သျှမ်းပြည် ရွာငံမြို့နယ်အတွင်း စစ်ကောင်စီ တပ်ဖွဲ့က မြေပြင် ထိုးစစ်ဆင် အပါအဝင် လေကြောင်းလိုင်းဖြင့်လည်း တိုက်ခိုက်မှု ပြုလုပ်နေသည့်အတွက် ဒေသခံ ၅၀၀ နီးပါးက စစ်ရှောင် ထွက်ပြေးနေရကြောင်း သိရသည်။

ပြီးခဲ့သည့် မေလ ၄ ရက်မှ စတင်ကာ ရွာငံမြို့နယ် နန်းခုံကျေးရွာ နှင့် ရွာငံ – သာစည် စပ်ကြားရှိ သာစည်မြို့နယ်မှ လွှစင်ကျေးရွာ ဘုန်းကြီးကျောင်းဝင်းတို့တွင် စစ်ကောင်စီတပ်ဖွဲ့က စခန်းချ နေထိုင်ခဲ့ပြီး ဒေသခံ ပြည်သူ့ကာကွယ် ရေး ပူးပေါင်း တပ်ဖွဲ့ PDF တို့ကို ထိုးစစ်တိုက်ခိုက်နေကြောင်း ဒေသခံများက ပြောသည်။

“စစ်ကောင်စီတပ်ကတော့ အင်အား တော်တော်များတယ်၊ သူတို့က ဘုန်းကြီးကျောင်းထဲ ဝင်ပြီး စခန်းချတာ၊ ပြီးတော့ ရွာတွေဘက်ကို စစ်ကြောင်းထိုးပြီး ပစ်ခတ်မှုတွေကို စလုပ်တော့တာပဲ၊ လေယာဥ်တစ်စီး နဲ့ ဗုံးတွေ ကြဲချသွားတယ်၊ မြေပြင်မှာဆိုလည်း လက်နက်ကြီး /ငယ်တွေပစ်ကြတယ်၊ အခုဆိုရင် ဒေသခံတွေ စစ်ရှောင် ထွက်ပြေး နေရတယ်” ဟု ဒေသခံ တစ်ဦးက သျှမ်းသံတော်ဆင့်ကို ပြောသည်။

အဆိုပါ ထိတွေ့တိုက်ပွဲသည် ရွာငံမြို့နယ်အတွင်း ရှိနေသည့် ပူးပေါင်း PDF တပ်ဖွဲ့ကို ပျူစောထီး လမ်းပြမှုဖြင့် စစ်ကောင်စီတပ်က ထိုးစစ်ဆင် တိုက်ခိုက်နေခြင်း ဖြစ်ကြောင်း သိရသည်။

လက်ရှိတွင် သာစည်မြို့နယ်မှ လွှစင်ကျေးရွာ၊ ရွာငံမြို့နယ်မှ နန်းခုံရွာ၊ ငှက်ပျောတောရွာ၊ ကုန်းမော်ရွာ နှင့် မြတ်ခါး အင်း ကျေးရွာတို့မှ ဒေသခံများ စစ်ရှောင် ထွက်ပြေးနေရခြင်း ဖြစ်ပြီး အများစုသည် ပင်းတယမြို့ပေါ်၊ ဆွေမျိုးရှိရာ မြို့ပေါ် နှင့် တောထဲသို့ ထွက်ပြေးသွားကြကြောင်းလည်း ဒေသခံများက ပြောသည်။

မေလ ၆ ရက် နံနက်ပိုင်း ၉ နာရီဝန်းကျင်တွင် စစ်ကောင်စီတပ်ဖွဲ့သည် ရွာငံမြို့နယ် မြက်ခါးအင်းကျေးရွာ ဘက်သို့ စစ်ကြောင်းထိုးပြီး စစ်ရှောင်သွားသည့် ဒေသခံ နေအိမ်များအတွင်း ဝင်ရောက် မွှေနှောက်ကာ အိမ်တွင်း အဖိုးတန် ပစ္စည်းများကို ယူဆောင်သည့်အပြင် ဖျက်ဆီးမှုလည်း ပြုလုပ်သွားသည့် အကြောင်း ဒေသခံ အမျိုးသား တစ်ဦးက ဆက်ပြောသည်။

“ရွာခံတွေ ထွက်ပြေးပြီးနောက်ပိုင်းမှာ စစ်သားတွေက အိမ်ထဲဝင်ပြီးတော့ အိမ်သုံးပစ္စည်းတွေ အကုန်ယူဆောင် သွားတယ်။ တချို့အိမ်ကို ဖျက်စီးတယ်၊ တချို့ ဝိုင်းကို မီးရှို့တာရှိတယ်၊ ရွာခံတော်တော်များက တောထဲ ပြေးနေရတယ်”ဟု အမည်မဖော်လိုသူ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

လက်ရှိ စစ်ရှောင်များသည် တစ်စုတစ်စည်း ရှိနေခြင်း မဟုတ်သည့် အတွက် လူဦးရေ တိတိကျကျကို သိနိုင်ရန် ခက်ခဲကြောင်းလည်း အထက်ပါ ဒေသခံအမျိုးသား က ဆက်ပြောသည်။

အဆိုပါ ထိတွေ့တိုက်ပွဲကြောင့် ဒေသခံများ၏ ကျွဲ ၊ နွားများကို ကျည်ဆန်ထိမှန်ခြင်း၊ မိုင်းနင်းမိ ပေါက်ကွဲခြင်း တို့ကြောင့် ကျွဲ၊ နွားများ သေဆုံးမှု ၅ ကောင် ထက်မနည်း ရှိနေကြောင်းလည်း သိရသည်။

လက်ရှိတွင် စစ်ကောင်စီ တပ်သားတို့က ရွာငံမြို့ အဝင်အထွက်များကို တင်းကြပ်ပြီး စစ်ဆေးမေးမြန်းမှုများကြမ်းတမ်းနေကြောင်း ဒေသခံများက ပြောသည်။

ပြီးခဲ့သည့် ဧပြီလ အတွင်းမှာလည်း ရွာငံမြို့နယ် အလယ်ချောင်ကျေးရွာ နှင့် ငှက်သောက်ကျေးရွာ တို့ဘက် ပူးပေါင်း PDF တပ်ဖွဲ့ ရောက်နေသည့် အကြောင်းပြချက်ဖြင့် စစ်ကောင်စီတပ်က ကျေးရွာထဲ စစ်ကြောင်းထိုးလာပြီး ဒေသခံများကို ဖမ်းဆီးစစ်ဆေးခြင်း၊ နေအိမ်များကို ဖျက်ဆီးခြင်းများ ပြုလုပ်မှု ရှိခဲ့သည်။

၂၀၂၃ ခုနှစ် ဖေဖော်ဝါရီလ (၂၈) ရက်ထိ စစ်အာဏာသိမ်း ကာလအတွင်း စစ်ကောင်စီ နှင့် လက်အောက်ခံ အဖွဲ့အစည်းများ က မီးရှို့ဖျက်ဆီးမှုကြောင့် သျှမ်းပြည်မှ အရပ်သားပြည်သူ နေအိမ်ပေါင်း ၁၃၅ အိမ် ရှိနေပြီး ရွာငံမှ ၁၈ အိမ် ရှိနေကြောင်း Data for Myanmar က မတ်လ ၂၀ ရက်နေ့တွင် ထုတ်ပြန်ထားသည်။