတူညီချက်ရထားကြသည်။

ထို့အပြင် ဒေသခံများဖြစ်ကြသည့် ကချင်လူမျိုး ၊ တအာင်းလူမျိုး၊ သျှမ်း လူမျိုး အပါအဝင် ပြည်သူလူထုတို့၏ ဘေးကင်းလုံခြုံရေးကို နှစ်ဖက်တပ်ဖွဲ့က တာဝန်ခံကြရန် နှင့် ဝန်ထုပ်ဝန်ပိုး ဖြစ်စေသည့် လုပ်ရပ်များကို ရှောင်ရှားရန်ဆိုသည့် အချက်လည်း နှစ်ဖက်တပ်ဖွဲ့က သဘောတူညီကြသည်။

KIO နှင့် PSLF တပ်ဖွဲ့တို့သည် သျှမ်းပြည်မြောက်ပိုင်း ကွတ်ခိုင် ၊ နမ့်ခမ်း ၊ မူဆယ် စသည် မြို့နယ်များတွင် လှုပ်ရှား ဆောင်ရွက်မှုများ နှင့် ပတ်သက်ပြီး နယ်မြေသတ်မှတ်ရာမှာ ရှုပ်ထွေးနေသည့် အတွက် နှစ်ဖက် တပ်ဖွဲ့ကြား အငြင်းပွားမှုတွေလည်း ရှိနေသည်။

သျှမ်းမြောက်ပိုင်း တစ်လျှောက်တွင် PSLF/TNLA ၏ လှုပ်ရှားနယ်မြေအတွင်း ရှိနေသည့် တအာင်းလူမျိုးများကို တပ်သားအဖြစ် မစုဆောင်းကြရန် KIO/KIA ထံ စာပို့တားမြစ်သည့် ဖြစ်စဉ်လည်းရှိခဲ့ဖူးသည်။

အလားတူပင် KIO/KIA တပ်ဖွဲ့မှ လုံခြုံရေး တာဝန်ယူပေးနေသည့် မူဆယ်မြို့နယ် တီးမကျေးရွာဘက်ရှိ ရွှေတွင်းနေရာများသို့ PSLF/TNLA တပ်ဖွဲ့မှ ဝင်ရောက်အခွန်ကောက်မှု နှင့် ပတ်သက်ပြီး စိန်ခေါ်မှု တစ်ရပ် ဖြစ်နေကြောင်းလည်း KIO/KIA ဗိုလ်မှူးကြီး နော်ဘူက သျှမ်းသံတော်ဆင့်ကို ပြောဆိုဖူးသည်။

“စစ်ရေး နဲ့ လက်နက် အပြည့်အစုံနဲ့ ကျနော်တို့ လုံခြုံရေး ယူထားတဲ့ နယ်မြေအတွင်းကို ဝင်လာတယ် ဆိုတော့ ကျနော်တို့ အတွက် မကောင်းဘူးပေါ့နော်၊ ဒါက စိန်ခေါ်တဲ့ သဘောမျိုး ဖြစ်သွားတာပေါ့” ဟု ဗိုလ်မှူးကြီး နော်ဘူက သျှမ်းသံတော်ဆင့်ကိုပြောသည်။

ယင်းကဲ့သို့ နှစ်ဖက်တပ်ဖွဲ့ အငြင်းပွားမှု ရှိလာခဲ့ပြီးသည့်နောက် ယခုတွေ့ဆုံဆွေးနွေးမှုများ ပြုလုပ်လာခြင်း ဖြစ်သည်။

ယခုတစ်ကြိမ် ပြုလုပ်သည့် KIO နဲ့ PSLF တွေ့ဆုံမှုတွင် မူးယစ်ဆေးဝါး တိုက်ဖျက်ရေးလုပ်ငန်းကိစ္စရပ်များကိုလည်း အပြန်အလှန်သတင်းဖလှယ်ကြရန် နှင့် လူထု အခြေပြု မူးယစ် ဆေးဝါး တိုက်ဖျက်ရေးလုပ်ငန်းများကို အသိအမှတ်ပြု အားပေးကြောင်း ယနေ့ မေ (၂၈) ရက်မှာ KIO နှင့် PSLF တို့ ပူးပေါင်း ထုတ်ပြန်ထားသည်။

KIO ၏ လက်နက်ကိုင်တပ်ဖွဲ့သည် ကချင်လွတ်လပ်ရေးတပ်မတော် (KIA) ဖြစ်ပြီး၊ PSLF ၏ လက်နက်ကိုင် တပ်ဖွဲ့သည် တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) ဖြစ်သည်။