သျှမ်းပြည် မူဆယ်ခရိုင် ကွတ်ခိုင်မြို့နယ်၊ ကောင်းလိန်ကျေးရွာအုပ်စု ကောင်းလိန်ကျေးရွာ နှင့် မန်လုံ ကျေးရွာတို့မှ နေရပ်ပြန်သည့် စစ်ဘေးရှောင်များသည် နေအိမ်ပြန်ဆောက်ရန်အတွက် အကူအညီ လိုအပ်နေကြောင်း စုံစမ်းသိရသည်။

အဆိုပါ စစ်ဘေးရှောင်များသည် ပြီးခဲ့သည့် ၂၀၁၈ ခုနှစ် စစ်ကောင်စီတပ် နှင့် ကချင်လွတ်မြောက်ရေး တပ်မတော် KIA တပ်တို့ ဒေသအတွင်း တိုက်ပွဲဖြစ်ပွားမှုကြောင့် ကွတ်ခိုင်မြို့ပေါ်သို့ ၅ နှစ်ကျော် စစ်ရှောင် ထွက်ပြေးခဲ့ရာမှ ယခုနှစ် ၂၀၂၃ ခုနှစ် နှစ်ဆန်းပိုင်း ကာလတွင် နေရပ်ပြန်သွားခဲ့ကြသည်။

အဆိုပါ စစ်ရှောင်များသည် ၂၀၂၃ ခုနှစ် မတ်လကုန်ပိုင်းမှ စတင်ကာ ကွတ်ခိုင်မြို့ နှင့် ၇ မိုင်ခန့် ကွာဝေးသည့် နေရပ် သို့ ပြန်လည်ရောက်ရှိပြီး ဖြစ်သော်လည်း နေရာထိုင်ခင်းအတွက် နေအိမ်များ ပြန်လည်တည်ဆောက်ရာတွင် အခက်အခဲ ရှိပြီး အကူအညီများ လိုအပ်နေကြောင်း စစ်ရှောင်ကူညီသူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“သူတို့ စစ်ရှောင်လာကြတာလည်း ကြာပြီဆိုတော့ ပြန်သွားတဲ့အချိန် အိမ်တွေကလည်း ပျက်စီးကုန်ကြပြီ၊ မိုးကာ တဲတွေ၊ ယာယီတဲတွေ ဆောက်ပြီး နေနေကြတာပေါ့၊ နေအိမ်ပြန်ဆောက်ဖို့ အကူညီတွေ လိုအပ်နေပါတယ်” ဟု စစ်ရှောင်ကူညီပေးနေသူ အမျိုးသမီးက သျှမ်းသံတော်ဆင့်ကို ပြောသည်။

လက်ရှိ အချိန်သည် မိုးရာသီလည်း ဖြစ်နေသည့်အတွက် နေရပ်ပြန်သွားသည့် စစ်ရှောင်များ ဆောက်ထားသည့် မိုးကာတဲ ၊ ယာယီတဲများက မလုံလောက်သဖြင့် အခက်အခဲ ရင်ဆိုင်နေရကြောင်းလည်း စစ်ရှောင်ကူညီ ပေးနေ သူက ဆက်ပြောသည်။

“သူတို့က အခက်အခဲ မျိုးစုံ ရင်ဆိုင်နေရပါတယ်၊ စားဖို့သောက်ဖို့က အစ ရှားပါးတယ်၊ အဓိက ကတော့ နေထိုင်ဖို့ မိုးကာတဲတွေ၊ ယာယီတဲတွေကလည်း မိုးမလုံ လေမလုံဖြစ်နေတယ်၊ မိုးရွာရင် အရမ်းဒုက္ခရောက်တယ်၊ မနေ့ တနေ့ က မိုးရွာလိုက်တာ အားလုံးနီးပါး စိုကုန်တယ်” ဟု အထက်ပါ ပုဂ္ဂိုလ်က ဆက်ပြောသည်။

လက်ရှိတွင် နေအိမ်ဆောက်လုပ်ရန်အတွက် သောက်ရေ၊ အစားအစာ၊ လျှပ်စစ်မီး၊ ဆေးဝါး နှင့် ငွေကြေး ထောက်ပံ့မှု အကူအညီများ အရေးပေါ် လိုအပ်နေကြောင်း ၎င်းက ဆက်ပြောသည်။

နေရပ်ပြန် စစ်ရှောင်ပြည်သူများအနေဖြင့် မိုးတွင်းကာလရောက်လာသည့်အတွက် နေအိမ်ခက်ခဲမှု ဖြေရှင်းချင် သော်လည်း ကူညီထောက်ပံ့မှုများ မရရှိသောကြောင့် အခက်ခဲများစွာ ရှိနေကြောင်း သိရသည်။

လက်ရှိ မန်လုံ‌ကျေးရွာတွင် အိမ်ထောင်စု ၃၂ စု နှင့် လူဦးရေ ၁၆၀ ရှိပြီး ကောင်းလိန်ကျေးရွာတွင် အိမ်ထောင်စု ၁၅ စု နှင့် လူဦးရေ ၁၀၀ ဝန်းကျင်ရှိကြောင်း သိရသည်။