သျှမ်းပြည် လားရှိုးခရိုင် သီန္နီမြို့ အမှတ် (၃) ရပ်ကွက်၊ ပိန်အွယ်ကုန်း ဝါးရုံတောထဲ၌ အိမ်ခြေမဲ့အဖြစ် နေထိုင်သည့် အမျိုးသားတစ်ဦး ရာသီဥတု အအေးဒဏ်ကြောင့် သေဆုံးသွားကြောင်း စုံစမ်းသိရသည်။
ယမန်နေ့ (မေလ ၁၄) ရက် ညပိုင်းတွင် အေးခဲသည့် ရာသီဉတုနှင့် ရင်ဆိုင်ခဲ့ရခြင်းကြောင့် အအေးမိပြီး သေဆုံးသွားခဲ့ပြီး အလောင်းကို ယနေ့ နေ့လယ်ပိုင်းတွင် သွားရောက်သယ်ယူရာ မီးသင်္ဂြိုလ်စက်သို့ ပို့ဆောင်ပေးခဲ့ကြောင်း ၎င်းကိုသွားရောက်ကူညီသည့် အနိုင်းမဲ့ကုသိုလ် လူမှုကူညီရေးအသင်းမှ စိုင်းဂွတ်က ပြောသည်။
“ မူးယစ်ဆေးဝါးသုံးစွဲပြီး အိမ်ခြေမဲ့အဖြစ် နေထိုင်တဲ့သူပါ။ မနေ့ညက ရာသီဉတု အေးတာနဲ့ ရှော့ဖြစ်ပြီး သေဆုံးသွားတာ ဖြစ်နိုင်တယ်။ မနေ့ ရာသီဉတုက အရမ်းအေးတယ်။ သေသွားတဲ့သူ ဘယ်သူ၊ ဘယ်ဝါ မှန်းတော့ မသိဘူး “ ဟု ၎င်းက ပြောသည်။
အဆိုပါ သေဆုံးသွားသူသည် အသက် ၃၅ နှစ်ဝန်းကျင် အမျိုးသားတစ်ဦး ဖြစ်ပြီး အမည်နှင့် နေရပ်လိပ်စာကို မသိရှိရကြောင်း ၎င်းကဆက်ပြောသည်။
စစ်တပ်က အာဏာသိမ်းပြီးနောက်ပိုင်းမှ သိန္နီမြို့တွင် မူးယစ်ဆေးဝါး သုံးစွဲသူများ ပေါများလာနေပြီး အဆိုပါ မူးယစ်ဆေးဝါးကြောင့် အိမ်ခြေမဲ့အဖြစ် နေထိုင်သူ ပျှမ်းမျှတစ်မြို့လုံးမှာ လူဦးရ ၁၀၀ ကျော် ရှိကြောင်း သိရသည်။
မူးယစ်ဆေးဝါးသုံးစွဲပြီး အိမ်ခြေမဲ့အဖြစ် နေထိုင်သူ လူဦးရေ ၁၀၀ ကျော်အနက် တစ်လလျှင် ၁ ဦး သေဆုံးနေလျက်ရှိပြီး အေးခဲလာသည့် ရာသီဉတုနှင့် ရင်ဆိုင်ရပါက အိမ်ခြေမဲ့နေထိုင်သူများ သေဆုံးမှု မြင့်တက်နိုင်ကြောင်းလည်း ၎င်းကထပ်လောင်းပြောသည်။
