သျှမ်းပြည် လွိုင်လင်ခရိုင် ခိုလမ်မြို့ ဟိုနားကျေးရွာအုပ်စု မက်မုန်လောင်း (နမ့်လင်း) ကျေးရွာ တအာင်း (ပလောင်) တိုင်းရင်းသားများနေထိုင်သည့် ကျေးရွာထဲတွင် ဆိုလာပြားမှ တစ်ဆင့် မီးလောင်မှု ဖြစ်ပွားခဲ့ကြောင်း သတင်းရရှိသည်။
ယခု မေလ ဒုတိယပတ်ထဲတွင် မက်မုန်လောင်းကျေးရွာအတွင်း ဆိုလာပြားမှ တစ်ဆင့် ဘက်ထရီအိုး မီးလောင်မှုဖြစ်ပွားခဲ့ပြီး နေအိမ် (၃) လုံး မီးလောင်ပျက်စီးသွားခဲ့ကြောင်း သိရသည်။
“ဘယ်နေ့ လောင်သွားလဲတော့ ရက်အတိကျ မမှတ်မိသေးဘူး။ ၃ ရက်လောက်တော့ ရှိပြီထင်တယ်။ ဆိုလာမီးကနေ တစ်ဆင့် လောင်သွားတာ။ ဘက်ထရီအိုးကနေ လောင်သွားတာထင်တယ်။ အဲ့နေ့ကလည်း ကျနော်တို့က အိမ်မှာမရှိဘူးလေ။ အလုပ်သွားလုပ်နေတာ” ဟု ဒေသခံ အမျိုးသားက တစ်ဦးက ပြောသည်။
ထိုသို့ မီးလောင်သွားမှုကြောင့် လူထိခိုက်မှု မရှိကြောင်း နှင့် ထိခိုက်ပျက်စီးမှု တန်ဖိုးကို မသိရှိရသေးကြောင်း သိရသည်။
“ထိခိုက်ပျက်စီးမှုတော့ အတိကျ မသိရသေးဘူး။ အိမ်က ၃ အိမ်လောင်သွားတယ်။ လူတွေတော့ ထိခိုက်မှုမရှိဘူး” ဟု အထက်ပါ အမျိုးသားက ပြောသည်။
သျှမ်းပြည်အတွင်းရှိ တအာင်းတိုင်းရင်းသားအိမ်များသည် ရှည်လျားပြီး တစ်အိမ်ကို မိသားစု ၁၀ စုကျော်အထိ အတူတကွ နေထိုင်လျက်ရှိကြောင်း သိရသည်။
ထိုအပြင် ယခုရက်ပိုင်းအတွင်း သျှမ်းပြည်အတွင်း မိုးကြီး လေကြီး တိုက်မှုရှိနေသည်။