အာဏာသိမ်း စစ်ကောင်စီ တပ်ဖွဲ့သည် သျှမ်းပြည် မြောက်ပိုင်း လားရှိုး – မူဆယ် လမ်းပိုင်းတစ်လျောက်၌ စစ်ဆေးမှု တင်းကြပ်နေကြောင်း စုံစမ်း သိရသည်။
လားရှိုးမြို့မှ သိန္နီ၊ ကွတ်ခိုင် စသည့် ပြည်ထောင်စုလမ်းကြောင်း တစ်လျောက် မူဆယ်မြို့ အထိ အာဏာသိမ်း စစ်ကောင်စီတပ်ဖွဲ့သည် စစ်ဆေးရေးဂိတ်ဖွင့်ပြီး လမ်းသွားလမ်းလာများကို တင်းကြပ်စွာ စစ်ဆေးမှု လုပ်နေကြောင်း ဒေသခံများက သျှမ်းသံတော်ဆင့်ကို ပြောသည်။
“ဒီလမ်းပိုင်း တစ်လျောက် မြို့ဝင် မြို့ထွက် နေရာတိုင်းမှာ စစ်ကောင်စီက စစ်ဆေးမှု အရမ်းတင်းကြပ်နေတယ်၊ သျှမ်း ပြည်က မှတ်ပုံတင်ဆိုရင် သိပ်မရစ်ပေမဲ့ တခြား ပြည်နယ်/တိုင်းက မှတ်ပုံတင်ဆိုရင်တော့ တခါတည်း ချုပ်ပြီးတော့ စစ်တာ၊ အထူးသဖြင့်တော့ သီပေါ့၊ လားရှိုး၊ ကျောက်မဲ၊ နမ္မတူဘက်က လူဆိုရင် ပိုစစ်တယ်” ဟု စစ်ဆေးမှုကို ကြုံတွေ့ရသည့် အမျိုးသား တစ်ဦးက သျှမ်းသံတော်ဆင့်ကို ပြောသည်။
စစ်ကောင်စီ တပ်ဖွဲ့သည် နံနက်ပိုင်းမှ စတင်ကာ ညနေအထိ တင်းကြပ် စစ်ဆေးနေပြီး များသော အားဖြင့် ပြည်သူ့ကာကွယ်ရေး ပူးပေါင်း တပ်ဖွဲ့ဝင်များ နှင့် ပတ်သက်မှု ရှိ၊ မရှိ မေးမြန်းမှုများရှိကြောင်း လည်း သိရသည်။
အဆိုပါ စစ်ကောင်စီတပ်ဖွဲ့၏ စောင့်ကြပ်စစ်ဆေးမှုများသည် PDF တပ်ဖွဲ့ လှုပ်ရှားမှု သတင်းရသည့် အတွက် ၁၀ ရက်တာ ရှိမည် ဖြစ်ကြောင်း အထက်ပါ ပုဂ္ဂိုလ်က သျှမ်းသံတော်ဆင့်ကို ဆက်ပြောသည်။
“ကျနော်တို့ သိရသလောက်ကတော့ စစ်ကောင်စီက ၁၀ ရက်တာ စစ်ဆေးသွားမယ်လို့ သိရပါတယ်၊ PDF သတင်းတွေ ရလို့တဲ့၊ ခုလို စစ်ဆေးမှု တင်းကြပ်လာတာက ၂ – ၃ ရက်လောက်ပဲ ရှိမယ်၊ သျှမ်းမြောက်ပိုင်း တစ်လျောက်က PDF လှုပ်ရှားမှုကလည်း တိုးလာတော့ သူတို့ကို ဗုံးကြဲတိုက်ခိုက်မှာ ကြောက်တာနေမှာပေါ့” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ဆက်ပြောသည်။
လက်ရှိ အချိန်တွင်လည်း သျှမ်းပြည်မြောက်ပိုင်း တစ်လျှောက်၌ မန္တလေးဘက်မှ တက်လာသည့် PDF တပ်ဖွဲ့များ၏ သတင်းလည်း မကြာခဏ ကြားရသည့် အတွက် စစ်ကောင်စီတို့မှ စိုးရိမ်ခြင်း ဖြစ်နိုင်ကြောင်းလည်း ဒေသခံများ က ပြောသည်။
ပြီးခဲ့သည့် ဧပြီလ အတွင်းမှာလည်း အာဏာသိမ်း စစ်ကောင်စီ တပ်ဖွဲ့ နှင့် PDF ပူးပေါင်း တပ်ဖွဲ့တို့က နောင်ချိုမြို့နယ် အတွင်း ပြင်းထန်စွာ ထိတွေ့တိုက်ပွဲ ဖြစ်ပွားခဲ့ပြီး စစ်ကောင်စီဘက်မှ ထိခိုက်ကျဆုံးမှု ၁၀၀ ထက်မနည်း ရှိခဲ့ကြောင်းလည်း သိရသည်။
အဆိုပါ ထိတွေ့တိုက်ပွဲတွင် စစ်ကောင်စီ ခလရ ၁၄၇ ၊ ခလရ ၂၅၃ ၊ ခမရ ၂၅၈ ၊ ခမရ ၅၀၈ စသည်တို့မှ ဖြစ်ကြပြီး စစ်အင်အား တစ်ထောင် ထက်မနည်း ရှိခဲ့ကြောင်းလည်း သိရသည်။
Leave a Comments