သျှမ်းပြည် တောင်ကြီးခရိုင် ပင်လောင်းမြို့ စစ်ရှောင်လူငယ် အမျိုးသားတစ်ဦး နေရပ်ပြန်သွားစဥ် မိုင်းနင်းမိပြီး ခြေထောက်ဒဏ်ရာ ပြင်းထန်စွာ ရရှိကြောင်း စုံစမ်းသိရသည်။
ပြီးခဲ့သည့် မေလ ၁၁ ရက်တွင် ပင်လောင်းမြို့နယ် ဝါးလီးစစ်ဘေးရှောင်စခန်းမှ လုံးပျဉ်ကျေးရွာအုပ်စု ပင်ပုံရွာသို့ နေရပ်ပြန်သွားသည့် အသက် ၂၀ အရွယ်ရှိ စစ်ရှောင်လူငယ်တစ်ဦးသည် ရွာအနီးရောက်စဥ် မိုင်းနင်းမိပြီး ညာဖက်ခြေထောက် ကြေမွသွားကြောင်း ပင်လောင်း စစ်ရှောင်ကူညီနေသူ ဒေသခံ တစ်ဦးက သျှမ်းသံတော်ဆင့်ကိုပြောသည်။
ထို့ပြင် ပေါက်ကွဲသွားသည့် မိုင်းစများကြောင့် ခန္ဓာကိုယ်အနှံ့ ထိခိုက်ဒဏ်ရာ ရရှိခဲ့ကြောင်း သိရသည်။
“ သူက လုံးပျဉ်ဖက်ကို ခဏ ပြန်သွားတာဗျ။ ရွာအနီးအနားက လူသွားတဲ့ လမ်းကြားမှာ မိုင်းနင်းမိတာ။ ညာဖက်ခြေထောက် တစ်ချောင်းတော့ ဖြတ်ရမယ်။ ပြတ်သွားပြီလို့ ပြောတယ်။ ခန္ဓာကိုယ် အနံ့လည်း မိုင်းစကြောင့် ထိခိုက်ဒဏ်ရာတွေ ရထားတယ် “ ဟု ၎င်းက ပြောသည်။
အဆိုပါ မိုင်းနင်းမိသူ စစ်ဘေးရှောင်တစ်ဦးသည် အသက် ၂၀ နှစ်ကျော် အမျိုးသားတစ်ဦးဖြစ်ပြီး လက်ရှိမှာ တောင်ကြီးဆေးရုံတစ်ခု၌ ဆေးဝါးကုသမှု ခံယူနေရသလို ကုသမှု ကုန်ကျစရိတ်လည်း အခက်ခဲရှိနေကြောင်း သိရသည်။
ထို့အပြင် စစ်ကောင်စီတပ်ဖွဲ့ နှင့် ပြည်သူ့ကာကွယ်ရေးတပ်ဖွဲ့ PDF ပူးပေါင်းတပ်ဖွဲ့တို့ တိုက်ပွဲဖြစ်ပွားရာဒေသဖြစ်သည့် တောင်မဲသင်း၊ တောင်စလုံး၊ မြောက်စလုံး၊ လုံးပျဉ်၊ ပုံပင် စသည့်ကျေးရွာများတွင် မြေမြှုပ်မိုင်းပေါများသည့်အတွက် လက်ရှိအခြေအနေမှာ ပြည်သူများအနေဖြင့် နေရပ်မပြန်သင့်သေးကြောင်း PNDF KK မှ တာဝန်ခံ ခွန်ဗွေဟုန်း ကပြောသည်။
“ပင်လောင်း နဲ့ ဖယ်ခုံဒေသမှာ စစ်ကောင်စီတွေက အင်အားတိုးလာလေ သူတို့ ရောက်တဲ့နေရာ၊ ရွာတွေမှာ မြေမြှုပ်မိုင်းတွေ ထောင်ထားခဲ့တတ်တယ်။ ပြီးတော့ ဒီအချိန်မှာ တိုက်ပွဲဖြစ်တဲ့ဒေသမှာ နေရပ် မပြန်တာ အကောင်းဆုံးပဲ။ အဓိကတော့ ဆင်ခြင်ရမှာပေါ့။ အဲ့လိုကြားရရင် ကျနော်တို့လည်း စိတ်မကောင်းဘူး။ ဘာမှ မလုပ်ပေးနိုင်ဘူး “ ဟု ၎င်းက ပြောသည်။
ပြီးခဲ့သည့် မတ်လ ၁၁ ရက်က စစ်ကောင်စီသည် နိမ့်နိန်းကျေးရွာဘုန်းကြီးကျောင်းတွင်
ခိုလှုံနေသည့် ဘုန်းကြီး ၃ ပါး နှင့် အရပ်သား ၁၈ ဦး သတ်ဖြတ်ခံရသည်။
Leave a Comments