Thursday, June 20, 2024

မိုးကြီးလေပြင်းတိုက်ခတ်မှုကြောင့် စစ်ရှောင်ယာယီတဲများ ပျက်စီး၊ ပြန်ဆောက်ဖို့ အကူညီလိုအပ်နေ

Must read

သျှမ်း-ကယား နယ်စပ်ဒေသတလျောက်ရှိ စစ်ဘေးရှောင်စခန်းများတွင် မိုးကြီးလေပြင်း တိုက်ခတ်မှုကြောင့် ယာယီတဲ အဆောက်အအုံများ ပျက်စီးသွားပြီး ပြန်လည်တည်ဆောက်ဖို့ အကူညီလိုအပ်နေကြောင်း စုံစမ်းသိရှိရသည်။

ဖယ်ခုံအရှေ့ဘက်ခြမ်း စစ်ရှောင်စခန်း

ယမန်နေ့ (မေလ ၁၅) ရက် နံနက်ပိုင်းမှစပြီး သျှမ်း-ကယားနယ်စပ်ဒေသ တလျောက်ရှိ ဖယ်ခုံ၊ မိုးဗြဲနှင့် ပင်လောင်းတွင် မိုးကြီးလေပြင်း တိုက်ခတ်ခဲ့ပြီး ကရင်နီ (ကယား) ပြည် ဒီးမော့ဆိုမြို့နယ်တွင်လည်း မိုးကြီးလေပြင်းတိုက်ခတ်မှုကြောင့် စစ်ဘေးရှောင်စခန်းရှိ ယာယီတဲ၊ အဆောက်အအုံ ပျက်စီးမှုများ ရှိနေကြောင်း ဒီးမော့ဆို စစ်ဘေးရှောင်ကူညီသူ ဒေသခံတစ်ဦးက ပြောသည်။

“ မိုးကတော့ရွာနေတာ အခုထိမနားသေးဘူး။ လေတွေလည်း တိုက်တယ်။ ဒီးမော့ဆို၊ ဖရူဆို၊ မိုးဗြဲ ဒေသတွေမှာ အကုန်ပဲ မိုးမနားဘူးရွာနေတာ၊ လေတိုက်တာကော အရမ်းအေးတယ်။ အေးချက်ကလည်း ဆောင်းတွင်းထက် လွန်တယ်။ စစ်ဘေးရှောင်စခန်းတွေလည်း ပျက်စီးမှုများတယ် “ ဟု ၎င်းက ပြောသည်။

အဆိုပါ မိုးကြီးလေပြင်းတိုက်ခတ်မှုကြောင့် စစ်ဘေးရှောင်စခန်းရှိ ယာယီတဲ၊ အဆောက်အအုံများ ပျက်စီးမှုများ ရှိခဲ့သော်လည်း ဖုန်းလိုင်းပြတ်တောက်ခြင်းကြောင့် အသေးစိတ်အခြေအနေကိုတော့ မသိရသေးကြောင်း ၎င်းကဆက်ပြောသည်။

အလားတူ ဖယ်ခုံမြို့နယ် အရှေ့ဖက်ခြမ်းတွင်လည်း မေလ ၁ ရက်တွင် လေပြင်းတိုက်ခတ်မှုကြောင့် ဒေသခံ နေအိမ် ၁၀ လုံးထက်မနည်း အိမ်ခေါင်မိုးများ လွှင့်ထွက်ခဲ့ပြီး ယနေ့ မိုးကြီးလေပြင်းတိုက်ခိုက်မှုနှုန်းကြောင့် နေအိမ်ပျက်စီးရသည့်အဆင့်ထိ မရှိသေးကြောင်း ဖယ်ခုံမြို့ဘုန်းကြီးတစ်ပါး မိန့်ကြားသည်။

ဖယ်ခုံအရှေ့ဘက်ခြမ်း စစ်ရှောင်စခန်း

“ ဖယ်ခုံမှာတော့ မိုးကြီးတယ်။ မနေ့ကတည်းက မိုးကြီးရွာနေတာ၊ အပျက်အစီးတွေတော့ မကြားရသေးဘူး။ ရေကြီးရေလျှံလောက်တဲ့အဆင့်ထိတော့ မစိုးရိမ်ရသေးဘူး “ ဟု ဖယ်ခုံမြို့ ဘုန်းကြီးတစ်ပါးက ပြောသည်။

ထို့အပြင် ဖယ်ခုံ-ပင်လောင်း နယ်စပ်ဒေသရှိ တောင်စလုံးနှင့် မြောက်စလုံးရွာတွင် မိုးကြီးလေပြင်း တိုက်ခတ်နေသည့်ကြားထဲ၌ တိုက်ပွဲသည် နေ့စဉ်နီးပါး ဖြစ်ပွားနေဆဲကြောင်း ၎င်းဘုန်းကြီးတစ်ပါးက ထပ်လောင်းပြောသည်။

“ တောင်စလုံး၊ မြောက်စလုံးဖက်မှာတော့ တိုက်ပွဲတွေက နေ့တိုင်းလိုလို ဖြစ်နေတယ်။ စစ်ကောင်စီက မြို့ပေါ်ကနေ ဖယ်ခုံအင်းရဲ့ အရှေ့ဖက်ကို ပစ်လိုက်၊ အနောက်ဖက်ခြမ်းကို ပစ်လိုက်နဲ့ တိုက်ပွဲက ဆက်ဖြစ်နေတယ်။ စစ်ဘေးရှောင်လည်း ထွက်ပြေးနေတုန်းပဲ “ ဟု ၎င်းဘုန်းကြီးတစ်ပါးက မိန့်ကြားသည်။

ဖယ်ခုံမြို့ပေါ် မိုးကြီးလေကြီး နေအိမ်ပျက်စီး

လက်ရှိမှာ မိုးကြီးလေပြင်းတိုက်ခိုက်မှုကြောင့် ဖယ်ခုံ၊ မိုးဗြဲ နှင့် ပင်လောင်းဒေသရှိ တောတောင်အတွင်းမှ စစ်ဘေးရှောင်များသည် ဖုန်းလိုင်းမမိခြင်း၊ ဖုန်းလိုင်းပြတ်တောက်ခြင်း အခက်ခဲအခြေအနေကို ရင်ဆိုင်နေရကြောင်း သိရသည်။

မိုးလေဝသ နှင့် ဇလဗေဒညွန်ကြားမှု ဦးစီးဌာန၏ ထုတ်ပြန်ကြေညာချက်အရ သျှမ်းပြည်နယ်အပါအဝင် ကချင်ပြည်နယ်၊ စစ်ကိုင်းတိုင်းဒေသကြီးနှင့် မန္တလေးတိုင်းဒေသကြီးတို့မှာ အမြင့်ဆုံးလေတိုက်နှုန်း တစ်နာရီလျှင် မိုင် (၄၀) ခန့် ရှိကြောင်း သတိပေးထားသည်။

Leave a Comments

- Advertisement -spot_img

Latest article