သျှမ်းပြည် တောင်ကြီးခရိုင် ပင်လောင်းမြို့နယ် လယ်ခြားကျေးရွာထဲတွင် အရပ်သားတစ်ဦး မျက်လုံးဖောက်ခံထားရသည့် ရုပ်အလောင်းကို တွေ့ရှိခဲ့ကြောင်း စုံစမ်း သိရှိရသည်။
ပြီးခဲ့သည့် ဧပြီ ၂၆ ရက်တွင် ပင်လောင်းမြို့နယ် တောင်စလုံး နှင့် မြောက်စလုံးကျေးရွာကြား လယ်ခြားကျေးရွာထဲကို KNDF/BO 11 တပ်ဖွဲ့ နှင့် ပူးပေါင်းတပ်ဖွဲ့တို့က နယ်မြေရှင်းလင်းရေး ပြုလုပ်ရာတွင် ဂိုဒေါင်ထဲတွင် သေဆုံးနေသည့် အမျိုးသားအလောင်းတစ်ခုကို တွေ့ရှိခဲ့ကြောင်း သိရသည်။
“ အဲ့အမျိုးသား အလောင်းက ရက်ရက်စက်စက် သတ်ခံထားရတာ။ မျက်လုံးကို ဖောက်ထုတ်ခံထားရတယ်။ လက်ကိုလည်း နောက်ပြန်ကြိုးတုပ်ထားတယ်။ တော်တော် ရက်ရက်စက်စက် သတ်ခံထားရတာ။ ဘယ်သူလဲတော့ ကျနော်တို့တော့ မသိရသေးဘူး။ ကျနော်တို့ အဲ့နေ့က မဟာမိတ်တပ်ဖွဲ့တွေနဲ့ နယ်မြေရှင်းလင်းရေးသွားရင်းတွေ့တာ” ဟု ပအိုဝ်းအမျိုးသား ကာကွယ်ရေးတပ်ဖွဲ့ PNDF က တာဝန်ရှိသူ တစ်ဦးက ပြောသည်။
စစ်ကောင်စီ တပ်ဖွဲ့သည် အဆိုပါ လယ်ခြားကျေးရွာထဲတွင် ဧပြီ ၂၅ ရက်ထိ တပ်စွဲနေထိုင်ခဲ့ပြီး ဒေသခံများကိုလည်း လူသားဒိုင်းကာအဖြစ် ဖမ်းဆီးသွားခဲ့သည်။
အလားတူ KNDF/BO 11 ကလည်း စစ်ကောင်စီတပ်ဖွဲ့သည် လယ်ခြားကျေးရွာထဲတွင် ဧပြီ ၂၅ ရက်နေ့ထိ နေထိုင်ခဲ့ပြီး ညအချိန်တွင် တပ်ဆုတ်သွားခဲ့ကြောင်း ထုတ်ပြန်ထားသည်။
အဆိုပါ သတ်ဖြတ်ခံထားရသည့် ရုပ်အလောင်းကို စစ်ကောင်စီက သတ်ဖြတ်ထားသည့် ရုပ်အလောင်းဖြစ်ကြောင်း ထိုနယ်မြေတွင်း လှုပ်ရှားနေသည့် PDF က ဆိုသည်။
ပင်လောင်းမြို့နယ် နှင့် ဖယ်ခုံမြို့နယ်ထဲတွင် ယနေ့အချိန်ထိ တိုက်ပွဲ ဆက်လက် ဖြစ်ပွားနေလျက်ရှိကြောင်း သိရသည်။
“ ကျနော်တို့က အခုချိန်ထိတော့ တိုက်ပွဲဖြစ်နေပါတယ်။ ဒေသခံတွေလည်း နေရပ် မပြန်လာနိုင်ပါဘူး။ စစ်ကောင်စီကလည်း လက်နက်ကြီးတွေနဲ့ ပစ်နေတယ်။ သတ်ခံရတဲ့ အရပ်သားကလည်း သူတို့ လူသားဒိုင်းအဖြစ် ဖမ်းသွားတဲ့သူလားမသိဘူး။ ၂၅ ရက်ကလည်း သူတို့ အရပ်သား ဖမ်းသွားတာရှိတယ်။ သူတို့ကို လမ်းပြတွေလုပ်ခိုင်းတာမလုပ်လို့လားမသိဘူး” ဟု အထက်ပါ PNDF က တာဝန်ရှိသူတစ်ဦးက ပြောသည်။
ပင်လောင်းမြို့နယ် အတွင်း စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ တို့ တိုက်ပွဲကြောင့် ဒေသခံ ၆,၀၀၀ ဝန်းကျင် ထွက်ပြေးတိမ်းရှောင်နေရသည်။
ပြီးခဲ့သည့် မတ်လ ၁၁ ရက်နေ့တွင်လည်း ပင်လောင်းမြို့နယ် နန်းနိမ်းကျေးရွာထဲတွင် စစ်ကောင်စီက ဝင်ရောက်ပစ်ခတ်ခဲ့သည့် အတွက်ကြောင့် အရပ်သား ၁၉ ဦး နှင့် သံဃာတော် ၃ပါး တို့ သတ်ဖြတ်ခံခဲ့ရသည်။
