သျှမ်းပြည် လားရှိုးမြို့တွင် ဧပြီလ တစ်လအတွင်း ယာဉ်တိုက်မှု ၂၀ ကြိမ်ဖြစ်ပွားပြီး ကလေးငယ် တစ်ဦးအပါအဝင် လူ ၂ ဦး သေဆုံးကာ ၃၀ ဦး ထိခိုက်ဒဏ်ရာ ရရှိခဲ့ကြောင်း စုံစမ်းသိရှိရသည်။
ပြီးခဲ့သည့် ဧပြီလ ၄ ရက်မှ မေလ ၂ ရက်နေ့အထိ လားရှိုးမြို့နယ်အတွင်း ဖြစ်ပွားခဲ့သည့် မတော်တဆ ယာဉ်တိုက်မှုများကို လူမှုကူညီရေးအသင်းမှ သွားရောက်ကူညီခဲ့သည့် မှတ်တမ်းအရ တစ်လအတွင်း ယာဉ်တိုက်မှု ၂၀ ကြိမ်ဖြစ်ပွားပြီး ကလေးငယ်တစ်ဦး အပါအဝင် လူ ၂ ဦးသေဆုံးကာ ၃၀ ဦးထိခိုက်ဒဏ်ရာ ရရှိသည်ဟု သျှမ်းသံတော်ဆင့်သတင်းဌာနမှ ကောက်ယူထားသည်။
စစ်တပ်က အာဏာသိမ်းပြီးနောက်ပိုင်း လားရှိုးမြို့တွင် ရွှေ့ပြောင်းအလုပ်လုပ်ကိုင်သူများ၊ လူထူထပ်များပြား လာသည့်နှင့်အမျှ ယာဉ်စည်းကမ်း၊ လမ်းစည်းကမ်း လိုက်နာမှု အားနည်းလာခြင်းကြောင့် မတော်တဆ ယာဉ်တိုက်မှုမှာ ပိုမိုဖြစ်ပွားလာနေကြောင်း ၎င်း ယာဉ်တိုက်မှုများတွင် သွားရောက်ကူညီခဲ့သည့် ဒေသခံတစ်ဦးက သျှမ်းသံတော်ဆင့်ကို ပြောသည်။
“ယာဉ်တိုက်မှုကတော့ များသောအားဖြင့် ဆိုင်ကယ်တွေ ပိုဖြစ်များတယ်။ ဦးထုပ်မဆောင်းဘူး။ တချို့ကလည်း လမ်းအခြေအနေကို မသိတာရယ်၊ မူးရူးပြီး ဆိုင်ကယ်ကို ဖြစ်သလို မောင်းတာရယ်ကြောင့် ဖြစ်တာ။ ယာဉ်စည်းကမ်း၊ လမ်းစည်းကမ်း လည်းနားမလည်တော့ ယာဉ်တိုက်မှုက ပိုဖြစ်လာတာပေါ့။ ဖြစ်ရင်လည်း ဒီကနယ်ခံတွေ မဟုတ်ဘူး တခြားနယ်ခံကလာတဲ့သူတွေ အဖြစ်များတာ “ ဟု ၎င်း ဒေသခံတစ်ဦးက ပြောသည်။
အဆိုပါ ယာဉ်တိုက်မှုများ လျှော့နည်းသွားစေရန် လားရှိုးမြို့နယ် ရဲတပ်ဖွဲ့ နှင့် ယာဉ်ထိန်းရဲများက စုပေါင်းပြီး (မတ်လ) အတွင်း ယာဉ်စည်းကမ်း၊ လမ်းစည်းကမ်း ဟောပြောပွဲများကို ပြုလုပ်ပေးပေမယ့် ထိရောက်မှု မရှိကြောင်း သိရသည်။
ထို့အပြင် လားရှိုးမြို့နယ် ရဲတပ်ဖွဲ့ နှင့် ယာဉ်ထိန်းရဲများက လမ်းသွားလမ်းလာ ပြည်သူများကို မှတ်ပုံတင်နှင့် ယာဉ်လိုင်စင်များကို အကြောင်းပြပြီး အဆမတန် ငွေတောင်းခံနေလျက်ရှိကြောင်း ဒေသခံတစ်ဦးက သျှမ်းသံတော်ဆင့်ကို ထပ်လောင်းပြောသည်။
“ သူတို့ လုပ်စားနေကြတာ။ ရရင်ရသလိုပဲ တောင်းတယ်။ မပေးရင်လည်း ကားသိမ်းမယ်ဆိုပြီး ခြိမ်းခြောက်တယ်။ သူတို့ကို ကြောက်နေရတာနဲ့ တောင်းသလောက် ပေးရတယ် “ ဟု ၎င်းက ပြောသည်။
ထို့အပြင် စစ်တပ်က အာဏာသိမ်းပြီး ၂ နှစ်ကျော် ကာလအတွင်း သျှမ်းပြည်တစ်ဝှမ်းလုံးရှိ ပြည်ထောင်စု ကားလမ်းမပေါ်တွင် စစ်ကောင်စီတပ်ဖွဲ့မှ စစ်ဆေးရေးဂိတ် တိုးချဲ့ ဆောက်လုပ်ပြီး ခရီးသွားပြည်သူများကို ငွေအဆမတန် တောင်းခံနေလျက်ရှိကြောင်း သိရသည်။
