သျှမ်းပြည် မူဆယ်ခရိုင် မူဆယ်မြို့ရှိ မြန်မာ – တရုတ် နယ်စပ်ကုန်သွယ်ရေးဂိတ် ဆင်ဖြူဂိတ်တွင် ကုန်တင်မှု နှင့် အဝင်အထွက်များကို ပိတ်ထားရကြောင်း သိရသည်။
ယနေ့ (ဧပြီလ ၂၉) ရက် နံနက်ပိုင်းအချိန်မှ စတင်ကာ ဆင်ဖြူဂိတ်မှ လူ အဝင်အထွက်၊ ကား၊ မော်တော်ယာဥ် အဝင်အထွက်များကို တရုတ်ဘက်မှ ပိတ်ထားကြောင်း ဒေသခံ အမျိုးသမီး တစ်ဦးက သျှမ်းသံတော်ဆင့်ကို ပြောသည်။
“မနေ့က ဆင်ဖြူပေါက်မှာ သူတို့ (တရုတ်) တားမြစ်ထားတဲ့ ကုန်ပစ္စည်းတွေကို စစ်ဆေးတွေ့မိတာလို့ သတင်း ကြားတယ်၊ အဲ့ဒါကတော့ ဆေးပေ့ါလိပ်ပေါ့၊ ဒီနေ့ မနက်ကတည်းက လူအဝင်အထွက်ရော၊ ကားတွေ၊ ကုန်သည် တွေကိုရော ဝင်ခွင့်မပေးတော့ဘူး” ဟု ဖြစ်စဥ်ကို သိရှိသူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
တရုတ်ဘက်မှ တားမြစ်ကုန်ပစ္စည်းများအနက် ခပေါင်း (ဆေးပေါ့လိပ်) လည်း ပါဝင်နေပြီး ယမန်နေ့ ( ဧပြီ ၂၉ ) ရက်တွင် ခပေါင်း (ဆေးပေ့ါလိပ်) ကို ဆင်ဖြူဂိတ်၌ စစ်ဆေးတွေ့မိသည့် အတွက် ယနေ့ မှစပြီး ဂိတ် အဝင်အထွက်ကို ပိတ်လိုက်ခြင်း ဖြစ်ကြောင်း သိရသည်။
ယင်းကဲ့သို့ ပိတ်လိုက်ခြင်းသည် မည်သည့်အချိန်တွင် ပြန်လည်ဖွင့်လှစ်မည်ကို မသိရကြောင်း နှင့် လက်ရှိ အချိန်တွင် ကုန်သည်များက အခြေအနေကို စောင့်ကြည့်နေရသေးကြောင်းလည်း သိရသည်။
ထို့အပြင် မြန်မာ – တရုတ်နယ်စပ် ကုန်သွယ်ရေးဂိတ် (ကျင်စန်းကျော့ဂိတ်) မှ တစ်ဆင့် တရုတ်ဘက်မှ မြန်မာပြည်ဘက် တင်သွင်းသည့် ကုန်ပစ္စည်းများကို တင်းတင်းကြပ်ကြပ် စစ်ဆေးမှုများ ပြုလုပ်လာသည့်အပြင် ဒဏ်ကြေး ပေးဆောင်မှုများလည်း ရှိနေကြောင်းလည်း သိရသည်။
Leave a Comments