သျှမ်းပြည် နမ့်ခမ်းမြို့တွင် ယခု သီတင်းတပတ်အတွင်း ပြည်သူနေအိမ်၏ အိမ်ခြံဝန်းတံခါးများသော့ ဖျက်ဆီးခံရပြီး ဆိုင်ကယ် ၃ စီး ခိုးခံနေရကြောင်း စုံစမ်းသိရသည်။
ယခု သီတင်းပတ်အတွင်း မိုခါမုန်တိုင်းဝင်ရောက်နေစဉ် ကာလ၌ ညသန်းခေါင်အချိန်တွင် ပေါက်နေရပ်ကွက်မှ နေအိမ်တစ်လုံး၊ ပေါက်လုံရပ်ကွက်မှ နေအိမ်တစ်လုံး နှင့် ဟိုနောင်ရပ်ကွက်မှ နေအိမ်တစ်လုံး စုစုပေါင်း နေအိမ် ၃ လုံးသည် အိမ်ခြံဝန်း တံခါးသော့ ဖျက်ဆီးခံရပြီး ဆိုင်ကယ် ၃ စီး ခိုးခံနေရကြောင်း နမ့်ခမ်းဒေသခံ အမျိုးသားတစ်ဦးက ပြောသည်။
“ ဒီတစ်ပတ်အတွင်း ဖြစ်သွားတာဗျ။ ညဖက်သန်းခေါင်ကျော်အချိန် မိုးကြီးလေပြင်း တိုက်ခတ်နေတုန်း ဝင်ခိုးသွားတာ။ အိမ်ခြံဝန်းတံခါးကို ဖြတ်တယ်။ တချို့နေရာမှာတော့ အိမ်ခြံဝန်းတံခါးရဲ့ သော့ကို သံလွှ နဲ့ ဖြတ်တယ်။ တစ်ခါ သော့ကို မဖြတ်ဘဲ သူတို့မှာရှိတဲ့ နည်းတွေနဲ့ သော့ကိုဖွင့်ပြီး ဝင်ခိုးတယ်။ ဆိုင်ကယ် ၃ စီးပါသွားတယ် “ ဟု ၎င်းက ပြောသည်။
အဆိုပါ ခိုးခံရသည့် ဆိုင်ကယ်များဟာ DT ဆိုင်ကယ် အမျိုးအစားတစ်စီးအပါအဝင် ထိုင်းနိုင်ငံထုတ် SCOOPY တစ်စီးနှင့် (125) ဆိုင်ကယ်တစ်စီး ခိုးခံရကြောင်း သိရသည်။
ထို့အပြင် နမ့်ခမ်းမြို့တွင် မူးယစ်ဆေးဝါး၊ လောင်းကစားဝိုင်းနှင့် ဂိမ်းဆိုင်များ ပေါများလာခြင်းကြောင့် ထိုမှတစ်ဆင့် သူခိုး၊ ဓားမြများလည်း ပေါများလာနေရာ ပြည်သူများ၏ လုံခြုံရေးသည် ပိုမိုဆိုးရွား လာနေကြောင်း ၎င်းကဆက်ပြောသည်။
“ ဘာမှကို စိတ်မချရတော့ဘူး။ ဒါတောင် အိမ်ခြံဝန်းထဲရှိတာမှ ခိုးခံရတယ်ဆိုတော့ အပြင်မှာထားတဲ့ ပစ္စည်းတွေ၊ ဆိုင်ကယ်တွေလည်း မကြာခဏ ခိုးခံနေရတယ်။ လောင်းကစားဝိုင်းတွေ၊ ဂိမ်းဆိုင်တွေ အဖွင့်များလာတာနဲ့ အဲ့ကနေလူတွေက လာခိုးတာများတယ် “ ဟု ၎င်းက ထပ်လောင်းပြောသည်။
နမ့်ခမ်းမြို့ သာယာကုန်းတွင် လောင်းကစားဝိုင်းနှင့် ဂိမ်းဆိုင်များ ဖွင့်လှစ်နေလျက်ရှိပြီး ပြည်သူ့စစ်များက ဦးဆောင်၍ စစ်ကောင်စီ နှင့် တိုင်းရင်းသားလက်နက်ကိုင် တပ်ဖွဲ့များကို အခွန်ဆောင်ပြီး ဖွင့်လှစ်နေခြင်း ဖြစ်သည်။
နမ့်ခမ်းမြို့တွင် စစ်ကောင်စီတပ်ဖွဲ့၊ ပြည်သူ့စစ်တပ်ဖွဲ့ နှင့် တိုင်းရင်းသားတပ်ဖွဲ့များ လှုပ်ရှားနေသည့် ဒေသဖြစ်သော်လည်း သူခိုး၊ ဓားပြ များကို ဖမ်းဆီးအရေးယူဆောင်ရွက်ခြင်း တစ်စုံတစ်ရာ မရှိသည့်အပြင် ပြည်သူများထံ အခွန် (ဆက်ကြေး) ကောက်ခံနေလျက်ရှိကြောင်း ဒေသခံများ၏ ပြောပြချက်အရ သိရသည်။
Leave a Comments