သျှမ်းပြည် ကျောက်မဲမြို့နယ် ခိုမုန်းကျေးရွာအုပ်စုအတွင်းရှိ ကားလမ်းမပေါ်တွင် တွဲကားတစ်စီးနှင့် ဆိုင်ကယ်တစ်စီး တိုက်မိကြပြီး ဆိုင်ကယ်ပေါ်မှ လူ ၂ ဦး ပွဲချင်းပြီး သေဆုံးသွားကြောင်း စုံစမ်းသိရသည်။
ယနေ့ (မေလ ၂၆) ရက် နံနက် ၇ နာရီတွင် ကျောက်မဲ – လားရှိုးဖက်မှ မောင်းနှင်လာသော တွဲကားတစ်စီး နှင့် မန္တလေးဘက်မှ မောင်းနှင်လာသော ဆိုင်ကယ်တစ်စီးသည် ခိုမုန်းကျေးရွာအုပ်စုအတွင်း တိုက်မိရာ ဆိုင်ကယ်ပေါ်မှ လူငယ် ၂ ဦး ပွဲချင်းပြီး သေဆုံးသွားကြောင်း သိရသည်။
“ ဆိုင်ကယ်သမားကတော့ မန္တလေးဘက်ကနေ ကျောက်မဲကို လာမယ်ထင်တယ်။ တွဲကားကတော့ ကျောက်မဲ – လားရှိုးဖက်ကနေ မန္တလေးကို ဆင်းမယ်နဲ့တူတယ်။ အဲ့နားမှာက အကွေ့လေးရှိတယ်။ ပုံမှန် ဒီမှာက သိပ်မဖြစ်ဖူးတဲ့နေရာပါ။ အမျိုးသား တစ်ဦးကတော့ ဦးခေါင်းတစ်ခြမ်း မကျန်တော့ဘူး။ ကျန်တဲ့ တစ်ယောက်တော့ ခြေထောက်ကျိုးထားတယ်။ နှစ်ယောက်လုံး အခင်းမှာဘဲ ဆုံးသွားတာ “ ဟု ၎င်းကို သွားရောက်ကူညီသည့် နမ့်ခုံးရှမ်းများပရဟိတအသင်းက ပြောသည်။
အဆိုပါ ယာဥ်တိုက်မှု နှင့်ပတ်သက်ပြီး သက်ဆိုင်ရာ ရဲတပ်ဖွဲ့ နှင့် ယာဉ်ထိန်းရဲများက ရောက်လာပြီး မှတ်တမ်းကောက်ယူခဲ့သလို သေဆုံးသူ အသက် ၂၀ ကျော် အမျိုးသား ၂ ဦး၏ အလောင်းကို နမ့်ခုံးရှမ်းများ ပရဟိတအသင်းမှ အခင်းဖြစ်ပွားရာနေရာကနေ သယ်ဆောင်ပြီး ကျောက်မဲဆေးရုံရှိ ရင်ခွဲရုံသို့ ပို့ဆောင်ပေးခဲ့သည်။
“ ဆိုင်ကယ်၊ ကား မောင်းရင် သတိ နဲ့ မောင်းကြပါဗျာ။ ဖြစ်လာရင် အသက်ပါမယ်။ အသက်မပါရင် ခြေတွေ၊ လက်တွေ ကျိုးမယ်။ နှစ်ဦးနှစ်ဖက်အတွက်လည်း အဆင်မပြေဘူးဗျာ။ မိဘပြည်သူတွေ ဆိုင်ကယ်၊ ကား မောင်းရင် သတိနဲ့ မောင်းကြဖို့၊ ဖြည်းဖြည်း နဲ့ ပုံမှန်မောင်းနှင်ကြဖို့ မှာကြားချင်ပါတယ် “ ဟု ၎င်း ပရဟိတအသင်းမှ ယခုလို မှာကြားထားသည်။
ထို့အပြင် ကျောက်မဲမြို့ အပါအဝင် လားရှိုး၊ မူဆယ်၊ တာချီလိတ် စသည့် မြို့ပြကြီးတွင်လည်း လူနေထူထပ် များပြားလာသည်နှင့်အမျှ ယာဉ်စည်းကမ်း၊ လမ်းစည်းကမ်းများ မလိုက်နာကြရာ ယာဉ်တိုက်မှုသည် နေ့စဉ်နီးပါး ဖြစ်ပွားနေကြောင်း သိရသည်။
