Sunday, July 14, 2024

အမျိုးသမီးအပါအဝင် တောင်ကြီးက လူငယ် ၃ ဦး ထက်မနည်း စစ်ကောင်စီ ဖမ်းဆီးခေါ်ဆောင်သွား

Must read

သျှမ်းပြည် တောင်ကြီးခရိုင် တောင်ကြီးမြို့ပေါ် နေထိုင်သည့် လူငယ်များကို စစ်ကောင်စီ တပ်ဖွဲ့က လိုက်လံ ဖမ်းဆီးရာ လက်ရှိတွင် လူငယ် ၃ ဦး ထက်မနည်း ဖမ်းဆီးခေါ်ဆောင်သွားကြောင်း စုံစမ်းသိရသည်။

ဖမ်းဆီးခံရသည့် အမျိုးသမီး

ယခု ဧပြီလဆန်းပိုင်းမှ စတင်ကာ တောင်ကြီးမြို့ပေါ်ရှိ လူငယ်များကို စစ်အာဏာရှင် ဆန့်ကျင်တော်လှန်ရေး၌ ပါဝင်သည် ဆိုသည့် စွပ်စွဲချက်များဖြင့် စစ်ကောင်စီက လိုက်လံဖမ်းဆီးခဲ့ခြင်းဖြစ်ပြီး၊ လက်ရှိတွင် အမျိုးသမီး တစ်ဦး အပါအဝင် လူငယ် ၃ ဦးက ဖမ်းဆီးခံရကြောင်း ဒေသခံများက ပြောသည်။

ပြီးခဲ့သည့် ဧပြီလ ၆ ရက်နေ့တွင် တောင်ကြီးမြို့ ၊ အောင်သပြေ ရပ်ကွက်တွင် နေထိုင်သူ အသက် (၂၀) ကျော် အမျိုးသမီးတစ်ဦးကို စစ်ကောင်စီ တပ်ဖွဲ့က လာရောက်ဖမ်းဆီးသွားကြောင်း နီးစပ်သူ အမျိုးသား တစ်ဦးက သျှမ်းသံတော်ဆင့်ကို ပြောသည်။

“သတင်းအတိအကျ နဲ့ အိမ်အထိလိုက်လာပြီး အမျိုးသမီး တစ်ဦးကို ဖမ်းသွားတယ်၊ သူမကို PDF ၊ ထောက်ပို့ တွေနဲ့ ချိတ်ဆက်မှု ရှိတယ်ဆိုပြီးတော့ လာဖမ်းတာ၊ အိမ်ကိုတော့ ပျူစောထီးနဲ့ ရဲတွေ၊ စစ်သားတွေပါတယ်၊ အိမ်တံခါးကို ဖျက်ပြီး ဝင်ဖမ်းတာ” ဟု နီးစပ်သူ အမျိုးသား လူငယ် တစ်ဦးက သျှမ်းသံတော်ဆင့်ကို ပြောသည်။

အဆိုပါ အမျိုးသမီး ဖမ်းဆီးခံရပြီးနောက် မိသားစုဝင်များက ရဲစခန်းများထံ လိုက်သွားသော်လည်း တွေ့ခွင့် မရကြောင်း နှင့် လက်ရှိအချိန်ထိ မည်သည့်နေရာသို့ ဖမ်းဆီးခေါ်ဆောင်သွားသည်ကိုလည်း မသိရကြောင်းလည်း သိရသည်။

ထို့အပြင် ပြီးခဲ့သည့် ဧပြီလ ၉ ရက်တွင်လည်း တောင်ကြီးမြို့ပေါ်နေ အသက် (၂၀) ကျော် အမျိုးသား နှစ်ဦးကို စစ်ကား ၂ စီး နှင့် အတူ စစ်ကောင်စီတပ်ဖွဲ့က လာရောက်ဖမ်းဆီးသွားကြောင်းလည်း တောင်ကြီးမြို့ခံ အမျိုးသား တစ်ဦးက သျှမ်းသံတော်ဆင့်ကိုပြောသည်။

“သူတို့က သာမာန်အရပ်သား လူငယ်တွေ ဖြစ်ပါတယ်၊ လှုပ်ရှားမှုတွေမှာ ပါတယ် ဆိုတာက အစပိုင်းမှာပေါ့၊ ဆန္ဒပြတွေမှာပဲပါခဲ့တာ၊ အခုတော့ အဲ့ဒါတွေက ကြာခဲ့ပြီ၊ အခုမှ ဘာကြောင့်မို့ လာဖမ်းတာလဲတော့ မသိဘူး၊ အမျိုးသား လူငယ် ၂ ယောက်ကို တစ်ညတည်းဖမ်းသွားတာ” ဟု တောင်ကြီးမြို့ခံ အမျိုးသား တစ်ဦးက သျှမ်းသံတော်ဆင့်ကိုပြောသည်။

ထို့အပြင် ယမန်နေ့ မေလ ၁၀ ရက် နံနက်ပိုင်း ၁၀ နာရီဝန်းကျင်တွင်လည်း တောင်ကြီး – ဖယ်ခုံ သွားသည့် ခရီးသည်တင်ယာဥ်ပေါ်မှာ အမျိုးသား ၂ ဦးကို အောင်ပန်း စစ်ဆေးရေးဂိတ်တွင် စစ်ကောင်စီက ဖမ်းဆီးလိုက်ပြီး မည်သည့်နေရာသို့ ဖမ်းဆီးခေါ်ဆောင်သွားသည်ကို မသိရသေးပေ။

အာဏာသိမ်းယူပြီးသည့် အချိန်မှ စတင်ပြီး စစ်ကောင်စီ တပ်ဖွဲ့သည် လူငယ်လူရွယ်များကို အကြောင်းမဲ့ ဖမ်းဆီးခြင်း၊ မတရား ပုဒ်မများတပ်ကာ စွပ်စွဲဖမ်းဆီးခြင်းတို့ ပြုလုပ်လာကြောင်း သိရသည်။

မြန်မာနိုင်ငံက အာဏာသိမ်း ၂ နှစ်ကျော်အကြာ စစ်ကောင်စီတပ်တွေ အကြမ်းဖက် ပစ်ခတ်သတ်ဖြတ်မှုတွေ ကြောင့် နိုင်ငံတဝန်း အပြစ်မဲ့ ကျဆုံးပြည်သူ ၃,၄၈၆ ယောက် နှင့် ဖမ်းဆီးထိန်းသိမ်းခံရသူပေါင်း ၂၁,၉၉၀ ယောက် ထိ ရှိလာခဲ့ကြောင်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) က ယမန်နေ့ (မေ ၁၀) ရက် ထုတ်ပြန်ချက်အရ သိရသည်။

Leave a Comments

- Advertisement -spot_img

Latest article