သျှမ်းပြည် လားရှိုးမြို့တွင် စစ်ကောင်စီ အပါအဝင် ပြည်သူ့စစ်၊ တိုင်းရင်းသား လက်နက်ကိုင်တပ်ဖွဲ့များ လှုပ်ရှားရာနေရာ၊ လက်နက်ကိုင်တပ်ဖွဲ့ပေါများသည့် ဒေသတစ်ခုဖြစ်သော်လည်း နေ့ခင်းချိန်တွင် ဓားပြတိုက်မှု မကြာခဏဖြစ်ပွားနေကြောင်း ဒေသခံများ ပြောပြချက်အရ သိရသည်။
ယမန်နေ့ (မေလ ၁၈ ရက်) နေ့လယ် ၁၂ နာရီဝန်းကျင်တွင် လားရှိုးမြို့ ရပ်ကွက် ၁၁ အတွင်းရှိ နေအိမ်တစ်လုံးထဲသို့ အမည်မသိ တရုတ်စကားပြောဆိုနေသည့် အမျိုးသား ၄ ဦး က သေနတ်ဖြင့် ခြိမ်းခြောက်ပြောဆိုပြီး ဓားပြတိုက်သွားခဲ့ရာ ကျပ်သိန်း ၂၀၀ ကျော် ပါသွားကြောင်း လားရှိုးမြို့ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ဟုတ်တယ်။ နေအိမ် တစ်လုံးကို ဝင်ပြီး ဓားပြတိုက်သွားတာ တရုတ်ယွမ်ငွေ ၃ သောင်းလောက် ပါသွားတယ်။ အိမ်ထဲက လူတွေကို သေနတ်နဲ့ ထောက်တယ်။ သေနတ်နဲ့ ထောက်ပြီး ထိုင်ခိုင်းတယ်။ ပြီးတော့ အိမ်ထဲမှာရှိတဲ့ ပစ္စည်းတွေကို အကုန်ယူသွားတာ။ သူတို့ အချင်းချင်းက တရုတ်စကားတွေ ပြောနေတယ် “ ဟု ၎င်းအမျိုးသမီးတစ်ဦးက ပြောသည်။
အဆိုပါ အိမ်ထဲရှိ တရုတ်ယွမ်ငွေ ၃ သောင်းအပြင် ဆိုင်ကယ် ၁ စီး၊ ရွှေဆွဲကြိုး ၂ ကွင်း၊ လက်စွပ် ၂ ကွင်း နှင့် ဖုန်း ၄ လုံးလည်း ဓားပြတိုက်အဖွဲ့ဝင် အမျိုးသား ၄ ဦးက ယူဆောင်သွားခဲ့ကြောင်း သိရသည်။
ထို့အပြင် လားရှိုးမြို့တွင် စစ်ကောင်စီ၊ ပြည်သူ့စစ် နှင့် တိုင်းရင်းသားလက်နက်ကိုင်တပ်ဖွဲ့များ လှုပ်ရှားနယ်မြေ တစ်ခုဖြစ်သော်လည်း အဆိုပါ ခိုးဆိုးလုယက်၊ ဓားပြတိုက်မှု ကျုးလွန်သူကို လက်နက်ကိုင်တပ်ဖွဲ့များအနေဖြင့် ထိရောက်စွာ ဖမ်းဆီးအရေးယူ ဆောင်ရွက်နိုင်ခြင်း မရှိသေးကြောင်း ဒေသခံများက ပြောသည်။
“ ရဲတွေလည်း ဘာမှ လုံခြုံရေး မလုပ်ပေးနိုင်ဘူး။ သူတို့ ကိုယ်တိုင်တောင်မှ မနည်းလုံခြုံရေး ယူနေရတာ။ ကျွန်မတို့လည်း ကိုယ်တိုင် လုံခြုံရေး လုပ်ရတာပေါ့။ ဘယ်အဖွဲ့အစည်းမှ အားကိုးလို့ မရဘူး။ တစ်နေနေရာကတော့ ခိုးလိုက်ရပြီ၊ ဓားပြတိုက်ခံလိုက်ရပြီ၊ သတ်ခံရပြီဆိုပြီး သတင်းထဲပါလာရင် တစ်ခါမှ ဖမ်းမိတာ မရှိဘူး။ လမ်းမမှာ ဆိုင်ကယ်ကို အတင်းဆွဲပြီး အချင်းချင်း အပြန်အလှန် ရိုက်သတ်နေတဲ့သူလည်း မဖမ်းမိဘူး။ အဲ့ကြောင့် ကျုးလွန်တဲ့သူတွေက ပိုရဲလာတာ “ ဟု ၎င်းက ထပ်လောင်းပြောသည်။
လားရှိုးမြို့နယ်တွင် စစ်ကောင်စီတပ်ဖွဲ့ အပါအဝင် မန့်နားပြည်သူ့စစ်၊ ကောင်းခါးပြည်သူ့စစ် (KDA)၊ တိုင်းရင်းသားလက်နက်ကိုင်များ ဖြစ်သည့် သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA)၊ ကိုးကန့်တပ်မတော် (MNDAA)၊ တအာင်း (ပလောင်) အမျိုးသားလွတ်မြောက်ရေးတပ်မတော် (TNLA) စသည်ဖြင့် လက်နက်ကိုင်တပ်ဖွဲ့များ လှုပ်ရှားနေလျက်ရှိသည်။
စစ်တပ်က အာဏာသိမ်းပြီးနောက် လားရှိုးမြို့အပြင် မူဆယ်၊ နမ့်ခမ်း၊ ကွတ်ခိုင်နှင့် တာချီလိတ် စသည့် မြို့ပြကြီးတွင် ခိုးဆိုးလုယက်၊ ဓားပြတိုက်မှု၊ လိမ်လည် လှည့်ဖြားရောင်းချမှုများလည်း မကြာခဏ ဖြစ်ပွားနေကြောင်း သိရသည်။
ပြီးခဲ့သည့် မေလ ၁၆ ရက် မူဆယ်မြို့တွင် ကားသမားတစ်ဦးကို အမျိုးသား ၂ ဦးက သေနတ်အတုဖြင့် ခြိမ်းခြောက်ပြီး ကားကိုလုယူသွားသည့် ဓားပြတိုက်မှု တစ်ကြိမ်ဖြစ်ပွားခဲ့သလို နမ့်ခမ်းမြို့တွင် နေအိမ် ၃ လုံး၏ အိမ်ခြံဝန်းတံခါးသော့ ဖျက်ဆီးခံရပြီး ဆိုင်ကယ် ၃ စီး ခိုးခံရမှု ဖြစ်ပွားခဲ့သည်။
