သျှမ်းပြည် ကျောက်မဲခရိုင် နမ္မတူမြို့နယ်အတွင်း ပြည်သူပိုင် မြေဧက ၁၀ နီးပါးကို တအာင်း (ပလောင်) အမျိုးသား လွတ်မြောက်ရေးတပ်မတော် (TNLA ) တပ်ဖွဲ့က သိမ်းယူလိုက်ကြောင်း သတင်း သိရသည်။

နမ္မတူမြို့နယ် ဆိုင်းခေါင်(ဝ်) ကျေးရွာ အုပ်စု (ဢိူင်ႇသၢႆးၶၢဝ်) မှ ကောင်းဆာကျေးရွာအတွင်းရှိ ဒေသခံ ပြည်သူ အစုအဖွဲ့ ပိုင်သော သစ်တောမြေ (CF) နေရာ အပါအဝင် အနီးပတ်ဝန်းကျင်ရှိ မြေယာများကိုလည်း TNLA တပ်ဖွဲ့က သိမ်းယူလိုက်ကြောင်း ဒေသခံများက ပြောသည်။

ယင်းကဲ့သို့ ပြည်သူပိုင် သစ်တောမြေ နှင့် ခြံမြေယာမြေများကို TNLA တပ်ဖွဲ့မှ အတင်းအဓမ္မသိမ်းယူ ခုတ်ထွင် ရှင်းလင်းနေခြင်း နှင့် ပတ်သက်ပြီး ဒေသခံများက ထွေအုပ်သို့ သွားတိုင်သော်လည်း မတားရဲကြောင်း ဟု အကြောင်းပြန်ခဲ့ကြောင်း ဒေသခံတစ်ဦးက သျှမ်းသံတော်ဆင့်ကို ပြောသည်။

“ဘာမှ မပြောမဆိုဘဲနဲ့ သစ်တောမြေနေရာကို ခုတ်ထွင်ရှင်းလင်းကြတာ၊ ဒေသခံတွေ သွားတားတော့ သူတို့က လုပ်ရမှာပဲလို့ ပြန်ပြောတယ်၊ ဒီကိစ္စကို အုပ်ချုပ်ရေးမှူး နဲ့ ထွေအုပ်တွေဆီကို တင်ပြတော့ သူတို့လည်း မတားရဲ ဘူးတဲ့၊ သျှမ်းတပ်ကိုပဲ သွားတိုင်ပါလို့ ဒေသခံတွေကို ပြန်ပြောခဲ့တယ်” ဟု အမည်မဖော်လိုသူ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

အဆိုပါ ကိစ္စနှင့် ပတ်သက်ပြီး မြေယာသိမ်းဆည်းခံရပြီး အတင်း ခုတ်ထွင်ရှင်းလင်း ခံရသည့် ပိုင်ရှင်များ စုပေါင်းကာ ရှမ်းပြည်တိုးတက်ရေးပါတီ၊ ရှမ်းပြည် တပ်မတော် (SSPP/SSA) ထံသို့ တင်ပြရာ ဒေသအတွင်း SSPP/SSA ခရိုင်မှူးက လာရောက်တားမြစ်ပေးပြီး ခေတ္တရပ်ဆိုင်းသွားကြောင်း လည်း သိရသည်။

“ဌာနဆိုင် ရာတွေက မဖြေရှင်းပေးနိုင်ဘူး၊ မတားရဲဘူးလို့ ပြောတော့ ဒေသခံတွေက SSPP/SSA ကို သွားတိုင် တယ်၊ ဒေသအတွင်းက တာဝန်ခံရော၊ ဗဟိုဌာနချုပ်ကိုရော သွားတိုင်တယ်၊ ဌာနချုပ်ကတော့ ဆွေးနွေးပေးမယ် လို့ အကြောင်းပြန်ခဲ့တယ်၊ ဒေသအတွင်းက တာဝန်ရှိသူကတော့ လာတားပေးတယ်၊ ခနငြိမ်သွားပေမဲ့ ယမန်နေ့ကပဲ ထပ်လာလုပ်ပြန်ပြီ” ဟု ဒေသခံများက ဆက်ပြောသည်။

