သျှမ်းပြည် မူဆယ်ခရိုင်၊ နမ့်ခမ်းမြို့နယ်အတွင်းတွင် တအာင်း (ပလောင်) အမျိုးသားလွတ်မြောက်ရေး တပ်မတော် (TNLA) တပ်ဖွဲ့သည် နေအိမ်ထဲ စခန်းချ နေထိုင်ခွင့် မပြုသည့် အိမ်ရှင်များကို သေနတ်မောင်းတင် ခြိမ်းခြောက်ကြောင်း စုံစမ်းသိရသည်။

ပြီးခဲ့သည့် မေလ ၉ ရက်တွင် နမ့်ခမ်းမြို့နယ် ဟိုပုံ (ဝၢၼ်ႈႁူဝ်ပုင်ႇ)ကျေးရွာ အတွင်းသို့ TNLA စစ်ကြောင်း ဝင်ရောက်လာပြီး ပြည်သူ့နေအိမ်ထဲ စခန်းချ နေထိုင်ခွင့်တောင်းရာ အိမ်ရှင်က ယခုတကြိမ်ကို သက်ညာပေးစေလိုကြောင်း ပြောလိုက်သည့်အတွက် သေနတ် မောင်းတင် ခြိမ်းခြောက်လိုက်ကြောင်း ဖြစ်စဥ်ကို သိရှိသူ အမျိုးသား တစ်ဦးက သျှမ်းသံတော်ဆင့်ကို ပြောသည်။

“ TNLA စစ်သားတွေက သူ့အိမ်ကို လာနေတာ ၃ ကြိမ် ရှိနေပြီ၊ အခုတကြိမ်နဲ့ ဆိုရင် ၄ ကြိမ်မြောက်သွားပြီ။ ဒါကြောင့် သူက အခုတကြိမ်မှာတော့ ဒီနေရာမှာ မနေပါနဲ့၊ တခြားနေရာမှာ သွားနေဖို့ သူက ပြောတယ်။ TNLA ကသေနတ်မောင်းတင် ခြိမ်းခြောက်ပြပြီးတော့ ဖုန်းဆက်ပြီး တခြားနေရာကို ဆက်သွားတယ်” ဟု ဖြစ်စဥ်ကို သိရှိသူ အမည်မဖော်လိုသူ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

အဆိုပါ TNLA စစ်သားများသည် ပြည်သူ့နေအိမ်ထဲ ဝင်ရောက်နေထိုင်မှု အချိန်တိုင်း၌ အိမ်ရှင်၏ ခွင့်ပြုချက် မတောင်းပဲ စားစရာများ၊ အသုံးအဆောင်ပစ္စည်းများကို စိတ်တိုင်းကျ ယူဆောင် သုံးစွဲနေကြကြောင်း ဒေသခံများက ပြောသည်။

နေအိမ်ထဲ TNLA တပ်ဖွဲ့ စခန်းချ နေထိုင်ခွင့် မပေးသည့် အိမ်ရှင်သည် TNLA စစ်သားတို့၏ သေနတ်မောင်းတင် ခြိမ်းခြောက်မှုကို ခံရသည့်အတွက် ရန်ပြုခံရမှာကို စိုးရိမ်ကြောက်လန့်နေရကြောင်းလည်း အထက်ပါ ပုဂ္ဂိုလ်က ဆက်ပြောသည်။

“သေနတ်မောင်းတင်ပြီး ခြိမ်းခြောက်ခံရတော့ အိမ်ရှင်မိသားစုလည်း ကြောက်သွားတယ်၊ ပြီးတော့ သူတို့ ပလောင် (တအာင်း) စကား နဲ့ တစ်နေရာရာကို ဖုန်းဆက်ပြီး ပြောတာလည်း ရှိတော့ တွေးကြောက်ရတာပေါ့နော်၊ အခုထိလည်း အဲ့ပတ်ဝန်းကျင်မှာ TNLA စစ်သားတွေက သွားလာလှုပ်ရှားနေတယ်” ဟု ၎င်းက ဆက်ဆိုသည်။

အလားတူပင် ပြီးခဲ့သည့် မေလ ၁၀ ရက်၌ နမ့်ခမ်းမြို့နယ် နမ့်မကျေးရွာမှာလည်း TNLA စစ်ကြောင်း ဝင်လာပြီး၊ ဒေသခံ နေအိမ်များ၌ စခန်းချ နေထိုင်ပြီး စားစရာများ၊ အဝတ်အထည်များ နှင့် အသုံးအဆောင် တချို့ကိုယူဆောင်ကြကြောင်း သတင်း သိရသည်။

“TNLA စစ်သားတွေက ပြည်သူအိမ်ထဲ ဝင်နေလိုက်၊ လမ်းသွားလမ်းလာ ကားသမားတွေထံကနေ ပိုက်ဆံတောင်း လိုက် လုပ်နေတာ ၃ လ လောက်ရှိနေပြီ၊ နစ်နာတာ၊ ခံရတာတွေကတော့ ပြည်သူတွေဖြစ်တယ်၊ ပြည်သူတွေ ကလည်း ဘယ်အဖွဲ့ကို သွားပြီး အားကိုးရမလဲ မသိနိုင်တော့ဘူး” ဟု နမ့်ခမ်းဒေသခံ အမျိုးသား တစ်ဦးက သျှမ်းသံတော်ဆင့် ကိုပြောသည်။

TNLA စစ်သားများ နေအိမ်ထဲ ဝင်ရောက် စခန်းချမှုကြောင့် သမီးပျို ရှိသည့် အိမ်ရှင်များ၊ အမျိုးသမီးအိမ်ရှင်များက အိမ်ကို အဆိုပါ စစ်သားများကို နေခိုင်းပြီး၊ ၎င်းအမျိုးသမီးများသည် တခြား နေအိမ်များထံသို့ သွားရောက် နေထိုင်ရကြောင်း လည်း သိရသည်။

ယင်းကဲ့သို့ TNLA စစ်သားများက ပြည်သူ့နေအိမ်ထဲ ဝင်ရောက်စခန်းချနေထိုင်မှု နှင့် ပတ်သက်ပြီး တအာင်း (ပလောင်) အမျိုးသား လွတ်မြောက်ရေး တပ်မတော်၏ ပြောရေးဆိုခွင့်ရှိသူ ဒုတိယ ဗိုလ်မှူးကြီး တားအိုက်ကျော် ထံသို့ အကြိမ်ကြိမ်ဆက်သွယ်သော်လည်း ဖုန်းလက်ခံ ဖြေကြားခြင်း မရှိပါ။

ထို့အပြင် ပြီးခဲ့သည့် ဧပြီလအတွင်း၌ မူဆယ်ခရိုင် နမ့်ခမ်းမြို့နယ် မိုင်းဝီးဒေသမှ စစ်ဘေးရှောင် စခန်း အတွင်းမှာ လည်း TNLA တပ်သားများက ဝင်ရောက်နေထိုင်ပြီး စစ်ရှောင်များထံမှ ဆန်များ တောင်းယူခဲ့ကြောင်း သိရသည်။

လက်နက်ကိုင် တပ်ဖွဲ့များမှ လူနေကျေးရွာအတွင်း ရပ်ရွာအတွင်း ဝင်ရောက်နေထိုင်ခြင်း၊ လူထု နှင့် အတူ ရောနှော နေထိုင်ခြင်းတို့သည် ဂျီနီဗာကော (Geneva Call) ဥပဒေ နှင့် ဆန့်ကျင်သည့်အပြင် စစ်ရာဇဝတ်မှု မြောက်ကြောင်း လည်း သိရသည်။