သျှမ်းပြည် တောင်ကြီးခရိုင် ဆီဆိုင်မြို့နယ် သျှမ်း – ကယားနယ်စပ်ဒေသရှိ စစ်ဘေးရှောင်များ စားစရာ မရှိသဖြင့် ဒေသခံများထံ အိမ်တိုင်ရောက် ဆန်တောင်းစားနေရကြောင်း စုံစမ်းသိရသည်။
စစ်ဘေးရှောင်များသည် ထွက်ပြေးတိမ်းရှောင်လာချိန် ကြာလာသည်နှင့်အမျှ အလှူရှင်များထံမှ ကူညီထောက်ပံ့မှုများ ပုံမှန်မရရှိခဲ့ကာ အကူညီထောက်ပံ့မှု ပြတ်လပ်လာသဖြင့် အနီးအနားကျေးရွာရှိ ဒေသခံများထံ အိမ်တိုင်ရောက် ဆန်တောင်းစား နေရကြောင်း ကြုံတွေ့ခဲ့ရသူ အမျိုးသားတစ်ဦးက ပြောသည်။
“အလှူရှင်တွေက လုံးဝကို မရှိကြတော့တာ။ မနေ့ည တစ်ယောက်က ကျနော်ဆီကို လာတောင်းတယ်။ စားဖို့မရှိတော့ဘူးလေ။ နေ့လယ်က ကျနော့်ကလေး သူများဆီက ခေါက်ဆွဲသွားတောင်းစားရတယ်။ ဆန်ရှိရင် နည်းနည်းပေးပါလား ဆိုပြီး လာတောင်းတယ်ဗျ။ ကျနော်လည်း ဆန် တစ်ဗူးကျော်၊ နှစ်ဗူးလောက် ပေးလိုက်တယ်။ အရမ်းကို သနားဖို့ကောင်းတယ် “ ဟု ၎င်း အမျိုးသားတစ်ဦးက ပြောသည်။
လက်ရှိ သျှမ်း – ကယားနယ်စပ်ဒေသရှိ စစ်ဘေးရှောင်များသည် နေ့စား မလိုက်ရသည့်အပြင် ကိုယ်တိုင် စိုက်ပျိုးရန် တောင်ယာက မရှိခဲ့သဖြင့် ယခုလို အလှူရှင် ပြတ်လပ်သည့်ကာလ၌ စားဝတ်နေရေးသည် ပိုပြီးခက်ခဲ လာနေကြောင်း သိရသည်။
“ အခုလောလောဆယ်ဆယ် ကျနော် ပေးလိုက်ရတာ သုံး၊ လေးယောက်တော့ ရှိပြီ။ သူတို့က ဆန်မရှိလို့ဆိုပြီး အိမ်ထိလာတောင်းတာ။ ကျနော်လည်း သူတို့ကို တစ်ယောက် တစ်ဗူး၊ နှစ်ဗူး ဖြစ်ဖြစ် ပေးလိုက်တယ်။ ပြီးတော့ သူများခြံကို အငှားလိုက်ဖို့လည်း ပြောတယ်“ ဟု ၎င်းက ထပ်လောင်းပြောသည်။
အလားတူ ဆီဆိုင်မြို့နယ် အောင်ကလပ်ရွာရှိ စစ်ဘေးရှောင်များသည် ၂ လ နီးပါးကြာ အလှူရှင်များထံမှ ကူညီထောက်ပံ့မှု မရရှိသဖြင့် စားနပ်ရိက္ခာ နှင့် ကိုယ်ဝန်သည် မိခင်အတွက် ဆေးဝါးလိုအပ်နေကြောင်း စစ်ဘေးရှောင်ကူညီနေသူ ဒေသခံတစ်ဦးက ပြောသည်။
“ အဓိကတော့ ဆန်၊ ဆီ၊ ဆားတွေ လိုအပ်တာပေါ့ဗျာ။ တချို့က တောင်ယာ နည်းနည်းပါးပါး လုပ်ပြီး စားဖို့သောက်ဖို့ဆိုတာ ရှိပေမယ့် တချို့တွေကလည်း စားဖို့သောက်ဖို့က မရှိဘူး။ ဒီလိုပဲ ရှာစားနေရတာပေါ့။ ကိုယ်ဝန်သည် မိခင်တွေကလည်း နှစ်ယောက်လောက်ရှိတယ်။ မွေးဖွားပြီးတဲ့ မိခင်ကလည်း နှစ်ယောက်လောက် ရှိတယ်။ မွေးတုန်းကလည်း ဆေးရုံ၊ ဆေးခန်း နဲ့ ဝေးတော့ သွားလာခက်တယ် “ ဟု ၎င်းက ပြောသည်။
စစ်တပ်က အာဏာသိမ်းပြီးနောက်ပိုင်း သျှမ်း – ကရင်နီ (ကယား) နယ်စပ်ဒေသတွင် စစ်ကောင်စီတပ်ဖွဲ့ နှင့် ပြည်သူ့ကာကွယ်ရေးတပ်ဖွဲ့ PDF တို့ တိုက်ပွဲကြောင့် ပြည်သူများသည် နေရပ်စွန့်ပြီး ဆီဆိုင်မြို့နယ်အတွင်းသို့ ထွက်ပြေးတိမ်းရှောင်လာရသည်။
လက်ရှိ ဆီဆိုင်မြို့နယ်အတွင်း စစ်ဘေးရှောင်ဦးရေ စုစုပေါင်း ၈ ထောင်ကျော်ရှိပြီး စစ်ဘေးရှောင်များသည် စားနပ်ရိက္ခာ နှင့် ဆေးဝါး အကူညီလိုအပ်နေကြောင်း သိရသည်။
Leave a Comments