TNLA တို့မှ အဓမ္မ ခုတ်ထွင် ရှင်းလင်းလိုက်သည့် ဒေသခံ ပြည်သူ အစုအဖွဲ့ ပိုင်သော သစ်တောမြေ (CF) ဧရိယာ စုစုပေါင်းသည် ၄၀ ဧက နီးပါး ရှိနေပြီး ကျွန်းသစ် နှင့် တခြားသော အဖိုးတန်သစ်များ စိုက်ပျိုး ထိန်းသိမ်းထားရာ သစ်တောဧက ဖြစ်ကြောင်း သိရသည်။

လက်ရှိတွင် သစ်တောမြေ ၄၀ ဧကမှ ၅ ဧကခန့်ကို ခုတ်ထွင် ရှင်းလိုက်ပြီး အနီးပတ်ဝန်းကျင်မှ ယာမြေ ဧကများ အပါအဝင် ပြည်သူ့ယာခင်းများ၊ ဒညင်းခြံများကိုလည်း အတင်းဝင်ရောက် ခုတ်ထွင်ရှင်းလင်းသွားကြောင်း ဒေသခံများက ပြောသည်။

နမ္မတူမြို့နယ်အတွင်း ပြည်သူပိုင် သစ်တောမြေ နှင့် ယာမြေ၊ စိုက်ခင်းမြေများကို ဦးဆောင်ပြီး သိမ်းယူ ခုတ်ထွင် ရှင်းလင်းနေသူသည် တားအုံဖိ ဟု အမည်ရှိသည့် TNLA တပ်ဖွဲ့မှ အရာရှိ တစ်ဦးဖြစ်ကြောင်းလည်း သိရသည်။

ယင်းကဲ့သို့ လုပ်ဆောင်ခြင်းများ နှင့် ပတ်သက်ပြီး တအာင်း (ပလောင်) အမျိုးသား လွတ်မြောက်ရေး တပ်မတော်၊ TNLA ၏ ပြောရေးဆိုခွင့်ထံသို့ ဆက်သွယ်မေးမြန်းရာ ဖြစ်စဥ် အသေးစိတ်ကို မသိရသေးကြောင်း သျှမ်းသံတော်ဆင့်ကို ပြောသည်။

“ဖြစ်စဥ်အသေးစိတ်ကို ကျနော် မသိရသေးပါဘူး၊ အရင်က တပ်မတော် နဲ့ တိုက်ပွဲဖြစ်တာ၊ RCSS နဲ့ တိုက်ပွဲ ဖြစ်တာကနေ စစ်ရှောင်ရတဲ့ ဒုက္ခသည်တွေ ပြန်လည် နေရာချထားရေး လုပ်ပေးတာမျိုးတော့ ရှိတယ်၊ အခုလို မြေယာတွေ ၊ သစ်တောတွေကို သိမ်းယူပြီး ခုတ်ထွင် ရှင်းလင်းတာတော့ ကျနော်မသိရသေးဘူး” ဟု TNLA တပ်ဖွဲ့၏ ပြောရေး ဆိုခွင့် ရှိသူ ဒုတိယ ဗိုလ်မှူးကြီး တားဘုန်းကျော်က သျှမ်းသံတော်ဆင့်ကို ပြောသည်။

လက်ရှိတွင် နမ္မတူမြို့နယ် ပန်ချင်ကျေးရွာအုပ်စု၊ နားမတ်ကျေးရွာ နှင့် ဆိုင်းခေါ်(ဝ်)ကျေးရွာအုပ်စု အနီး၊ ၆ မိုင် ကုန်းရွာတွင် တအာင်းရွာသစ် တည်လျက်ရှိကြောင်း သိရသည်။

နမ္မတူမြို့နယ်အတွင်းသည် အာဏာသိမ်း စစ်ကောင်စီ တပ်ဖွဲ့ နှင့် တိုင်းရင်းသား လက်နက်ကိုင် တပ်ဖွဲ့တို့အကြား တိုက်ပွဲများအပြင် ၊ တိုင်းရင်းသား လက်နက်ကိုင် တပ်ဖွဲ့ အချင်းချင်းကြား ထိတွေ့တိုက်ပွဲများလည်း မကြာခဏ ဖြစ်ပွားရာ ဒေသဖြစ်သည်။