သျှမ်းပြည် လွိုင်လင်ခရိုင် ပင်လုံမြို့ ခြေမြန်တပ်ရင်း (၅၁၃) တပ်ရင်းမှူးသည် ကရင်နီပြည်နယ် လွိုင်လင်လေးမြို့နယ် ထီးစဲခါးဂိတ်တွင် သတ်ဖြတ်ခံရကြောင်း စုံစမ်းသိရှိရသည်။
ပြီးခဲ့သည့် မေလ ၄ ရက်တွင် စစ်ကောင်စီတပ် (၅၁၃) ခြေမြန်တပ်ရင်းသည် လွိုင်ကော်ဘက်သို့ သွားခဲ့ပြီး ထီးစဲခါးစစ်ဆေးရေးဂိတ်တွင် စစ်ကောင်စီ တပ်သားတစ်ဦးက ပစ်သတ်ခဲ့ကြောင်း သိရသည်။
“ ပင်လုံဘက်က ခြေမြန်တပ်ရင်း ၅၁၃ က တပ်ရင်းမှူး နဲ့ 2IC တို့ ကယားမှာ ကျသွားတယ်လို့ ကြားတယ်။ ဘယ်နားမှာ ကျသွားတာလဲတော့ အသေးစိတ် မသိရဘူး။ ပင်လုံဘက်က ဌာန ဆိုင်ရာတွေကို မေးကြည့်လိုက်တော့ ဟုတ်တယ်တဲ့” ဟု လွိုင်လင်မြို့နယ် အတွင်း နေထိုင်သူတစ်ဦးက ပြောသည်။
အဆိုပါ ထီးစဲခါးဂိတ်တွင် သတ်ဖြတ်ခံရသည့် တပ်ရင်းမှူးကို စစ်ကောင်စီ စစ်သားတစ်ဦးက ပစ်သတ်လိုက်ကြောင်း သိရသည်။ ပစ်သတ်လိုက်သည့် စစ်သားသည်လည်း ကိုယ်ကိုယ်ပြန်ပစ်သတ်လိုက်ခဲ့ကြောင်း Job For Karan လူမှုကွန်ယက်စာမျက်နှာပေါ်တွင် ရေးသားထားသည်။
ထိုအပြင် သေဆုံးသွားသည့် တပ်ရင်းမှူး ကိုလည်း လွိုင်ကော်ဆေးရုံသို့ ပို့ဆောင်လိုက်ကြောင်း သိရသည်။
“ပင်လုံဘက်ကို ပြန်ယူမလာတာတော့ သေချာတယ်။ ဘယ်နား သင်္ဂြိုဟ်လဲတော့ သေချာမသိဘူး။ ပစ်သတ်ခံရပြီး သူ့ကို လွိုင်ကော်ဆေးရုံကို ယူသွားတယ်လို့ ကြားတယ် ” ဟု အထက်ပါ လွိုင်လင်မြို့နယ်တွင်း နေထိုင်သူက ပြောသည်။
သျှမ်းပြည် လွိုင်လင်ခရိုင်အတွင်းရှိ စစ်ကောင်စီ တပ်သားများကို လက်ရှိ တိုက်ပွဲဖြစ်ပွားနေသည့် ဖယ်ခုံမြို့နယ် ၊ မိုးဗြဲမြို့ ၊ ကရင်နီပြည်နယ်ဘက်တွင် စစ်အင်အားဖြည့်တင်းပေးနေလျက်ရှိကြောင်း ဒေသခံများထံမှ သိရသည်။
လက်ရှိအချိန်ထိ သျှမ်းပြည် နှင့် ကရင်နီပြည် နယ်စပ် ဖယ်ခုံမြို့နယ် ၊ ပင်လောင်းမြို့နယ်ထဲတွင် တိုက်ပွဲဆက်လက် ပြင်းထန်နေလျက်ရှိကြောင်းသိရသည်။
