သျှမ်းပြည် ဖယ်ခုံမြို့နယ်ရှိ ကျေးရွာတစ်ရွာကို စစ်ကောင်စီမှ ယနေ့ (မေ ၆) ရက် နံနက် ၃ နာရီခွဲကျော်တွင် တိုက်လေယာဥ်ဖြင့် ဗုံးကြဲတိုက်ခိုက်ရာ အရပ်သား (၃) ဦး ပြင်းထန်ဒဏ်ရာ ရရှိခဲ့ကြောင်း စုံစမ်းသိရသည်။
ယနေ့ (မေ ၆) ရက် နံနက် ၃ နာရီ ၅၀ မိနစ်တွင် ဖယ်ခုံမြို့နယ်အတွင်း တိုက်ပွဲဖြစ်ပွားမှု မရှိဘဲ စစ်ကောင်စီဘက်မှ တိုက်လေယာဥ်ဖြင့် ဗုံးကြဲတိုက်ခိုက်မှုပြုလုပ်ကာ အရပ်သား (၃) ဦး ပြင်းထန်ဒဏ်ရာရရှိကြောင်း ဖယ်ခုံ ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။
” ဒီနေ့ နံနက် လူတွေ အိပ်ချိန်မှာ တိုက်ပွဲမဖြစ်ဘဲ တိုက်လေယာဥ် နဲ့ ဗုံးကြဲတယ်။ ၁၀နှစ် ကလေးအပါအဝင် အရပ်သား ၃ ဦး ထိခိုက်ဒဏ်ရာရတယ်။ ဒဏ်ရာက ပြင်းတယ်” ဟု ဖယ်ခုံဒေသခံ က ဆိုသည်။
ထိုဗုံးကြဲ တိုက်ခိုက်ခံရမှုကြောင့် အသက် ၁၀ နှစ်အရွယ် ကလေးသည် ပြင်းထန်ဒဏ်ရာရရှိကာ စိုးရိမ်ရပြီး ကျန် ၂ ဦးလည်း ဒဏ်ရာပြင်းထန်ကြောင်း သိရသည်။
အဆိုပါ အကြောင်းမဲ့ နံနက်စောစော စစ်ကောင်စီမှ တိုက်လေယာဥ်ဖြင့် ဗုံးကြဲတိုက်ခိုက်ခြင်းကြောင့် ကက်သလစ်ဘုရားကျောင်း နှင့် အရပ်သား နေအိမ်အချို့ ပျက်စီးခဲ့ကြောင်း သိရသည်။
သျှမ်းပြည် တောင်ကြီးခရိုင် သျှမ်း – ကယား နယ်စပ်ဒေသ တလျောက်ရှိ ဖယ်ခုံ၊ မိုးဗြဲ နှင့် ပင်လောင်းမြို့နယ်တွင် နေ့စဉ်နီးပါး စစ်ကောင်စီမှ လေကြောင်း အသုံးပြုပြီး ဗုံးကြဲတိုက်ခိုက်နေသည်။
ယမန်နေ့ (မေလ ၅ ရက်) နံနက်အစောပိုင်း ၄ နာရီခွဲမှစပြီး ၈ နာရီဝန်းကျင်အထိ ပင်လောင်း – ဖယ်ခုံ နယ်စပ်တလျောက်ရှိ ကျေးရွာများကို စစ်ကောင်စီမှ တိုက်လေယာဉ် ၄ စင်း အသုံးပြုပြီး ပေါင် (၅၀၀) ဗုံးနှစ်လုံး ကြဲချခဲ့သည့်အပြင် အသေးစား ဗုံးများကိုလည်း ဆက်စဉ်မပြတ် ဗုံးကြဲချ တိုက်ခိုက်ခဲ့ကြောင်း သိရသည်။ေ
Leave a Comments