တိုင်းရင်းသား လက်နက်ကိုင် တော်လှန်ရေး အဖွဲ့အစည်းများ၏ ငြိမ်းချမ်းရေး လုပ်ငန်းစဉ် ဦးဆောင်အဖွဲ့ (PPST) အဖွဲ့ဝင် NCA-S-EAO (၇) ဖွဲ့သည် အမျိုးသား စည်းလုံးညီညွတ်ရေး နှင့် ငြိမ်းချမ်းရေး ဖော်ဆောင်မှု ညှိနှိုင်းရေးမှူး ကော်မတီ (NSPNC) ဆိုင်ရာကို ကိစ္စရပ်များကို ဆွေးနွေးသွားမည်ဟု စုံစမ်းသိရသည်။
အဆိုပါ တွေ့ဆုံမှုကို ချင်းမိုင်တွင် မေ (၁၇) ရက်မှ (၁၈) ရက်ထိ ပြုလုပ်ကျင်းပသွားမည်ဖြစ်ကြောင်း PPST ပြောရေးဆိုခွင့်ရှိသူ ဗိုလ်မှူးကြီး စောကျော်ညွှန့်က သျှမ်းသံတော်ဆင့် ကိုပြောသည်။
“ဟုတ်ပါတယ်၊ တွေ့ဆုံဆွေးနွေးမှုက နှစ်ရက် လုပ်မှာပါ။ မေ (၁၇) နဲ့ (၁၈) လုပ်မှာပါ။ အဓိက ဆွေးနွေးမှာကတော့ ပြီးခဲ့တဲ့ မတ်လထဲက ကျနော်တို့ NCA-S-EAO (၇) ဖွဲ့နဲ့ NSPNC နဲ့ အလွတ်သဘောတွေ့ဆုံမှု အကြောင်းကို အဖွဲ့ တွင်း ပြန်လည်ဆွေးနွေးကြမှာပေါ့နော်” ဟု ဗိုလ်မှူးကြီး စောကျော်ညွှန့်က ဆိုသည်။
ပြီးခဲ့သည့် မတ်လ ၂၈ ရက်နေ့တွင် NCA-S-EAO (၇) ဖွဲ့ နှင့် NSPNC တို့ နေပြည်တော်တွင် အလွတ်သဘော တွေ့ဆုံဆွေးနွေးခဲ့သည်။
ထို့အပြင် ယခုတကြိမ် တွေ့ဆုံဆွေးနွေးမှုသည် NSPNC နှင့် နောက်တစ်ကြိမ် တွေ့ဆုံဆွေးနွေးရန်အတွက်လည်း ထည့်သွင်းဆွေးနွေးမည် ဟု ကြားသိထားရသည်။
“NSPNC နဲ့ တွေ့ဆုံမှုကနေ ရရှိတဲ့ သဘောထား မှတ်ချက်တွေအရတော့ အားလုံး ၈ ချက်ရှိပါတယ်၊ နောက် တကြိမ် NSPNC နဲ့ ထပ်မံတွေ့ဆုံဖို့လည်း ပါတယ်၊ ဒါကြောင့် ဒီနှစ်ရက်တာ ကျင်းပတဲ့ ဆွေးနွေးမှုမှာ ဒီအချက် ကိုလည်း ဆွေးနွေးဖြစ်ကြမှာပါ” ဟု ဗိုလ်မှူးကြီး စောကျော်ညွှန့်က ပြောသည်။
ချင်းမိုင်တွင်တွေ့ဆုံမည့် NCA-S-EAOs (၇) ဖွဲ့မှာ မွန်ပြည်သစ်ပါတီ (NMSP) ၊ ရခိုင်ပြည်လွတ်မြောက်ရေးပါတီ (ALP)၊ ဒီမိုကရေစီ အကျိုးပြု ကရင့်တပ်မတော် (DKBA)၊ ကရင် အမျိုးသားအစည်းအရုံး/ကရင်အမျိုးသား လွတ်မြောက်ရေး တပ်မတော် ငြိမ်းချမ်းရေးကောင်စီ (KNU/ KNLA-PC) ၊ လားဟူဒီမိုကရက်တစ် အစည်းအရုံး (LDU)၊ ပအိုဝ်း အမျိုးသားလွတ်မြောက်ရေးအဖွဲ့ချုပ် (PNLO) နှင့် သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) တို့ ပါဝင်ကြောင်း သိရသည်။
