ယခု ၂၀၂၃ -၂၀၂၄ ပညာသင်နှစ်တွင် ကျောင်းဆရာ ၊ ဆရာမ များကို နိုင်ငံရေး အကြောင်း မသင်ကြားရန်အတွက် စစ်ကောင်စီက မှာကြားထားကြောင်း စုံစမ်းသိရှိရသည်။

စစ်တပ် အာဏာသိမ်း ၂ နှစ် နောက်ပိုင်း စာသင်ကျောင်းတွင် နိုင်ငံရေး မသင်ကြားရန် နှင့် ကျောင်းသားများကို နိုင်ငံရေး နှင့် ပတ်သက်သည့်ကိစ္စ မပြောဆိုရန် မှာကြားထားကြောင်း CDM ဆရာများထံ သိရှိရသည်။

“ နိုင်ငံရေး အကြောင်းတွေ မသင်နဲ့တဲ့။ ကျောင်းသားတွေကိုလည်း နိုင်ငံရေး အခြေနေတွေကို မပြောပြဖို့ မသင်ဖို့မှာ ထားတယ်တဲ့။ သင်ရင် ဘာလုပ်မလဲဆိုတာတော့ မပြောဘူး” ဟု သျှမ်းပြည်တွင်း CDM ပြုလုပ်နေသည့် ဆရာမ များထံမှ သိရသည်။

အလားတူ ယခုနှစ် ၂၀၂၃ -၂၀၂၄ ပညာသင်နှစ်ကို စနစ်သစ် အထက်တန်းကျောင်းကို ၁၂ တန်းထိ ထားရှိသွားမည်ဖြစ်ကြောင်း စစ်ကောင်စီက ထုတ်ပြန်ထားသည်။

ထိုသို့ အထက်တန်း တက္ကသိုလ်ဝင်တန်း ၁၂ တန်းထိ ထားရှိသွားသည့် အတွက်ကြောင့် အကြောင်း အမျိုးမျိုးဖြင့် ၁၀ တန်း ကျရှုံးသူများ နှင့် ၁၀ တန်း မဖြေဆိုသူများ အနေဖြင့် ယခု ၂၀၂၃ – ၂၀၂၄ ပညာသင်နှစ်တွင် ကျောင်းတက်ခွင့် မရှိတော့ကြောင်း သိရသည်။

အဆိုပါ ၁၀ တန်းကျသူများ ကျောင်းတက်ခွင့် မရခြင်းသည် ပြင်ပ ကျောင်းတွင် လေ့လာပြီး ၁၂ တန်းကို ဖြေဆိုရမည်ဖြစ်ကြောင်း Nice Education Service က တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။

“ အကြောင်းအမျိုးမျိုးကြောင့် ၁၀ တန်းကျထားတဲ့သူတွေ ၊ ၁၀ တန်း မဖြေထားတဲ့ သူတွေကတော့ ကျောင်းတက်လို့ မရတော့ဘူး။ သူတို့ ဘာသာ အပြင်မှာ ကိုယ်တိုင်လေ့လာရမှာပေါ့။ ဒါမဲ့ သူတို့က ၁၂ တန်းစာကိုလေ့လာရမှာ။ ကျောင်းမလာတက်ရတော့ဘူး။ စာဖြေတဲ့ အချိန်မှ လာဖြေပေါ့။ ပြင်ပကျောင်းမှာ ကိုယ်တိုင်ရှာပြီး လေ့လာရမှာပေါ့” ဟု ၎င်းကပြောသည်။

စစ်တပ် အာဏာသိမ်းပြီးနောက်ပိုင်းတွင် အမျိုးသားညီညွတ်ရေးအစိုးရ NUG ကလည်း အွန်လိုင်းစနစ်ဖြင့် စာသင်ပေးမှုလည်း ရှိနေသည်။

ထိုသို့ NUG မှ ဖွင့်လှစ်သင်ကြားပေးသည့် ပညာရေးစနစ်ကို တက်ရောက်နေသူများကို စစ်ကောင်စီက ဖမ်းဆီးနေလျက်ရှိသည်။

အလားတူ ပြီးခဲ့သည့် ဧပြီလထဲတွင် သျှမ်းပြည် မူဆယ်မြို့နယ်ထဲရှိ NUG ကျောင်းကို တက်ရောက်နေသည့် ကျောင်းသူ၏ မိဘက စစ်ကောင်စီက ဖမ်းဆီးသွားခဲ့ကြောင်း သိရသည်။

“ ကလေးကိုတော့ မဖမ်းသွားဘူး။ သူ့အမေကို ဖမ်းသွားတာပေါ့။ အခုထိတော့ ပြန်မလွတ်လာသေးဘူး။ အချုပ်ခန်းထဲမှာကိုပဲ အမှုစစ်ဆေးနေတယ်တဲ့။ NUG က ဖွင့်တဲ့ ကျောင်းကိုတက်နေရင်တော့ သူတို့ လာဖမ်းသွားတယ်။ မူဆယ်မှာတော့ ဖမ်းခံရတာ ၁ ယောက်ပဲရှိသေးတယ်” ဟု မူဆယ်မြို့ ဒေသခံ အမျိုးသားတစ်ဦးက ပြောသည်။

ထိုသို့ စစ်ကောင်စီက ကျောင်းသား / သူများအနေဖြင့် ပညာရေးလေ့လာခွင့်ကို ပိတ်ပင်ထားသည့် အတွက်ကြောင့် ကျောင်းဆက်မတက်လိုကြောင်း လဲချားမြို့ ၁၀ တန်းကျောင်းသူတစ်ဦးက သျှမ်းသံတော်ဆင့်က ပြောသည်။

“ နိုင်ငံရေးမဖြစ်ခင်တုန်းကတော့ ၁၀ တန်း တက်ထားတယ်။ ဒါမဲ့ အပြီးထိ မတက်ရဘူး။ နိုင်ငံရေးဖြစ်တော့ ဆက်မတက်တော့ဘူး။ CDM လုပ်လိုက်တာ။ အခု ၁၀ တန်းက တက်လို့မရတော့ဘူး။ စစ်ကောင်စီက ပညာသင်ကြားပေးတာ ပိတ်ပင်တယ်လေ။ အခုတော့ တစ်ခြား ဘာသာတွေကို လေ့လာနေတာ” ဟု ၎င်းက ပြောသည်။

ပြီးခဲသည့် ၂၀၂၂ – ၂၀၂၃ ခုနှစ် စစ်ကောင်စီ ၏ ပညာသင်နှစ် တက္ကသိုလ်ဝင်တန်းစာမေးပွဲဖြေဆိုသူ စာရင်း ၁ သိန်း ၇ သောင်းကျော်ရှိကြောင်း သိရသည်။