သျှမ်းပြည် လွိုင်လင်ခရိုင် မိုင်းကိုင်မြို့နယ် လွယ်ယန်းကျေးရွာ ဒေသခံတစ်ဦး တောထဲသွားစဉ် ပစ်သတ်ခံရကြောင်း စုံစမ်းသိရှိရသည်။
ပြီးခဲ့သည့် မေလ ၁၉ ရက် လွယ်ယန်းကျေးရွာ ဒေသခံ အမျိုးသားတစ်ဦးသည် တောထဲ ကျွဲသွားကျောင်းချိန်တွင် လည်ပင်းမှာ သေနတ်ဒဏ်ရာဖြင့် သေဆုံးနေကြောင်း သိရသည်။
“ သူတောထဲမှာ ကျွဲသွားကျောင်းတာတဲ့။ အဲနေ့ကတည်းက ပြန်မလာတော့ဘူး။ တောထဲမှာ ပြန်ပြီး လိုက်သွားရှာတော့ သေနေတဲ့ အလောင်းပဲ ပြန်တွေ့တာ။ လည်ပင်းမှာ ပစ်သတ်ခံထားရတဲ့ ဒဏ်ရာနဲ့ သေနေတာ။ ပြီးတော့ မျက်နှာတွေလည်း ညိုနေတာ။ ရိုက်ခံရပြီး သတ်လိုက်တာလား မသိဘူး” ဟု လွယ်ယန်းဒေသခံ တစ်ဦးက ပြောသည်။
အဆိုပါ ရုပ်အလောင်းကို ယမန်နေ့ မေလ ၂၁ တွင် ပြန်တွေ့ခဲ့ပြီး ထိုအလောင်းတွေ့ရှိသည့်နေရာသည် ရှမ်းပြည်တိုးတက်ရေးပါတီ ၊ ရှမ်းပြည်တပ်မတော် SSPP/SSA လှုပ်ရှားသည့် နေရာဖြစ်သဖြင့် ဒေသခံများက SSPP/SSA သတ်သည်ဟု ယူဆကြသည်။
ထို့ကြောင့် လက်ရှိမှာ ဒေသခံများက အလုပ်သွားရန် နှင့် ကျွဲ ၊ နွားများကို ကျောင်းရန်အတွက် စိုးရိမ်နေလျက်ရှိ ကြောင်းသိရသည်။
“သူ့ကို သတ်တာ SSPP/SSA ထင်တယ်။ အဲ့ အဖွဲ့ပဲရှိတယ်။ ကျနော်တို့ ရွာနားမှာ သူတို့ ၁၉ ရက်နေ့ကလည်း လက်နက်ကြီးသံ ကြားလိုက်တယ်။ ၂၀ ရက်နေ့ ပြန်သွားရှာမယ်ဆိုတော့လည်း အဲ့ အဖွဲ့က မပေးသွားဘူး။ မသွားနဲ့တဲ့။ သူ့ ရုပ်အလောင်းကတော့ ၂၁ ရက်နေ့မှ ပြန်တွေ့တာ။ အခုတော့ တောတွေထဲသွားဖို့ ပြည်သူတွေက စိုးရိမ်နေကြတာပေါ့။ သိပ်မသွားရဲ ကြတော့ဘူး” ဟု လွယ်ယန်းရွာ ဒေသခံတစ်ဦးက ပြောသည်။
ထိုသတ်ဖြတ်ခံရသည့် အမျိုးသားသည် အသက် ၅၀ အရွယ်ရှိ ဦးပေါ်ထွေး ဖြစ်ပြီး လွယ်ယန်းကျေးရွာသည် မြို့ နှင့် ၅ မိုင်သာ ဝေးကွာကြောင်း ဒေသခံများ ပြောပြချက်အရ သိရသည်။
အဆိုပါ အမျိုးသား သတ်ဖြတ်ခံရသည့် ကိစ္စနှင့်ပတ်သက်၍ ရှမ်းပြည်တိုးတက်ရေးပါတီ ၊ ရှမ်းပြည်တပ်မတော် SSPP/SSA ပြောရေးဆိုခွင့်ရှိသူ ဒု – ဗိုလ်မှူးကြီး စိုင်းဆု နှင့် ဗိုလ်မှူး ဖုန်းဟန် တို့ကို ဖုန်းဆက်သွယ်ခဲ့သော်လည်း ဖုန်းစက်ပိတ်ထားသည်။
မိုင်းကိုင်မြို့နယ်ထဲတွင် စစ်ကောင်စီတပ် နှင့် ရှမ်းပြည်တိုးတက်ရေးပါတီ ၊ ရှမ်းပြည်တပ်မတော် SSPP/SSA တို့က သွားလာလှုပ်ရှားသည့်နယ်မြေဖြစ်ကြောင်း သိရသည်။
Leave a Comments