ယခုအချိန်သည် စိုက်ပျိုးရာသီ ဖြစ်သည့်အတွက် သျှမ်းပြည် လဲချားရောက် စစ်ဘေးရှောင်များက နေရပ်ပြန်လို ကြကြောင်း သတင်း သိရသည်။

ပြီးခဲ့သည့် ဧပြီလ ၁၁ ရက်နေ့မှ စတင်ကာ လဲချားမြို့နယ်အတွင်း သျှမ်းတပ်နှစ်တပ် ထိတွေ့တိုက်ပွဲ ဖြစ်ပွားမှု ကြောင့် ဒေသခံ ၅၀၀ ကျော်တို့သည် လဲချားမြို့ပေါ်ရှိ ဟော်ခမ်းကျောင်းတိုက်၊ ဝါဆိုကျောင်းတိုက် နှင့် ဆလိုင်းခုမ်ကျောင်းတိုက် တို့ အပြင် နီးစပ်ရာ ဆွေမျိုးထံသို့ စစ်ရှောင်ထွက်ပြေးရကြောင်း သိရသည်။

ယနေ့ ဧပြီလ ၂၈ ရက်နေ့အထိ ဒေသခံများ စစ်ရှောင်ထွက်ပြေးရသည်မှာ ၂၀ ရက်ကျော် ကြာလာသောကြောင့် ဝမ်းစာစိုက်ပျိုးရေး လုပ်ကိုင်ရန်အတွက် ဒေသခံများက နေရပ်ပြန်လိုကြကြောင်း စစ်ရှောင် ကူညီပေးသူ တစ်ဦးက သျှမ်းသံတော်ဆင့်ကို ပြောသည်။

“တကယ်လို့ တိုက်ပွဲက ဆက်ဖြစ်နေမယ်ဆိုရင်တော့ စစ်ရှောင်ထွက်ပြေးတဲ့ သူတွေအတွက် ခက်ခဲမှာတော့ အမှန်ပဲ၊ အခုချိန်ကလည်း စိုက်ပျိုးရာသီဖြစ်နေတော့ လုပ်ကိုင်စားသောက်ဖို့ အတွက် ပြင်ဆင်ရတော့မှာ အခုမှ မလုပ်ထားရင်လည်း နောက်နှစ်အတွက် စားဖို့သောက်ဖို့က ခက်မှာ၊ ဒါပေမဲ့ အခုချိန်ထိလည်း လက်နက်ကိုင်တွေ ရွာနားကနေ မဆုတ်သေးတော့ စစ်ရှောင်တွေလည်း မပြန်ရဲသေးဘူး” ဟု စစ်ရှောင်ကို ကူညီပေးနေသူ တစ်ဦးက သျှမ်းသံတော်ဆင့်ကို ပြောသည်။

စစ်ရှောင်ထွက်ပြေးရသည့် ဒေသခံများသည် လဲချားမြို့နယ်မှ ပန်ဆန်း ကျေးရွာအုပ်စု၊ ဟဲဆိုင်ကျေးရွာ အုပ်စု၊ နောင်ကော်ကျေးရွာ အုပ်စု၊ ဝမ်ဆန်းကျေးရွာ အုပ်စု နှင့် ဝမ်စဲ့ကျေးရွာ အုပ်စုတို့ ဖြစ်ကြောင်းလည်း သိရသည်။

“လက်နက်ကိုင်တွေက ရွာထဲ ရှိနေတော့ စစ်ရှောင်တွေကလည်း နေရပ်မပြန်ရဲဘူး။ တကယ်လို့ ပြန်သွားနိုင်မယ် ဆိုရင်တော့ ပြန်ထွက်လာဖို့က ခက်ခဲတယ်၊ အဲ့ဒါကြောင့် စစ်ရှောင်တွေက နေရပ်မပြန်ရဲသေးဘူး” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ဆက်ပြောသည်။

လက်ရှိအချိန်ထိ လဲချားမြို့ အရှေ့ဘက် နားပွဲ ကျေးရွာ အုပ်စု အတွင်းတွင် ပစ်ခတ်သံများ ဆက်လက်ထွက်ရှိ နေပြီး ပြီးခဲ့သည့် ဧပြီလ ၁၁ ရက်နေ့မှ ယနေ့ အချိန်ထိ နေ့စဥ် နီးပါး ပစ်ခတ်သံများ ကြားနေရခြင်း ဖြစ်ကြောင်း သိရသည်။

အဆိုပါ ထိတွေ့တိုက်ပွဲ ဖြစ်ပွားမှုကြောင့် လဲချား ဒေသခံ ၅၀၀ ကျော် စစ်ရှောင်ထွက်ပြေးရသည့် အပြင် နွေရာသီ သျှမ်းစာသင် သင်တန်းကျောင်း ၁၃ ကျောင်း နှင့် စစ်ရှောင် ၄၀၀ နီးပါးက ကျောင်းပိတ်ရသည်။