ရှမ်းတိုင်းရင်းသားများ ဒီမိုကရေစီ အဖွဲ့ချုပ် SNLD (ကျားခေါင်းပါတီ) မှ သျှမ်းအနုပညာရှင်များ စုပေါင်းကာ သျှမ်းပြည် အသီးသီး နှင့် သျှမ်း – ကယား နယ်စပ်ရှိ စစ်ဘေးရှောင်များအတွက် ကူညီထောက်ပံ့ကြရန် ပြောဆို တိုက်တွန်းထားသည်။

အဆိုပါ ကိစ္စ ဖြစ်စဥ် နှင့် ပတ်သက်ပြီး သျှမ်းအနုပညာရှင်များ ကူညီထောက်ပံ့ပေးပါက စစ်ဘေးရှောင်များအတွက် အကူအညီ ရစေနိုင်ကြောင်း ကျားခေါင်းပါတီ (SNLD) ၏ အထွေထွေ အတွင်းရေးမှူး စိုင်းလိတ်က သျှမ်းသံတော်ဆင့်ကို ပြောသည်။

“ကျနော်ကနေပြီးတော့ သျှမ်းအနုပညာရှင် အသီးသီးတွေကို တိုက်တွန်း ထားတယ်၊ အနုပညာ လုပ်အားခ နဲ့ ဖျော်ဖြေရေး လုပ်အားခတွေထဲ အနည်းနဲ့အများမဆို စစ်ဘေးရှောင်အတွက် ကူညီထောက်ပံ့ပေး စေချင်တာ ပေါ့နော်။ အခုလည်း ပါဝင်ကူညီ လှူဒါန်းပေးတဲ့ သျှမ်းအနုပညာရှင်တွေလည်း ရှိပါတယ်” ဟု (SNLD) ၏ အထွေထွေ အတွင်းရေးမှူး စိုင်းလိတ်က သျှမ်းသံတော်ဆင့်ကို ပြောသည်။

ယခု ဧပြီလအတွင်းမှ စတင်ကာ SNLD (ကျားခေါင်းပါတီ) သည် သျှမ်းအနုပညာရှင်များမှ တစ်ဆင့် စစ်ဘေးရှောင် အတွက် လှူဒါန်း ထောက်ပံ့ပေးလာသည့် ငွေကြေး နှင့် စားနပ်ရိက္ခာများကို စစ်ဘေးရှောင်များဆီကို ပြန်လည် ပို့ဆောင်ပေးခဲ့ရကြောင်းလည်း စိုင်းလိတ်က ဆက်ပြောသည်။

ပြီးခဲ့သည့် ရက်သတ္တပတ်တွင် စိုင်းတာဦး ဦးဆောင်သည့် Power 3 (သျှမ်း Music Band) မှ စစ်ဘေးရှောင်များ အတွက် ငွေကျပ်သိန်း ၆၀ လာရောက်လှူဒါန်းသည့် အပြင် တခြား သျှမ်းအနုပညာရှင်များကလည်း ပါဝင်လှူဒါန်းမှု ရှိကြောင်း သိရသည်။

“အရင်ကလည်း SNLD ကနေ ပင်လောင်း၊ ဆီဆိုင်၊ နောင်ချို၊ ဟိုပုံးဘက်မှာ ရှိတဲ့ စစ်ရှောင်တွေကို ကူညီထောက် ပံ့မှု ရှိခဲ့ပါတယ်။ အခု အားလုံးက ပါဝင်ကူညီမယ်ဆိုရင် ပိုပြီးတော့ အားရှိတာပေါ့” ဟု လည်း အမည်မဖော်လိုသူ SNLD မှ တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် ဧပြီလ ၂၇ ရက်နေ့တွင် SNLD မှ စစ်ဘေးရှောင်များအတွက် ငွေကျပ်သိန်း ၄၀ ကူညီထောက်ပံ့မှု ပေးခဲ့ကြောင်း သိရသည်။ ထို့အပြင် ပင်လောင်း နှင့် ကရင်နီ (ကယားပြည်) ရှိ စစ်ဘေးရှောင်များ အတွက် ကျပ် ၃၇ သိန်း ကူညီထောက်ပံ့ပေးခဲ့သည်။

ကရင်နီပြည် (ကယားပြည်) အတွင်း၌ စစ်ကောင်စီ တပ်ဖွဲ့ နှင့် ဒေသခံ ပြည်သူ့ကာကွယ်ရေး ပူးပေါင်း တပ်ဖွဲ့တို့ တိုက်ပွဲ ဖြစ်ပွားနေလျက်ရှိရာ ဒေသခံ အများအပြားက အိုးအိမ်စွန့်ခွာကာ သျှမ်း – ကယားနယ်စပ်၊ သျှမ်းပြည် အတွင်းသို့ စစ်ရှောင်ထွက်ပြေးပြီး လာရောက် ခိုလှုံနေလျက်ရှိသည်။

SNLD ပါတီသည် စစ်ကောင်စီ လက်အောက်ခံ ရွေးကောက်ပွဲ ကော်မရှင်ထံ နိုင်ငံရေး မှတ်ပုံတင် မတင်သဖြင့် နိုင်ငံရေး ပါတီ အဖြစ်မှ ဖျက်သိမ်းလိုက်ကြောင်း စစ်ကောင်စီ ဘက်မှ မတ်လ ၈ ရက်နေ့တွင် ထုတ်ပြန် ကြေညာထားသည်။

ယခု ဧပြီလ နှောင်းပိုင်းမှာလည်း စစ်ကောင်စီမှ တစ်ဆင့် ရှမ်းတိုင်းရင်းသားများဒီမိုကရေစီ အဖွဲ့ချုပ် SNLD ပါတီ၏ အလံ နှင့် ဆိုင်းဘုတ်များ ဖြုတ်သိမ်းရန် ဖိအားပေး စေခိုင်းမှုများ ရှိလာသည်။

SNLD ပါတီသည် စစ်အာဏာသိမ်းမှု မဖြစ်ခင် ပြီးခဲ့သည့် ၂၀၂၀ ခုနှစ် အထွေထွေ ရွေးကောက်ပွဲ ၌ အနိုင်ရရှိခဲ့သည့် နိုင်ငံရေးပါတီ တစ်ခု ဖြစ်သည်။