သျှမ်းပြည် လင်းခေးခရိုင် မောက်မယ်မြို့နယ် အတွင်း ပအိုဝ်းအမျိုးသား လွတ်မြောက်ရေး တပ်မတော် (PNLO/PNLA) နှင့် သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) တို့အကြား တိုက်ပွဲကြောင့် အရပ်သား တစ်ဦး ထိခိုက်ဒဏ်ရာရကြောင်း သိရသည်။

ပြီးခဲ့သည့် မေလ ၂၀ ရက် နံနက်ပိုင်းတွင် မောက်မယ်မြို့နယ်၊ နမ့်ဟူးကျေးရွာအုပ်စု ၊ ဟိုခိုင်းကျေးရွာ အနီး၌ RCSS/SSA နှင့် PNLO/PNLA တို့၏ တိုက်ပွဲကြား အရပ်သားတစ်ဦး ထိခိုက်ဒဏ်ရာရခြင်း ဖြစ်သည်။

လက်ရှိတွင် အဆိုပါ ထိခိုက်ဒဏ်ရာ ရသည့် အရပ်သား တစ်ဦးသည် ဝမ်းဗိုက်တွင် သေနတ်ကျည်ဆန် ထိမှန် ဒဏ်ရာရသွားကြောင်း နှင့် လက်ရှိတွင် RCSS/SSA တပ်ဖွဲ့က ဆေးကုသပေးထားလျက်ရှိကြောင်း RCSS/SSA ပြောရေးဆိုခွင့်ရှိသူ ဗိုလ်မှူးခမ်းစံက သျှမ်းသံတော်ဆင့်ကို ပြောသည်။

“ပစ်ခတ်မှု အပြီးမှာ ကျနော်တို့ တပ်သားတွေက မြေပြင်စစ်ဆေးတဲ့အခါမှာ သူတို့ (PNLA) စစ်သား ၅ ယောက်ရဲ့အလောင်းကို တွေ့ရတယ်၊ ပြီးတော့ ဖမ်းဆီးချုပ်နှောင်ထားခံရတဲ့ ရွာသား ၆ ယောက်ကို တွေ့ရတယ်၊ သူတို့ထဲ တစ်ယောက်က ဝမ်းဗိုက်မှာ သေနတ်မှန်ထားတယ်၊ အခုတော့ သူတို့ကို ကျနော်တို့ တပ်ဖွဲ့က လက်ခံဆေးကုပေး နေတယ်” ဟု ဗိုလ်မှူးခမ်းစံက သျှမ်းသံတော်ဆင့်ကို ပြောသည်။

အဆိုပါ ရွာသားများသည် ရှမ်း နှင့် ပအိုဝ်းလူများ ပါဝင်ပြီး မည်သည့်အကြောင်းကြောင့် ဖမ်းဆီးခေါ်ဆောင်ခံ ရတာကို စစ်ဆေးမေးမြန်းနေဆဲဖြစ်ကြောင်းလည်း ဗိုလ်မှူးခမ်းစံက သျှမ်းသံတော်ဆင့်ကို ပြောသည်။

လက်ရှိတွင် မြေပြင်တိုက်ပွဲများ ငြိမ်သက်သွားသော်လည်း ၎င်းတို့၏ လုံခြုံရေးအတွက် နေရပ်မပြန်ခိုင်းသေး ကြောင်း ဗိုလ်မှူးခမ်းစံက ဆက်ပြောသည်။

“ပစ်ခတ်မှုရော၊ စစ်ရေးတင်းမာမှုတွေရော မရှိပေမဲ့ ရွာသားတွေကိုတော့ ရွာထဲ ပြန်မပို့သေးဘူး၊ တကယ်လို့ ဆေးကုပေးပြီး၊ သူတို့ဆီက အကြောင်းရင်းကိုလည်း စစ်ဆေးမေးမြန်းပြီးပြီ ဆိုရင်တော့ သူတို့ သဘောဆန္ဒ အတိုင်း ပြန်ပို့ပေးမှာပါ။ အခုတော့ လုံခြုံရေးနေရာမှာ ခေါ်ထားပါတယ်” ဟု ဗိုလ်မှူးခမ်းစံကပြောသည်။

မောက်မယ်မြို့နယ်အတွင်း PNLO/PNLA နှင့် RCSS/SSA တို့အကြား ထိတွေ့တိုက်ပွဲ ဖြစ်ပွားခြင်းသည် အောက်ခြေ တပ်သားအချင်းချင်း ပစ်ခတ်ခြင်းသာ ဖြစ်ကြောင်း ဗိုလ်မှူးခမ်းစံက ပြောသည်။

“ဒီတိုက်ပွဲ ဖြစ်စဥ်ကို ပြောရမယ် ဆိုရင် နှစ်ပိုင်းရှိမယ်၊ တစ်ပိုင်းက အထက်လူကြီး အချင်းချင်းက နားလည်မှုရှိတယ်၊ အစည်းဝေးတွေ အတူတူထိုင်ဖြစ်တယ်၊ ဒါပေမဲ့ အောက်ခြေမှာက သူတို့လူကို သူတို့မထိန်းနိုင်ပဲ ကျနော်တို့ တပ်ဖွဲ့ကို လာလာချောင်းပစ်တယ်၊ ဒါကြောင့် ပစ်ခတ်မှုတွေ ဖြစ်ရတာ” ဟု ဗိုလ်မှူးခမ်းစံ က ဆက်လက်ပြောဆိုထားသည်။

ယင်းတိုက်ပွဲ ဖြစ်စဥ်နှင့် ပတ်သက်ပြီး PNLO ဘက်မှ ဗိုလ်မှူးခွန်မင်းသိမ်းကို ဖုန်းဆက်သော်လည်း ဖုန်းပြန်ချသွားသည်။

ပြီးခဲ့သည့် ဧပြီလဆန်းပိုင်းတွင်လည်း RCSS နှင့် PNLO တပ်ဖွဲ့သည် မောက်မယ်မြို့နယ် အတွင်း ၂ ကြိမ်ထက်မနည်း တိုက်ပွဲဖြစ်ပွားခဲ့ပြီး အရပ်သား (၃) ဦး မြေမြှုပ်မိုင်း နင်းမိခဲ့သေးကြောင်း သိရသည်။

RCSS/SSA နှင့် PNLO တပ်ဖွဲ့ နှစ်ဖွဲ့သည် NCA လက်မှတ် ရေးထိုးထားသည့် PPST အဖွဲ့ဝင် ဖြစ်သည့် အပြင် နှစ်ဖွဲ့စလုံးကလည်း စစ်ကောင်စီ နှင့် ငြိမ်းချမ်းရေးဆွေးနွေးမှု ဆက်လက် ပြုလုပ်နေသေးသည့် အဖွဲ့များ ဖြစ်ကြသည်။

ထို့အပြင် ပြီးခဲ့သည့် မေ ၁၇ – ၁၈ ရက်တွင်လည်း RCSS/SSA နှင့် PNLO/PNLA ကိုယ်စားလှယ်များ ပါဝင်သည့် NCA-S-EAO (၇) ၏ ထိပ်သီးမျက်နှာစုံညီ အစည်းအဝေးကို ထိုင်းနိုင်ငံ၊ ချင်းမိုင်မြို့တွင် ပြုလုပ်ခဲ့သည်။