သျှမ်းပြည် တောင်ကြီး – ဟိုပုံး ပြည်ထောင်စု ကားလမ်းဘေးရှိ TBC ကားရပ်နားစခန်း၏ မျက်နှာချင်းဆိုင် လမ်းတစ်ဖက်မှ ထင်းရှူးတောကို အိမ်ရာစီမံကိန်း ဂရန်အမည်ပေါက် မြေကွက်အရောင်းဖွင့်ပွဲ ပြုလုပ်မည့်အပေါ် ဒေသခံများက ကန့်ကွက်နေကြောင်း စုံစမ်းသိရှိရသည်။

ယမန်နေ့ (မေလ ၂၂) ရက်တွင် Shwe Property page တစ်ခုမှတစ်ဆင့် တောင်ကြီး – ဟိုပုံး လမ်းဘေးရှိ ထင်းရှူးတောကို Woodland Villas (Taunggyi) အိမ်ရာစီမံကိန်းရှိ ဂရန်အမည်ပေါက်မြေကွက်များ အရောင်းဖွင့်ပွဲ ပြုလုပ်၍ အထူးသက်သာသော စျေးနှုန်းဖြင့် ရောင်းချပေးမည်ဟု လူမှုကွန်ရက်စာမျက်နှာပေါ်တွင် ကြေညာထားခဲ့သည်။

ယခင်က ထိုနယ်မြေကို သစ်တောဦးစီးပိုင် နယ်မြေတစ်ခုအဖြစ် သတ်မှတ်ထားသော်လည်း စစ်တပ်က အာဏာ သိမ်းပြီးနောက်ပိုင်း ၎င်းနယ်မြေကို ကုမ္ပဏီမှ အိမ်ရာစီမံကိန်းတစ်ခုအဖြစ် အကောင်အထည်ဖော်ရန် ကြိုးစားနေလျက် ရှိသည်။

“ထင်းရူးတောနယ်မြေမှာ အိမ်ဆောက်မယ်ဆိုတော့ ထင်းရှူး၊ သစ်ပင်တွေ ပါသွားမှာပေါ့။ အနည်းနဲ့အများတော့ ပါသွားမှာဘဲ။ ဘယ်လောက် ဂျောင်ကျတဲ့ နေရာဖြစ်ဖြစ် အရင်စီမံကိန်းတုန်းကလည်း မလုပ်ပါဘူး၊ မခုတ်ပါဘူး ဘယ်လောက်ဘဲ ပြောပြော အများကြီး ကုန်သွားတာပဲလေ” ဟု တောင်ကြီးမြို့ခံ အမျိုးသမီးတစ်ဦးက ပြောသည်။

အဆိုပါ အိမ်ရာစီမံကိန်း မြေကွက်အရောင်းဖွင့်ပွဲတွင် မြေ (၂) ဧက ကျော်ပေါ်ရှိ မြေကွက် (၃၁) ကွက်ကို အထူးသက်သာသော ဈေးနှုန်းဖြင့် ရောင်းချပေးမည်ဖြစ်ကြောင်း ကြေညာထားသည်။

ထိုသို့ စီမံကိန်းများ ပြုလုပ်ခြင်းကြောင့် ထင်းရူးတောရှိ သစ်ပင်များ ခုတ်ထွင်ရခြင်း နှင့် သစ်တောပြုန်းတီးခြင်း၏ အကျိုးဆက်ကြောင့် ဖြစ်လာနိုင်မည့် သဘာဝဘေးအန္တရာယ်ကို ပြည်သူများက ခံစားရကြောင်း ၎င်းက ဆက်ပြောသည်။

“ အခုတော့ လူတိုင်းခံစားနေရတာပဲလေ။ သဘာဝ ပတ်ဝန်းကျင် နဲ့ အပူချိန် မြင့်တက်လာတာတို့၊ ရေရှားပါး လာတာတို့ အဲ့ဒါတော့ သစ်ပင်မရှိတဲ့ အကျိုးဆက်ပေါ့။ မြို့ပေါ်မှာ လူဦးရေ ထူထပ်လာတယ်။ ကာဗွန်ဒိုင်အောက်ဆိုဒ် ပိုများလာတယ်။ သဘာ၀အန္တရာယ်ကတော့ မျိုးစုံကြုံရမယ်။ အခုလို မုန်တိုင်းချိန်မှာ သဘာဝအန္တရာယ် ကြုံရတာမဟုတ်ပါဘူး။ ဒါတွေက တဖြည်းဖြည်းနဲ့ တိုးတိုးပြီး ဖြစ်လာတဲ့ သဘာဝဘေးအန္တရာယ်တွေပေါ့ “ ဟု ၎င်းအမျိုးသမီးတစ်ဦးက ထပ်လောင်းပြောသည်။

လက်ရှိ အကောင်အထည်ဖော်မည့် စီမံကိန်းသည် တောင်ကြီး TBC ကားရပ်နားစခန်း၊ တောင်ကြီးတက္ကသိုလ် နှင့် ဆေးတက္ကသိုလ် အနီးတွင်ရှိကြောင်းလည်း သိရသည်။

အလားတူ ဒေသခံ အမျိုးသားတစ်ဦးက “ ဒီဟာက မြို့တောင်ဖက် အထွက်ထင်းရှူးတောကို အရင်ဝန်ကြီးချုပ် စိုင်းအောင်မြတ်တို့ အကြံဖန်ထုပြီး CB ဘဏ်ဉက္ကဌ ခင်မောင်အေးတို့ လုပ်တဲ့ စီမံကိန်း။ ဒေါ်စု လက်ထက်က ပတ်ဝန်းကျင်ထိန်းသိမ်းရေးအဖွဲ့က ကန့်ကွက်လို့ ရပ်ခိုင်းထားတာ။ အခုနောက်ပိုင်း လက်လွှဲရောင်းလိုက်ရင်တော့ မပြောတတ်ဘူး “ ဟု ၎င်းက ပြောသည်။

ပြီးခဲ့သည့် ၂၀၂၀ ခုနှစ်က တောင်ကြီးမြို့အထွက် ၂ မိုင်၊ ထင်းရှူးတောအတွင်း ဆောင်ရွက်နေသည့် ပန်းချယ်ရီ အိမ်ရာစီမံကိန်းသည် ထင်းရှူးပင်များ ခုတ်ထွင်ပြီး စီမံကိန်း လုပ်ဆောင်နေသည့်အပေါ် တောင်ကြီးမြို့ခံ အရပ်ဘက်လူမှု အဖွဲ့အစည်းများက ကန့်ကွက်ခဲ့ကြောင်းလည်း သိရသည်။